ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމްގެ ސްޕެޝަލް އެޑްވައިޒަރުންނަށް އިތުރު ތިން ބޭފުޅަކު، އަދި އެމަނިކުފާނުގެ ތަރުޖަމާނަކަށް ބޭފުޅެއް އައްޔަން ކުރައްވައިފިއެވެ.

އިއްޔެ ބޭއްވުނު ޖޭޕީގެ 151 ވަނަ ކައުންސިލް ބައްދަލުވުމުގައި ގާސިމްގެ ސްޕެޝަލް އެޑްވައިޒަރުންނަށް އައްޔަން ކުރެއްވީ މިހާރުގެ ފިޝަރީޒް މިނިސްޓަރު ޑރ. ހުސައިން ރަޝީދު ހަސަނާއި ކުރީގެ ހެލްތު އަދި ކުޅިވަރާ ބެހޭ ވަޒީރު އިރުތިޝާމް އާދަމާއި ކުރީގެ ޖެންޑާ މިނިސްޓަރު ޑރ.އާމާލް އަލީއެވެ.

ޖޭޕީން އެންމެ ފަހުން ބޭއްވި ކޮންގްރެސްގައި އެ ޕާޓީގެ ޑެޕިއުޓީ ލީޑަރުކަމަށް ވެސް ޑރ. ހުސައިން ވާދަކުރެއްވި އެވެ. އެހެން ނަމަވެސް އެ އިންތިހާބުގައި އޭނާއަށް ލިބުނީ ނާކާމިޔާބީއެވެ.  

ގާސިމްގެ ސްޕެޝަލް އެޑްވައިޒަރު ކަމަށް އައްޔަން ކުރެއްވުނު ޑރ. އާމާލް ވަނީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ގައުމީ އިއްތިހާދު ޕާޓީ (ޖީއައިޕީ) ގައި މަސައްކަތް ކުރައްވައިފައެވެ. އާމާލް ބޮޑަށް ފާހަގަކޮށްލެވެނީ ތައުލީމީ ދާއިރާ އަށް އޭނާއަށް ކޮށްދެއްވާފައިވާ އަގުހުރި ހިދުމަތްތަކުންނެވެ.

އިރުތިޝާމް އަކީ މީގެ ކުރިން ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި ހެލްތު މިނިސްޓަރުކަމާއި ޔޫތު މިނިސްޓަރު ކަން ކުރެއްވި ބޭކަނބަލެކެވެ. އަދި އޭގެ އިތުރުން، ކުރީގެ ރައީސް މުހައްމަދު ނަޝީދާއި ރައީސް ވަހީދުގެ ސަރުކާރުގައި ސަފީރުކަމާއި ޑެޕިއުޓީ އެމްބެސެޑަރުކަމާއި ހާރިޖީ ދާއިރާއާ ގުޅުން ހުރި ބައެއް މަގާމުތައްވެސް އިރުތިޝާމް ވަނީ ފުރުއްވާފައެވެ.

އިއްޔެ ބޭއްވުނު ޖޭޕީގެ 151 ވަނަ ކައުންސިލް ބައްދަލުވުމުގައި ގާސިމްގެ ތަރުޖަމާނު ކަމަށް އައްޔަން ކޮށްފައިވަނީ ކުރީގެ ހެލްތު މިނިސްޓަރު އަބްދުالله އަމީނެވެ. އަމީނަކީ ވޭތުވެދިޔަ ފަސް އަހަރު ވަންދެން ޖޭޕީގެ ޑެޕިއުޓީ ލީޑަރު ކަން ކުރެއްވި ބޭފުޅެކެވެ. 

މި ސަރުކާރު ފެށިގެން އައި އިރު ހެލްތު މިނިސްޓަރު ކަމުގެ މަގާމުގައި އަމީން ހުންނެވުމަށްފަހު، އޮކްޓޯބަރު، 2021 ގައި އޭނާ ވަނީ މަގާމުން އިސްތިއުފާ ދެއްވައިފައެވެ. އަމީން އިސްތިއުފާ ދެއްވީ ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ ފެކްޝަނުން އޭނާގެ މައްޗަށް އިތުބާރު ނެތް ކަމުގެ މައްސަލައެއް ރައްޔިތުންގެ މަޖިލިހަށް ފޮނުވާފައި ވަނިކޮށެވެ. އެ މައްސަލައިގައި 24 މެމްބަރަކު ސޮއިކުރެއްވިއެވެ.

ގާސިމްގެ ތަރުޖަމާނު އަބްދުالله އަމީން -- ފޮޓޯ/ ވޮއިސް

އިއްޔެގެ ބައްދަލުވުމުގައި ޖޭޕީގެ ޗީފް ސްޕޯކްސްޕާސަނަކަށް މިހާރު ވެސް އެ މަގާމު ފުރުއްވާ އަލީ ސޯލިހު ވަނީ އަލުން އައްޔަން ކުރައްވާފައެވެ. 

ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރަކަށް ހުންނެވި އަލީ ސޯލިހު ޖޭޕީގެ ޗީފް ސްޕޯކްސްޕާސަނެއްގެ މަގާމު ފުރުއްވަމުން ގެންދަވާތާ މިހާރު 10 އަހަރު ވަނީ ވެފައެވެ. ޑީއާރުޕީގެ ވަގުތީ ސެކްރެޓަރީ ޖެނެރަލްކަމާއި މީޑިއާ ކޯޑިނޭޓަރުކަން ކުރެއްވި އަލީ ސޯލިހް ވަނީ އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ކަން ވެސް ކުރައްވައިފައެވެ.

ޖޭޕީގެ ޗީފް ސްޕޯކްސްޕާސަން: ފޮޓޯ/ ވޮއިސް

އެމަގާމް ތަކުގެ އިތުރުން ގާސިމްގެ ސްޕެޝަލް އެންވޯއީއަކަށް ބޭފުޅަކު އައްޔަން ކުރުމަށްޓަކައި އެ ޕާޓީގެ އަސާސީ ގަވައިދަށް އިސްލާހު ގެނައުމަށް ވެސް އެ ޕާޓީން އިއްޔެ ވަނީ ފާސްކޮށްފައެވެ. ނަމަވެސް އެ މަގާމަށް ވަކި ބޭފުޅަކު އަދި އައްޔަނު ކުރައްވާފައި ނުވެއެވެ.