މިއަހަރުގެ ރިޔާސީ އިންތިހާބުގެ ކާމިޔާބު ކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވަމުން ގެންދެވި އެންމެ ބޮޑު ވައުދު ކަމުގައިވާ ކޯލިޝަން ހެދުމުގެ ވައުދު ފްލޮޕް ވެފައިވާ ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ(އިންތި) ވިދާޅުވެއްޖެއެވެ.

އިންތި މިފަދައިން ވިދާޅުވީ ރާއްޖޭގެ ސިޔާސީ ޕާޓީތަކުގެ ތެރެއިން ތިންވަނަ އަށް އެންމެ ބޮޑު ޕާޓީ އަދި ސަރުކާރުގެ ކޯލިޝަނުގެ މެންބަރެއް ކަމުގައިވާ ޖުމްހޫރީ ޕާޓީގެ ލީޑަރު ގާސިމް އިބްރާހިމް ރިޔާސީ އިންތިހާބުގައި ވާދަކުރައްވަން އިއުލާން ކުރެއްވުމާއި ގުޅިގެން ކުރެއްވި ޓުވީޓެއްގައެވެ. 

އިންތި ވިދާޅުވީ ރައީސް ޞާލިހުގެ ބޮޑު ވައުދުކަމުގައިވާ ކޯލިޝަން ހެދޭނޭކަމުގެ ވައުދު މިހާރު ފްލޮޕް ވެފައިވާ ކަމަށެވެ. 

Advertisement

"ދެން އޮތް ގޮތަކީ މުސާރަވެރިންކޮޅު ގެއްލިދިޔަ ނުދިނުމަށް އަނގައިން ހިފެހެއްޓުން." އިންތި ވިދާޅުވި އެވެ. 

ރައީސް ޞާލިހާއިއެކު ކޯލިޝަން ހެއްދެވުމަށް ދަޢުވަތު ދެއްވި ޕާޓީތަކުގެ ތެރެއިން ކޯލިޝަން ހަދާނެކަން އިޢުލާން ކޮށްފައިވަނީ އެންމެ ދެ ޕާޓީންނެވެ. އެއީ އަދާލަތު ޕާޓީ އަދި އެމްޑީއޭއެވެ.

އަދުގެ ސަރުކާރުގެ ކޯލިޝަންގައި ހިމެނޭ އެމްއާރްއެމް އިން އަދި ވަކި ގޮތެއް ނުނިންމާއިރު ޖޭޕީން ވާދަކުރަނީ ވަކިންނެވެ. 

މީގެ އިތުރުން ރިޔާސީ ޕްރައިމަރީއަށްފަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ރައީސް ޞާލިހަށް ތާއީދު ނުކުރައްވަން ނިންމަވައި، "ފިކުރެއްގެ ދިރުން"ގެ ނަމުގައި ވަކި ހަރަކާތެއް ފަށްޓަވައިފަ އެވެ. އެ ގޮފީގެ މެންބަރުންވެސް ރައީސް ޞާލިހަށް ތާއީދު ކުރެއްވުމުގެ ބަދަލުގައި އަންނަނީ ޖުމްހޫރީ ޕާޓީއާ އެކު މަޝްވަރާތައް ބާއްވަމުންނެވެ.