ހަވާ އަރުވައި، ކުލަ ގަދަ ރަސްމިއްޔާތަކާއި އެކު ގދ.ފަރެސްމާތޮޑާގައި އެއާޕޯޓް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ހުޅުވައި ދެއްވައިފިއެވެ.
މޯލްޑިވިއަންގެ މަތިންދާ ބޯޓެއްގައި ރޭގެ ހަފްލާއަށް ރައީސް ސޯލިހް ފަރެސްމާތޮޑާއަށް ވަޑައިގަތުމުން ރައީސް އަށް އިސްވެ މަރުހަބާ ދެންނެވީ ޕްލޭނިން މިނިސްޓަރު މުހައްމަދު އަސްލަމާއި އެ ރަށު ކައުންސިލް މެންބަރުންނާއި ރައްޔިތުންނެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ތަރައްޤީ ކޮށްފައިވާ ފަރެސްމާތޮޑާ އެއަރޕޯޓު ތަރައްގި ކުރުމުގެ މަޝްރޫޢުގެ ދަށުން ރަންވޭގެ ސަބްގްރޭޑް އަދި ސަބްބޭސް މަސައްކަތާއި، ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ޤާއިމްކޮށް، ފަޔަރ ބިލްޑިންގ އެއް އިމާރާތް ކޮށްފައިވެއެވެ. އަދި މި އެއަރޕޯޓަކީ ވައިގެ ބަނދަރެއްގައި ހުންނަންޖެހޭ އަސާސީ ހުރިހާ ވަސީލަތެއް ފުރިހަމަކުރެވިގެން ނިންމާލެވިފައިވާ އެއަރޕޯޓެއްކަމަށް އެމްޓީސީސީން ބުނެއެވެ.
ރޭ ހުޅުވި އެއާޕޯޓުގެ ޚިދުމަތްތައް ބުރާސްފަތި ދުވަހުން ފެށިގެން ފެށުމަށް ހަމަޖެހިފައިވާއިރު، ހަފްތާއަކު ދެ ފްލައިޓް އެ އެއާޕޯޓަށް ޖެއްސުމަށް ހަމަ ޖެހިފައިވެއެވެ.
ފަރެސްމާތޮޑާ އެއާޕޯޓް ގެ ދަތުރުތަކަށް މޯލްޑިވިއަނުން މިހާރު ވަނީ މި މަހުގެ 16 އާއި 19 އަށް ހާއްސަ ޕްރޮމޯޝަނަލް ފެއާއަކަށް ވެސް ހުޅުފައެވެ. އޭގެ ދަށުން އެއްކޮޅު ޓިކެޓެއް 1،574ރ. އަށް ވިއްކާ އިރު، ރިޓާން ޓިކެޓެއްގެ އަގަކީ 3،148ރ. އެވެ.
Advertisement
This content is created and paid for by advertisers and does not involve Voice Journalists
