ރައްޔިތުންގެ މަޖިލީހުގައި ރަލުގެ ވާހަކަ ދައްކަން މެންބަރުންނަށް ނުކެރެނީ މަޖިލީހުގައި ރާބޯ މީހުން ގިނަ ވުމުންތޯ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުالله (މޮސްޓާ) ސުވާލު ކުރައްވައިފިއެވެ. 

މޮސްޓާ މިފަދައިން ސުވާލު އުފައްދަވާފައި ވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، މަސްތުވާތަކެއްޗަށް ދެވިހިފާފައިވާ މީހުންނަށް ފަސޭހައިން ފަރުވާ ލިބޭނޭގޮތަށް ނިޒާމު ބަދަލުކުރުމަށް ސަރުކާރަށް ގޮވާލައި ހުށަހަޅާ ޤަރާރުގެ ބަހުސްގައި ވާހަކަދައްކަވަމުންނެވެ. 

އެ ގަރާރުގައި ބާރުގަދަ މަސްތުވާތަކެތީގެ ވާހަކަ ވާކަމަށް އިޝާރާތް ކުރައްވައި މޮސްޓާ ވިދާޅުވީ ރާއްޖޭގައި އަބަދުވެސް ވާހަކަ ދައްކަނީ ބާރުގަދަ މަސްތުވާތަކެތީގެ ވާހަކަ ކަމަށެވެ. އަދި ބާރު ގަދަ ވިޔަސް ކުޑަ ވިޔަސް މަސްތުވާތަކެތި ވާނީ މަސްތުވާތަކެތި ކަމަށް މޮސްޓާ ވިދާޅުވި އެވެ. 

Advertisement

މޮސްޓާ ވިދާޅުވީ ވަކި ވައްތަރެއްގެ މަސްތުވާއެއްޗެއް ހަލާލް ކޮށްފައި ވަޖި ވައްތަރެއްގެ މަސްތުވާއެއްޗެއް ހުއްދަ ކުރަން އުޅޭތަން ރައްޔިތުންގެ މަޖިލީހުގެ ތެރެއިންނާއި ދިވެހި ދައުލަތުގެ ތެރެއިންނާއި ރައްޔިތުންގެ ތެރެއިންވެސް ފެންނަމުންދާ ކަމަށެވެ. 

މޮސްޓާ އިތުރަށް ވިދާޅުވީ، ރާއްޖޭގައި އެންމެ ގިނަ ޖަރީމާތައް ހިންގާފައި ހުރީ ރާ ބޮއިގެން ކަމަށާ، އެހެން ނަމަވެސް އެކަން ހުއްޓުވައި އެކަމަށް ފިޔަވަޅު އަޅަން މަޖިލީހުން ވެސް މަސައްކަތް ކޮށްފައި ނުވާ ކަމަށެވެ. އެހެންނަމަވެސް އެކަންކަންވެސް ހުއްޓުވަން ޖެހޭ ކަމަށް މޮސްޓާ ވިދާޅުވި އެވެ.