ކުރިއަށް އޮތް ރިޔާސީ އިންތިޚާބުގައި ޖުމްޙޫރީ ޕާޓީއާއެކު ކޯލިޝަން ހެދުމަށް ދިން ދަޢުވަތު މޯލްޑިވްސް ނެޝަނަލް ޕާޓީ އެމްއެންޕީން އަދި އަމިއްލަ ގޮތުން އިންތިޚާބުގައި ވާދަކުރައްވާ އުމަރު ނަސީރު ޤަބޫލު ނުކުރައްވާނެކަމަށް ވިދާޅުވެއްޖެ އެވެ. 

ޖުމްޙޫރީ ޕާޓީގެ ލީޑަރު ޤާސިމް އިބްރާހީމަކީ އެ ޕާޓީގެ ރިޔާސީ ކެންޑިޑޭޓުކަމަށް ކަނޑައެޅި ހިސާބުން ޖޭޕީން ވަނީ އެޕާޓީ އިސްވެ އޮވެ ހިންގާ ކޯލިޝަނެއް ހެދުމަށް ސިޔާސީ ޕާޓީތަކަށް ދަޢުވަތު ފޮނުވާފައެވެ. އެ ޕާތީތަކުގެ ތެރޭގައި ޕީޕީއެމާއި އެމްއެންޕީ އަދި އެމްއާރުއެމް ވެސް ހިމެނެއެވެ. 

ޖޭޕީގެ ދަޢުވަތާއި ގުޅިގެން އެމްއެންޕީން ނެރުނު ބަޔާނުގައި ބުނެފައިވަނީ ޖުމުހޫރީ ޕާޓީ އިސްވެއޮވެ މަސައްކަތްކުރާ ގޮތަށް، އެޕާޓީއިން ސިޔާސީ ޕާޓީތަކަށް ފޮނުއްވި ދައުވަތު މޯލްޑިވްސް ނެޝަނަލް ޕާޓީއަށް 3 އޭޕްރީލް 2023 ގައި ލިބުމުން، އެ ދަޢުވަތު ރަގަޅަށް ކިރާ ވަޒަންކުރުމަށްފަހު އެޕާޓީއިން ނިންމާފައިވަނީ އެހެން ޕާޓީއަކުން އިސްވެ އޮންނަ ކޯލިޝަނެއްގައި ރިޔާސީ އިންތިޚާބުގެ ފުރަތަމަ ބުރުގައި ބައިވެރި ނުވުމަށް ކަމަށެވެ.

Advertisement

އެފަދައިން އެ ޕާޓީން ނިންމާފައިވަނީ ޖޭޕީގެ ދައުވަތު ލިބުމުން އެ ޕާޓީގެ އެގްޒެކެޓިވް ކޮމެޓީއަށް އެކަން ހުށައަޅާ މަޝްވަރާކުރުމަށް ފަހު ކޮމެޓީން އެގޮތަށް ފާސްކުރުމުންކަމަށް އެމްއެންޕީން ވަނީ ހާމަކޮށްފަ އެވެ. 

ޖުމްހޫރީ ޕާޓީގެ އެ ހުށައެޅުން ޤަބޫލުކުރުމަކީ އެޕާޓީގެ އަސާސީ ޤަވާޢިދުގައި ކަނޑައަޅާފައިވާ ޝަޚްސީ މަޤުޞަދު ގެއްލޭނެ ޢަމަލަކަށްވުމުގެ އިތުރުން، އެދައުވަތު ޤަބޫލުކުރުމަކީ ކުރިޔަށްއޮތް ރިޔާސީ އިންތިޚާބުގައި އެޕާޓީގެ ކެންޑިޑޭޓަކު ކުރިމަތިލާނެ ކަމަށް ކެނޑިނޭޅި ރައްޔިތުންނަށް ދެމުންދިޔަ ޔަޤީންކަން ގެއްލިގެންދާނެ ކަމެއްކަން އެމްއެންޕީގެ ބަޔާނުގައި ފާހަގަކޮށްފައި ވެއެވެ. 

އެމްއެންޕީގެ އިތުރުން އަމިއްލަގޮތުން ވާދަކުރައްވާ އުމަރު ނަސީރުވެސް ވަނީ ޖޭޕީގެ ފަހަތަށް އަރާވަޑައިނުގަންނަވާނެ ކަމަށް ވިދާޅުވެފަ އެވެ. 

އެގޮތުން އުމަރު ނަސީރު ވިދާޅުވީ ކޯލިޝަން ހެދުމަށް ޖޭޕީން ދަޢުވަތު ދިން ނަމަވެސް އެ ދަޢުވަތު ޤަބޫލުކޮށް އެ ޕާޓީގެ ފަހަތަށް އަރާވަޑައިނުގަންނަވާނެ ކަމަށެވެ. އޭނާ އަކީ ފޮލޯވަރެއް ނޫން ކަމަށާއި، ލީޑަރެއްކަމަށް އުމަރު ނަސީރު ވިދާޅުވި އެވެ. 

ވާދަވެރި ސިޔާސީ ޕާޓީ ޕީޕީއެމުން ވެސް ވަނީ އެހެން އެއްވެސް ސިޔާސީ ޕާޓީއެއްގެ ކެންޑިޑޭޓަށް ތާއީދު ނުކުރާނެކަމަށް ބުނެފައެވެ. އަދި ޤައުމަށް ހެޔޮއެދިވަޑައިގަންނަވާ ފަރާތްތައް ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ފަހަތްޕުޅަށް އަރާވަޑައިގަތުމަށް އެދިލައްވާފަ އެވެ. 

ޖުމްހޫރީ ޕާޓީން ރިޔާސީ ރޭހަށް ނިކުންނައިރު، އެ ޕާޓީއާއި ގުޅޭނެ ފަރާތްތައް ހޯދަމުންދާއިރު، އަދި މާބޮޑު އުންމީދީ ޖަވާބުތަކެއް ލިބެމުން ނުދާކަން ފާހަގަކޮށްލެވެއެވެ. އެހެން ނަމަވެސް ޖޭޕީއާއެކު ކޯލިޝަން ހެދުމާއި ގުޅޭގޮތުން ކުރީގެ ރައީސް މައުމޫނު އަބްދުލްގައްޔޫމުގެ ސިޔާސީ ޕާޓީން އަދި ވަކި ގޮތެއް ނިންމާފައެއް ނުވެއެވެ.