ޖުމުހޫރީ ޕާޓީ (ޖޭޕީ) ގެ ފަރާތުން ކުރިއަށް އޮތް ރިޔާސީ އިންތިހާބަށް ކުރިމަތިލުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލައިފި އެވެ.

ޖޭޕީން ނެރުނު އިއުލާނެއްގައި ބުނެފައި ވަނީ އެ ޕާޓީގެ ކައުންސިލްގެ 151 ވަނަ ބައްދަލުވުމުން ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރުމަށް ނިންމާފައިވާ ކަމަށެވެ.

އަދި އެ ޕާޓީގެ އަސާސީ ގަވައިދުގައިވާ ގޮތުގެ މަތިން ރިޔާސީ އިންތިހާބުގައި ޖޭޕީގެ ފަރާތުން ކުރިމަތިލާނެ ކެނޑިޑޭޓަކު ކަނޑައަޅާމީ ޕާޓީގެ ހުރިހާ މެމްބަރުންނަށް އާންމުކޮށް ހުޅުވާލައިގެން އެ ކަމަށް ޝައުގުވެރިވާ ފަރާތްތަކުގެ މެދުގައި ބާއްވާ ޕްރައިމަރީ އަކުން ކަމަށްވެސް އެ އިއުލާނުގައި ބުނެފައި ވެއެވެ.

Advertisement

އެހެންކަމުން، މި އަހަރު އޮންނަ ރިޔާސީ އިންތިހާބުގައި ޖޭޕީގެ ފަރާތުން ކުރިމަތިލުމަށް ޝައުގުވެރިވާ އެ ޕާޓީގެ ހުރިހާ މެންބަރުންގެ ތެރެއިން ރައީސުލްޖުމްހޫރިއްޔާގެ ކިބައިގައި ހުންނަންވާނެ ކަމަށް ގާނޫނުންގައި ކަނޑައަޅާފައިވާ ޝަރުތުތައް ފުރިހަމަވާ މެމްބަރުންނަށް އެ ފުރުސަތު ހުޅުވާލާ ކަމަށް އިއުލާނުގައި ވެއެވެ.

އަދި އެކަމަށް ޝައުގުވެރިވާ ފަރާތްތަކުން ސިޓީއާއެކު އެމީހާގެ އައިޑީ ކާޑުގެ ދެފުށުގެ ސާފު ކޮޕީ އާއި ވަނަވަރު މި މަހުގެ 30 ވަނަ ދުވަހުގެ މެންދުރު 12:00 ގެ ކުރިން އެ ޕާޓީގެ މައި އޮފީހަށް ހުށަހެޅުމަށް އެދިފައެވެ.