ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ދެވަނަ ދައުރެއްގެ ހުވަފެން ދެކިވަޑައިގަންނަވާތީ ހައިރާންވެވަޑައިގަންނަވާ ކަމަށް ކުރީގެ ނައިބުރައީސް އަދި ރައީސް އަބްދުالله ޔާމީން އަބްދުލްގައްޔޫމުގެ އިސް ގާނޫނީ ވަކީލު ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ.
ޑރ ޖަމީލު މިފަދައިން ވިދާޅުވެފައިވަނީ މި ސަރުކާރުން ދަރަނި އިތުރުކޮށްފައިވާ މިންވަރާއި ގުޅިގެން ކަންބޮޑުވުން ފާޅުކުރައްވާ ކުރެއްވި ޓްވީޓެއްގައެވެ.
ޑރ ޖަމީލު ވިދާޅުވީ ރައީސް ޞާލިހަކީ ތަފާތު ސަގާފަތެއްގެ ބޭފުޅެއް ކަމަށެވެ. ނުކުރައްވާނެކަމަށް ވިދާޅުވާ ކަންކަން އެމަނިކުފާނުގެ ވެރިކަމުގައި ކުރައްވަމުން ގެންދާކަން ޑރ ޖަމީލު ފާހަގަކުރެއްވިއެވެ.
އެގޮތުން އެމަނިކުފާނަކީ ދަރަނި ނުގަންނަވާނެކަމަށް ވައުދުވެވަޑައިގެން ވެރިކަމަށް ވަޑައިގެންނެވި ބޭފުޅެއް ނަމަވެސް، މި ސަރުކަރުން އުފެއްދި ދަރަންޏާއެކު ދައުލަތުގެ ދަރަނި 100 ބިލިއަނަށްވުރެ މަތިވެފައިވާކަމަށް ޑރ ޖަމީލު ވިދާޅުވި އެވެ. އަދި ވިދާޅުވީ އެއީ ރިކޯޑު އަދަދެއް ކަމަށެވެ.
ރައީސް ޞާލިހަކީ ބުހުތާނު ދޮގު ހެއްދެވުމުގައި އެފަދަ ދެވަނައެއް ނުވާ ބޭފުޅެއްކަން ފާހަގަކުރައްވާ ޑރ ޖަމީލު އިތުރަށް ވިދާޅުވީ އެހުރިހާ ކަމެއް ހާމައަށް ފެންނަން ހުރިއިރު ރައީސް ޞާލިހު ވެރިކަމުގެ ދެވަނަ ދައުރެއް ހޯއްދަވަން އުޅުއްވާތީ، އަދި އެ ހުވަފެންފުޅު ދެކެވަޑައިގަންނަވާތީ ހައިރާންވެވަޑައިގަންނަވާ ކަމަށެވެ.
"ރައީސް ޞާލިހު އަކީ ތަފާތު ސަގާފަތެއްގެ ވެރިޔެއް. ކުރިން ދަރަނި ގޯސްވި. ވެރިކަން ނިންމާލައްވަނީ ދަރަނި 100 ބިލިއަނަށްވުރެ މައްޗަށް ޖައްސާ އާރިކޯޑެއް އުފައްދާފައި. ބުހުތާން ދޮގު ހެދުމުގައި ދެން މިވަރެއް ހަމަނެތް. ޙައިރާންވޭ ދެވަނަ ދައުރެއްގެ ހުވަފެން ދެކޭތީ"
ކުރީގެ ނައިބު ރައީސް ޑރ މުޙައްމަދު ޖަމީލު އަހުމަދު
ދައުލަތުގެ ދަރަނި އިންތިހާއަށް އިތުރުވެފައިވާއިރު ލޯނު އަނބުރާ ދެއްކުމަށް ދަރަނި ރީ-ސްޓްރަކްޗާ ކުރުމަށް މަޖިލީހުން ވަނީ ގޮވާލާފަ އެވެ.
އެހެން ނަމަވެސް، އެކަމާއި ގުޅިގެން ފިނޭންސް މިނިސްޓަރ ވަނީ ދަރަނި ރީ ސްޓްރަކްޗަރ ކުރުމަށް މިހާރު ގެންގުޅޭ އުސޫލު ފިޔަވައި އެހެން ގޮތަކަށް އެކަން ކުރުމުގެ ވިސްނުމެއް ނެތް ކަމަށް ވިދާޅުވެފަ އެވެ. އަދި ދަރަނި މެނޭޖު ކުރެވޭނެ ކަމުގެ ޔަގީންކަންވެސް އޮތްކަމަށް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
