ޖުމްހޫރީ ޕާޓީ (ޖޭޕީ)ގެ ލީޑަރު، އަދި މާމިގިލީ ދާއިރާގެ މެންބަރު ގާސިމް އިބްރާހީމްގެ އެޑްވައިޒަރުގެ މަޤާމުން، އެމްޓީސީސީގެ ސީއީއޯ އާދަމް އާޒިމް އިސްތިއުފާ ދެއްވައިފި އެވެ. 

ގާސިމްގެ އެޑްވައިޒަރުގެ މަގާމުން އިސްތިއުފާ ދެއްވިކަން އަންގައި އާޒިމް ފޮނުވި ސިޓީގައި އާޒިމް ވިދާޅުވީ، އެ މަގާމުން އިސްތިއުފާ ދެއްވަން ނިންމެވީ ރިޔާސީ ދެވަނަ ދައުރަކަށް ރައީސް އިބްރާހީމް މުހައްމަދު ސާލިހް އިންތިހާބު ކުރުމަށް ތާއީދު ކުރައްވާތީ ކަމަށެވެ. 

އަދި ރައީސް ޞާލިހަށް ތާއީދު ކުރައްވަން ނިންމެވީ އެއީ މިވަގުތު ރާއްޖެއާއި ރާއްޖޭގެ ރައްޔިތުންގެ މުސްތަގުބަލަށް އެންމެ ފައިދާ ކުރާނެ ގޮތް ކަމުގައި ދެކެވޭތީ ކަމަށާ، ގައުމުގެ ހަމަ ޖެހުން ދެމެހެއްޓެވޭނެ ވެރިއަކީ އެމަނިކުފާނު ކަމަށް ދެކެވޭތީ ކަމަށެވެ. 

Advertisement

"2023 ވަނަ އަހަރުގެ ރިޔާސީ އިންތިހާބުގައި ޖުމްހޫރީ ޕާޓީން ރިޔާސީ ކެންޑިޑޭޓެއް ނެރެ، ޖުމްހޫރީ ޕާޓީން އިސްވެ އޮވެ ކޯލިޝަން ހެދުމަށް ޖުމްހޫރީ ޕާޓީން ނިންމުމާއި ގުޅިގެން، މަނިކުފާނުގެ (ގާސިމްގެ) އެޑްވައިޒަރުގެ މަގާމުގައި މިވަގުތު ހުރުމަކީ އެންމެ ރަނގަޅު ގޮތް ކަމަށް ގަބޫލު ނުކުރާތީ، އެ މަގާމުން މިއަދުން ފެށިގެން އަޅުގަނޑު އިސްތިއުފާ ދީފީމެވެ." އާޒިމް، ގާސިމްގެ އެޑްވައިޒަރުގެ މަގާމުން އިސްތިއުފާ ދެއްވިކަން އަންގައި ފޮނުއްވި ސިޓީގައި ލިޔުއްވާފައިވެއެވެ. 

މީގެ އިތުރުން އާޒިމް ވަނީ ފާއިތުވި އަހަރު ތަކުގެ ތެރޭގައި ގާސިމް ބޭއްްވި ގާތް ކަމަށާއި ކުރެއްވި އިތުބާރަށް ވެސް ޝުކުރު އަދާކުރައްވާފައެވެ. 

އާޒިމްގެ އިތުރުން ވެސް، ޖުމްހޫރީ ޕާޓީގެ މެންބަރުންގެ ތެރެއިން ސަރުކާރުގެ މަގާމުތަކާއި، ސަރުކާރު ހިއްސާވާ ކުންފުނިތަކުގެ މަގާމުތަކުގައި ތިއްބެވި ބައެއް ޖުމްހޫރީ ޕާޓީގެ މެންބަރުން ވަނީ އެ ޕާޓީން އިސްތިއުފާ ދެއްވައި ރައީސް އިބްރާހިމް މުހައްމަދަށް ތާއީދު ކުރައްވާކަން ހާމަކުރައްވާފައެވެ. އޭގެ ތެރޭގައި ރައީސް އޮފީހުގެ މިނިސްޓަރު އަހުމަދު ސަމީރާއި، އިމިގްރޭޝަން ކޮންޓްރޯލަރ މުޙައްމަދު އަޙްމަދު ޙުސައިން (ހަނަފީ) ހިމެނެއެވެ.