ކުރިއަށް އޮތް ރިޔާސީ އިންތިޚާބުގައި ވާދަކުރާނެކަން ރަސްމީކޮށް ޢިއުލާނުކޮށްފައިވާ ޖުމްޙޫރީ ޕާޓީން އެ ޕާޓީއާއެކު ކޯލިޝަން ހެދުމަށް ވާދަވެރި ސިޔާސީ ޕާޓީ ޕީޕީއެމް އާއި އިތުރު ދެޕާޓީއަށް ދައުވަތު ދީފި އެވެ.
ކުރިއަށް އޮތް ރިޔާސީ އިންތިޚާބުގައި ޖުމްޙޫރީ ޕާޓީގެ ލީޑަރު ޤާސިމް އިބްރާހިމް ވާދަކުރައއްވާނެކަން އިއުލާނު ކުރުމާއެކު އެ ޕާޓީން ވަނީ ޖޭޕީއަށް ވެރިކަން ހޯދުމަށް އެ ޕާޓީއާއެކު ކޯލިޝަން ހެދުމާއި ގުޅިގެން މަޝްވަރާތައް ފަށާފައެވެ.
އެގޮތުން އެމްޑީޕީގެ ރައީސް މުހައްމަދު ނަޝީދު ޕާޓީގެ ތެރެއިން އުފައްދަވައިގެން އުޅުއްވާ "ފިކުރެއްގެ ދިރުން" ގޮތްޕާއި އެކު ގިނަ މަޝްވަރާތަކެއް ޖޭޕީން ވަނީ ކޮށްފައެވެ. އަދި ޕީޕީއެމް ހިމެނޭހެން 3 ޕާޓީއަކަށް ޖޭޕީން ވަނީ ޖޭޕީ އިސްވެ އޮވެ ހިންގާ ކޯލިޝަންގައި ބައިވެރިވުމަށް ދައުވަތުދީފަ އެވެ.
ޕީޕީއެމްގެ އިތުރުން ދެން ޖޭޕީން ދައުވަތު ދީފައިވަނީ މަޖިލިހުގެ ދަނގެތި ދާއިރާގެ މެމްބަރުގެ ޕާޓީ މޯލްޑިވްސް ނެޝަނަލް ޕާޓީ (އެމްއެންޕީ) އާއި ކުރީގެ ރައީސް މައުމޫން އަބްދުއްގަޔޫމުގެ މޯލްޑިވސް ރިފޯމް މޫވްމަންޓު (އެމް.އާރު.އެމް) އެވެ.
ޖޭޕީން ކޯލިޝަން ހަދަން ދައުވަތު އެރުވި ޕާޓީތަކުގެ ތެރޭގައި އެމްއާރުއެމް ނޫން އެހެން ސިޔާސީ ޕާޓީތަކަކީ ރިޔާސީ އިންތިޚާބުގައި ވާދަކުރާނެކަން އިއުލާނުކޮށްފައިވާ ޕާޓީތަކެވެ.
އެގޮތުން ޕީޕީއެމްގެ ފަރާތުން އެ ޕާޓީގެ ރައީސް އަބްދުالله ޔާމީން އަބްދުލްގައްޔޫމު ވާދަކުރައްވާނެކަން ވަނީ އިއުލާނުކޮށްފަ އެވެ. އަދި ޕާޓީގެ ފަރާތުންވަނީ ރަސްމީކޮށް އެމަނިކުފާނަށް ރިޔާސީ ޓިކެޓުވެސް ހަވާލުކުރައްވާފަ އެވެ.
ޖޭޕީގެ އެ ހުށައެޅުމާއި ގުޅިގެން އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ، ޕީޕީއެމުން ރިޔާސީ އިންތިޚާބުގައި އެހެން އެއްވެސް ސިޔާސީ ޕާޓީއެއްގެ ފަހަތައް ނާރާނެ ކަމަށެވެ. އެ ޕާޓީގެ ކެންޑިޑޭޓަކީ ރައީސް ޔާމީން ކަމަށާއި، އެމަނިކުފާނު އިންތިޚާބު ކާމިޔާބުކުރައްވާނެކަމުގެ ޔަގީންކަން އޮތްކަމަށް އަބްދުއްރަހީމް ވިދާޅުވި އެވެ.
ޖުމްހޫރީ ޕާޓީގައި ހުންނެވުމަށްފަހު ނިކުމެވަޑައިގެން އަމިއްލަ ފުޅު ޕާޓީއެއް އުފެއްދެވި ނާޒިމަކީވެސް ރިޔާސީ ރޭހުގައި ވާދަކުރެއްވުމަށް ނިކުމެވަޑައިގެން ހުންނެވި ބޭފުޅެއްކަން ފާހަގަކޮށްލެވެއެވެ.
އެހެން ނަމަވެސް ޖޭޕީއާއެކު ކޯލިޝަން ހެދުމާއި ގުޅޭގޮތުން އެމްއެންޕީ އަދި އެމްއާރުއެމުންވެސް އަދި މިހާތަނަށް ވަކިއެއްޗެއް ބުނެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
