ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީ (ޖޭޕީ)ގެ ކެމްޕެއިންގެ މަސައްކަތްތައް ރާވަން އެ ޕާޓީގެ ޑެޕިޔުޓީ ލީޑަރު އަމީން އިބްރާހިމް އާއި ހަވާލުކޮށްފިއެވެ. 

ޖޭޕީން މިއަދު ކުރި ޓުވީޓެއްގައި ބުނީ، ރިޔާސީ އިންތިހާބުގެ ކެމްޕެއިން ކަންކަން އަމީން އާއި ހަވާލުކުރެއްވީ އެ ޕާޓީގެ ލީޑަރު ޤާސިމް އިބްރާހިމް ކަމަށެވެ. 

އަދި ކެންޕެއިންގެ ކަންކަމުގައި ޑެޕިއުޓީ ލީޑަރު އަމީންއަށް ޖޭޕީގެ އެންމެހައި މެންބަރުން އެއްބާރުލުން ދިނުމަށްވެސް ގާސިމް އެދިވަޑައިގެންނެވި ކަމަށް ޖޭޕީން ބުނެފައި ވެއެވެ. 

Advertisement

އަމީން އަކީ އެންމެ ގިނަ ދުވަހު ގާސިމް އާއިއެކު ސިޔާސީ ހަރަކާތްތަކުގައި ބައިވެރިވެ ވަޑައިގެންނެވި ގާސިމް އާއި އެންމެ އަރިސް އެއްބޭފުޅާއެވެ. 

ސެޕްޓެމްބަރު މަހުގެ ނުވަ ވަނަ ދުވަހު އޮންނަ ރިޔާސީ އިންތިހާބުގައި ޖޭޕީން ވަކިން ވާދަކުރުމަށް އެ ޕާޓީގެ ކައުންސިލުން މި މަހުގެ 14 ވަނަ ދުވަހު ވަނީ ފާސްކޮށްފައެވެ. އަދި ޖޭޕީއާ އެކު ކޯލިޝަން ހެދުމާ ގުޅޭ މަޝްވަރާތައް ފެށުމަށް ވެސް އެ ކައުންސިލް ބައްދަލުވުމުގައި ވަނީ ނިންމައިފައެވެ.