ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަކީ މިހާތަނަށް ރާއްޖޭގައި ވެރިކަން ކުރެއްވި އެންމެ ޚަރަދުބޮޑު ރައީސްކަމަށް ކުރީގެ ނައިބުރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ.
ޑރ ޖަމީލު މިފަދައިން ވިދާޅުވެފައިވަނީ ރައީސް އިބްރާޙިމް މުޙައްމަދު ޞާލިހު ބޭކާރު ދަތުރުފުޅުތަކަށް ބޮޑެތި ޚަރަދުތައް ކުރައްވަމުން ގެންދަވާކަން ފާހަގަކުރައްވާ ކުރެއްވި ޓްވީޓެއްގަ އެވެ.
ޑރ ޖަމީލުގެ އެ ޓްވީޓުގައި ވަނީ ރައީސް ޞާލިހުގެ ދެކަންބަލުން އަދި އަރިހުގައި ސަރުކާރުގެ ބޮޑު ވަފުދަކާއެކު ޖަރުމަނުގައި ކުރިއަށް ގެންދިޔަ ޓޫރިޒަމް ފެއާ އައިޓީބީ ބާލިން 2023 އަށް ވަޑައިގެން އެތަނުގައި ހުންނަވަނިކޮށް ނަގާފައިވާ ފޮޓޯއެއް ހިއްސާކުރައްވާފަ އެވެ.
އެއާއެކު ޑރ ޖަމީލު ވިދާޅުވީ ރައީސް ޞާލިހު އަބަދުވެސް އިސްކުރައްވަނީ އަމިއްލަ ޝަޢުޤު ފުރިހަމަ ކުރުން ކަމަށެވެ. ރައީސް ޞާލިހުގެ އެ ދަތުރުފުޅުގެ އެ ދަތުރުފުޅުން އެކަނި ރައްޔިތުންނަށް މިލިއަނުން ގެއްލުވެފައިވާކަން ޑރ ޖަމީލު ފާހަގަކުރެއްވި އެވެ.
ޑރ ޖަމީލު އިތުރަށް ވިދާޅުވީ ރައީސް ޞާލިހުވަރުގެ ޚަރަދުބޮޑު ވެރިއަކު އަދި ރާއްޖޭގެ ވެރިކަަމަށް ނާންނަކަމަށެވެ. އަދި އެ މަނިކުފާނުގެ ވެރިކަމަކީ ރައްޔިތުންނަށް ގެއްލުން ބޮޑު ވެރިކަމެއް ކަމަށެވެ.
"ރައްޔިތުންނާ މެދު ވިސްނުމަށްވުރެ ރ. އިބްރާހިމް މުޙައްމަދު ޞާލިހު މަސައްކަތްކުރައްވަނީ އަމިއްލަ ޝައުޤް ފުރިހަމަކުރެއްވޭތޯ. ޖަރުމަނު ދަތުރުގައި، ރިޒް ކާލްޓަންގައި 30އަށްވުރެ ގިނަ މީހުންނާއެކު؛ ރައްޔިތުންނަށް މިލިއަނުން ގެއްލުން. މިހާ ޚަރަދު ބޮޑު ރައީސެއް އަދި ނާދޭ. މިއީ ގެއްލުން ބޮޑު ވެރިކަމެއް"
ކުރީގެ ނައިބުރައީސް ޑރ މުޙައްމަދު ޖަމީލު އަހުމަދު
ޑރ ޖަމީލު މިފަދައިން ވިދާޅުވެފައިވާއިރު 1 ޖެނުއަރީ 2023 އިން 9 ފެބުރުއަރީ 2023 ގެ ނިޔަލަށް ސަރުކާރުން ދަތުރުތަކަށް 15.5 ނުވަތަ 16 މިލިއަން ރުފިޔާ ޚަރަދުކޮށްފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ވަނީ ހާމަވެފަ އެވެ.
މިއީ މިދިޔަ އަހަރަށްވުރެ 1.9 މިލިއަން ރުފިޔާގެ އިތުރުވުމެކެވެ. މިދިޔަ އަހަރު އެ މުއްދަތުގައި ސަރުކާރުން ދަތުރުތަކަށް ޚަރަދުކޮށްފައިވަނީ 13.6 މިލިއަން ރުފިޔާއެވެ.
Advertisement
This content is created and paid for by advertisers and does not involve Voice Journalists
