ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހުގެ ސެކިއުރިޓީން އެމަނިކުފާނަށް ރައްކާތެރިކަން ފޯރުކޮށްދިނުމުގައި ފެއިލް ވި ކަމަށާ، އެކަމުގެ ޒިންމާ ޑިފެންސް މިނިސްޓަރު މާރިޔާ އަހުމަދު ދީދީ ނަގަންޖެހޭނެ ކަމަށްބުނެ ގިނަ ބަޔަކު ފާޑުކިޔަން ފެށުމުން އެކަމުން ދެކިވަޑައިގަންނަވަން މިނިސްޓަރު މާރިޔާ "އަންހެން ކާޑު" ކުޅުއްވައިފިއެވެ. 

ބައިނަލްއަޤްވާމީ އަންހެނުންގެ ދުވަސް ފާހަގަކުރުމަށް ހުޅުމާލޭގައި ހުންނަ ޢުމަރު ޒާހިރު އޮފީސް އިމާރާތުގައި ބޭއްވެވި ޖަލްސާގައި ބައިވެރިވެ ވަޑައިގެންނެވުމަށްފަހު ރައީސުލްޖުމްހޫރިއްޔާ ގެކޮޅަށް ވަޑައިގެންނެވި މަގުމަތިން އިދިކޮޅު މުޒާހަރާގެ ބައިވެރިން ވަނީ ޕީޕީއެމް އޮފީސް ސަރަހައްދުން ރައީސްގެ މޮޓޯކޭޑަށް ހުރަސް އަޅާފައެވެ.

އެ މައްސަލާގައި ގިނަ ބައެއްގެ ފާޑުކިޔުންތައް ޑިފެންސް މިނިސްޓްރީ އަށާއި މާރިޔާއަށްވެސް އަމާޒު ވަމުންދާއިރު، މާރިޔާ މަޖިލީހަށް ހާޒިރުކޮށް، މަގާމުން ވަކިކުރުމަށް ގޮވާލައި ކުއްލި މައްސަލަ އެއްވެސް އިދިކޮޅުން މަޖިލީހަށް ހުށަހެޅިއެވެ. 

އެކަމާއި ގުޅިގެން، މާރިޔާ މިއަދު ކުރެއްވި ޓްވީޓެއްގައި ވަނީ، ފިރިހެން ބޭފުޅުން މިނިސްޓަރު ކަން އަދާކުރައްވާ މިނިސްޓްރީތަކުގައި ހިނގާ ނުރަނގަޅު ކަންކަމުގެ ޒިންމާ ފިރިހެން މިނިސްޓަރު އުފުއްލަވަން ނުޖެހޭ ކަމަށާ އެފަދަ ފާޑުކިޔުންތައް އެ މިނިސްޓަރަށް އަމާޒު ނުކުރާ ކަމަށް ދޭހަވާ ފަދަ މޭރުމަކުން ވާހަކަ ދައްކަވާފައެވެ.  

"އައިޖީއެމްއެޗް އިން ހިންގާ އޮޕަރޭޝަނެއްގައި ނުބައިކޮށް ކަމެއް ވެއްޖެ ނަމަ، އެކަކުވެސް އެކަމުގެ ޒިންމާ ހެލްތު މިނިސްޓަރުގެ ބޮލުގައި ނާޅުވާ. ފުލުހުންނަށް ކުރެވޭ ނުރަނގަޅު ކަންކަމުގެ ޒިންމާ ހޯމް މިނިސްޓަރު ގެ ބޮލުގައި އެކަކުވެސް ނާޅުވާ. އެކަމަކު، އޮޕަރޭޝަނަލް ލެވެލް އެއްގައި ނަމަވެސް އެމްއެންޑީއެފްގައި ކަމެއް ހިނގައިފި ނަމަ، އަންހެން ޑިފެންސް މިނިސްޓަރު އެކަމުގެ ޒިންމާ ނަގަން މި ޖެހެނީ. އަދި މިއީ "އަންހެނުން އިހުތިފާލުކުރާ" މަސް." މާރިޔާ ވިދާޅުވި އެވެ. 

މާރިޔާ މިފަދައިން ވިދާޅުވެ އަންހެން ކާޑު ކުޅުއްވި ނަމަވެސް، މީގެ ކުރިން ކޮވިޑް ތެރޭގައި ވެންޓިލޭޓަރު މައްސަލައިގައި އޭރުގެ ހެލްތު މިނިސްޓަރުގެ އިތުބާރު ނެތް ކަމުގެ ވޯޓު ނަގަން މަޖިލީހަށް ފޮނުވުނެވެ. އެ މައްސަލާގައި އޭރުގެ ހެލްތު މިނިސްޓަރު އަމީން ވަނީ އިސްތިއުފާވެސް ދެއްވާފައެވެ. 

އަމީންގެ އިތުރުން މަރާލި ދީނީ އިލްމުވެރިޔާ ޑރ. އަފްރާޝީމް އަލީ އާއި ނޫސްވެރިޔާ އަހްމަދު ރިލްވާން ގެއްލުވާލި މައްސަލައިގައި ހެކި ހުރި ކަމަށް ވިދާޅުވެ އިމްރާން އިތުރުފުޅު ހައްދަވާފައިވާ ކަމުގެ ތުހުމަތާއި ހުޅުމާލޭގެ ފަޅުތެރޭގައި އޮތް ސަފާރީއެއްގައި ކެންޔާ އަންހެނަކަށް ޖިންސީ ގޯނާކުރި މައްސަލައަކީ އާދައިގެ ކަމެއް ކަމަށް، ދެއްކެވި ވާހަކަތަކާއި ގުޅިގެން ހޯމް މިނިސްޓަރު އިމްރާންގެ މައްޗަށް އިތުބާރު ނެތް ކަމުގެ ވޯޓު ނަގަން ވެސް މަޖިލީހަށް ފޮނުވުނެވެ.