ފެނުމުގެ ނުކުޅެދުންތެރިކަން ހުންނަ މީހުންނަށް މިނިވަންކަމާއި ވޯޓުލެވޭނެ ގޮތް ހެދުމުގެ ބިލް މަޖިލީހަށް

ލޮލަށް ފެނުމުން މަހުރޫމުވެފައިވާ ފަރާތްތަކަށް ވެސް އެހެން މީހެއްގެ އެހީތެރިކަމެއް ނެތި، ސިއްރު ވޯޓެެއް ލެވޭ ފަދަ އާލާތެއް ބޭނުންކުރެވޭ ގޮތަށް، އިންތިހާބުތަކާ ބެހޭ އާއްމު ގާނޫނު ބަދަލުކުރަން މަޖިލީހަށް ފޮނުވަން ނިންމާފައިވާ ކަމަށް ސަރުކާރުން ބުނެފިއެވެ.

ލޯފަން މީހުންނަށްވެސް ސިއްރު ވޯޓުލުމުގެ ހައްގު ގާނޫނުން ކަށަވަރު ކޮށްދީފައިވާއިރު މިކަން ކުރުމަށްޓަކައި އެހީތެރިޔަކާއިއެކު ދާ ދިޔުމުގެ ސަބަބުން ހަގީގަތުގައި އެ މީހެއްގެ ވޯޓް ސިއްރު ނުވާނެކަަމަށްބުނެ، އެ މައްސަލަ ހައްލުކޮށް މިއަހަރު ސެޕްޓެމްބަރު މަހު ބޭއްވޭ ރިޔާސީ އިންތިޙާބުގައި މިނިވަންކަމާއިއެކު ވޯޓުލެވޭނެ ގޮތެއް ހަދައި ދިނުމަށްއެދި ފެނުމުގެ ނުކުޅެދުންތެރިކަން ހުންނަ މީހުންގެ ހައްގުގައި މަސައްކަތް ކުރާ ބްލައިންޑް އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސް (ބީވީއައިއެސްއެމް) އިން ވަނީ ކަމާއިބެހޭ ގިނަ އިދާރާ ތަކާއި މަޝްވަރާތަކެއް ކޮށްފައެވެ.

އަދި އެކަމަށް މަގުފަހިވެގެންދާނެ ކަމަށް އިލެކްޝަންސް ކޮމިޝަނުންވެސް ދާދިފަހުން ވަނީ ބުނެފަ އެވެ.

މިކަމާއި ގުޅިގެން މިއަދު ރައީސް އޮފީހުގެ ފަރާތުން ކުރިއަށް ގެންދިޔަ ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ފެނުމުން މަހުރޫމުވެފައިވާ މީހުންނާއި، ފެނުމުގެ ނުކުޅެދުންތެރިކަން ހުންނަ މީހުންނަށް އެހެން މީހެއްގެ އެހީތެރިކަމާ ނުލައި ވޯޓުލުމުގެ ފުރުސަތު ހޯދައި ދިނުމުގެ ގޮތުން، އެފަރާތްތަކުން ވޯޓުލާއިރު އެކަމަށް ޚާއްސަ ކުރެވިފައިވާ ޕްލާސްޓިކް ޓެމްޕްލޭޓެއް މެދުވެރިކޮށް، ސިއްރު ވޯޓެއް ލުމުގެ މަގު ފަހި ކޮށްދިނުމަށް، އިންތިޚާބާއި ބެހޭ އާއްމު ގާނޫނަށް ގެންނަ ބަދަލުގެ ބިލު ރައްޔިތުންގެ މަޖިލީހަށް މިއަދު ފޮނުވަން ނިންމާފައިވާ ކަމަށެވެ.

"މި ބިލުން، އިންތިހާބުތަކާ ބެހޭ އާއްމު ގާނޫނަށް ގެނެވޭ އިސްލާހަށް ބަލާއިރު، ވޯޓުކަރުދާހުގައި އަމިއްލައަށް ފާހަގަ ޖެހުމަށް ޖިސްމާނީ ގޮތުން ނުކުޅެދިގެންވާ މީހުންގެ ތެރެއިން ފެނުމުގެ ނުކުޅެދުންތެރިކަން ހުންނަ ފަރާތްތަކުން އެހެން މީހެއްގެ އެހީތެރިކަމާ ނުލައި ވޯޓުކަރުދާހުގައި އަމިއްލައަށް ފާހަގަ ޖެހުމަށް އެދޭ ނަމަ ވޯޓުކަރުދާސް އޭގެ ތެރެއަށް ލައިގެން ނުވަތަ ވޯޓުކަރުދާހުގެ މަތީގައި ވަގުތީ ގޮތުން ހަރުކޮށްގެން، ފެނުމުގެ ނުކުޅެދުންތެރިކަން ހުންނަ މީހުންނަށް ވޯޓުލުމަށް އެހީތެރިވެދޭ ގޮތަށް ތައްޔާރުކޮށްފައިވާ ، އެތެރެ ފެންނަ ޕްލާސްޓިމް ޑިވައިސް އެއް ބޭނުންކޮށްގެން ވޯޓުކަރުދާހުގައި ފާހަގަ ޖެހިދާނެ ކަމަށް ބިލުގައި ބަޔާންކޮށްފައި ވާނެ،" މިއުވާން ވިދާޅުވި އެވެ.

މިއުވާން ވިދާޅުވީ ނުކުޅެދުންތެރިކަން ހުންނަ ފަރާތްތައް އިންތިހާބުތަކުގައި ވޯޓުލުމުގައި ހުރި ދަތިތައް ހައްލުކުރަން ގިނަ ޖަމިއްޔާތަކެއްގެ ހުށަހެޅުންތަކެއް އެބަހުރި ކަމަށާއި ސަރުކާރުން ހުށަހަޅާފައިވާ އެ ބިލު ހުށަހަޅަނީ އެކަމަށް ރިއާޔަތްކޮށްގެން ކަމަށެވެ.

އަދި އެއީ ފެނުމުގެ ނުކުޅެދުންތެރިކަން ހުންނަ ފަރާތްތަށް އުފާވެރި ޚަބަރަކަށް ވެގެންދާނެ ކަމަށް ވެސް އޭނާ ވިދާޅުވި އެވެ.