އެމްޑީޕީގެ ރައީސްގެ މަޤާމު މުޙައްމަދު ނަޝީދު ގިނަ ދުވަސްތަކެއް ވަންދެން ފުރުއްވާފައިވާއިރު ވެރިކަން ކުރައްވަން ލިބިވަޑައިގެންނެވި ފުރުސަތުގައި 3 އަހަރުވެސް ހިފަހައްޓާ ނުލެވުނުކަމަށް މަޖިލީހުގެ ކޮމަންޑޫ ދާއިރާގެ މެމްބަރު މުޙައްމަދު ރާޝިދު ވިދާޅުވެއްޖެ އެވެ.
ރާޝިދު މިފަދައިން ވިދާޅުވެފައިވަނީ ރައީސް ނަޝީދާއި އެމަނިކުފާނުގެ "ފިކުރެއްގެ ދިރުން" ގޮފީގެ ބޭފުޅުންނަށް ފާޑުވިދާޅުވެ ކުރެއްވި ޓްވީޓެއްގަ އެވެ.
ރައީސް ނަޝީދާއި އެމަނިކުފާނަށް ތާއީދު ކުރައްވާ ފަރާތްތައް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއި އެމަނިކުފާނަށް ތާއީދުކުރައްވާ ފަރާތްތަކަށް އެކި ވަރުގެ ފާޑުކިޔުންތައް އަމާޒުކޮށް، އެ ފަރާތްތަކުގެ އަބުރު ކަތިލުމަށް ތަފާތު ވާހަކަތައް ދައްކަވަމުންދަނީ އެމްޑީޕީގެ ރިޔާސީ ޕްރައިމަރީން ބަލިވުމުން ކަމަށް ރާޝިދުގެ ޓްވީޓުގައި ވިދާޅުވި އެވެ.
ނަޝީދު ބޭނުންފުޅުވަނީ ތާއަބަދު ބޮޑުކަން މަތީގައި ހުންނެވުމަށް ކަމަށެވެ. އެމަނިކުފާނު ބޭނުންފުޅު ނުވާގޮތަށް ޕާޓީގެ ކަންކަން ތަރުތީބުވާން ފެށުމުން އެކަން ހަޖަމުކުރަން ދަތިފުޅުވެގެން އުޅުއްވާކަމަށް އިޝާރާތް ކުރައްވާ ރާޝީދު ވިދާޅުވީ ރައީސް ނަޝީދަކީ ބޮޑުކަން ބޭނުންފުޅުވިޔަސް ވެރިކަމުގެ ދައުރެއް ފުރުހަމަ ކުރަންވެސް އެނގިވަޑައި ނުގެން ބޭފުޅެއް ކަމަށެވެ.
"އެންމެ ބޮޑު ޕާޓީގެ ރައީސްކަން 18 އަހަރު ކުރިއިރު ވެރިކަން ކޮށްލަން 3 އަހަރުވެސް ނޭނގުނު. ނުވިތާކަށް މިއަދު ޕާޓީވެސް ގެއްލިއްޖެ. ހައްތަހާވެސް މީ އަމިއްލަ އެދުމާހެދި ވާ ގޮތް"
ކޮމަންޑޫ ދާއިރާގެ މެމްބަރު މުޙައްމަދު ރާޝިދު
ރާޝިދު އިތުރަށް ވިދާޅުވީ ބޮޑުކަން ނުލިބޭ ކޮންމެ ފަހަރަކީ އަދި ތިމާ ނުރުހޭ މީހުންގެ ބޮލުގައި ބޮޑެތި އިލްޒާމުތައް އަޅުވަން ޖެހޭ ސަބަބެއް ނޫން ކަމަށެވެ.
ރާޝިދުގެ އެ ޓްވީޓުގައި ވަނީ ނަޝީދު ފެކްޝަނުން ހިންގާކަމަށް ތުހުމަތުކުރެވޭ ޓްވީޓާ އެކައުންޓަކުން މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމްގެ ބޮލުގައި އިލްޒާމުތައް އަޅުވާފައިވާ ޓްވީޓެއް ހިއްސާ ކުރައްވާފަ އެވެ. އަދި އެފަދައިން މީހުންގެ ބޮލުގައި އިލްޒާމުތައް އެޅުވުން ރާޝިދު ވަނީ ކުށްވެރި ކުރައްވާފަ އެވެ.
Advertisement
This content is created and paid for by advertisers and does not involve Voice Journalists
