މިއަހަރު ބޭއްވޭ ރިޔާސީ އިންތިޚާބުގައި ޖުމްހޫރީ ޕާޓީ (ޖޭޕީ)ގެ ޓިކެޓުގައި ވާދަކުރުމަށް އެ ޕާޓީގެ ލީޑަރު އަދި ރައްޔިތުން މަޖިލީހުގެ މާމިގިލި ދާއިރާގެ މެމްބަރު ޤާސިމް އިބްރާހިމް ނިންމަވާފިއެވެ.

އެގޮތުން އެޕާޓީއިން ދާދި ދެންމެއަކު އާންމު ކުރި ސިޓީއެއްގައި ޤާސިމް ވަނީ ރިޔާސީ ކެނޑިޑޭޓެއްގައި ހުންނަންޖެހޭ ޝަރުތުތައް ފުރިހަމަވާ އެތައް ބޭފުޅުންނެއް ތިއްބެވި ނަމަވެސް އިންތިޚާބަށް ކުރިމަތިލުމަށް އެ ޕާޓީގެ ރިޔާސީ ޓިކެޓްއަށް އިއުލާނު ކުރެވުނު މުއްދަތުގެ ހަމަވެގެން އަންނަމުން ދިޔައިރު ވެސް އެއްވެސް ބޭފުޅަކު ޕާޓީގެ ޓިކެޓަށް ވާދަ ކުރުމަށް އެދި ހުށަހަޅާފައިނުވާކަމަށް ވިދާޅުވެފައެވެ.

އެހެންކަމުން ޕާޓީގެ ލީޑަރުގެ ހައިސިއްޔަތުން ޕާޓީގެ މެމްބަރުން އެދޭގޮތް ހާސިލުކުރުމަށްޓަކައި އެޕާޓީގެ ފަރާތުން މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ރައީސުލްޖުމްހޫރިއްޔާ ކަމުގެ މަގާމަށް ކުރިމަތިލުމަށް ނިންމާކަމަށް ޤާސިމް ވަނީ ވިދާޅުވެފައެވެ.

ޖޭޕީއަކީ ސަރުކާރާއިއެކު ކޯލިޝަން ހަދާފައިވާ ޕާޓީއެއް ކަމުގައި ވީނަމަވެސް މިއަހަރުގެ ރިޔާސީ އިންތިޚާބަށް ޖޭޕީ ނިކުންނާނީ އެ ޕާޓީ އިސްވެ ހަދާ ކޯލިޝަންއަކުން މީގެ ކުރިން ވަނީ ނިންމާފައެވެ. އަދި ޖޭޕީއާއިއެކު ކޯލިޝަން ހެދުމަށް އެހެން ޕާޓީތަކަށް ވަނީ ހުޅުވާލައިފައެވެ.

އެގޮތުން ޖޭޕީއިން ނެރޭ ކެނޑިޑޭޓަށް ތާއީދު ކުރާނެ ކަމަށް ރޭ ރައީސް ނަޝީދުގެ "ފިކުރެއްގެ ދިރުން" ފެކްޝަން އިން ވަނީ ޖޭޕީއާއިއެކު ބޭއްވި ބައްދަލުވުމަށްފަހު ނިންމާފައެވެ. އަދި ރަސްމީކޮށް ޖޭޕީއާއިއެކު ކޯލިޝަން ހެދުމުގެ މަސައްކަތް ފަށާފައިވާ ކަމަށް ބުނެފައިވާއިރުު މެނިފެސްޓޯއެއް އެކުލަވާލުމަށް ވެސް ދެފަރާތުން ވަނީ އެއްބަސްވެފައެވެ.