ރާއްޖޭގައި ހަރަކާތްތެރި ވަމުންދާ ބޭރުގެ ސިފައިން ރާއްޖެއިން ބޭލުމަށް ގޮވާލާ ދިވެހިންނާމެދު އިހާނެތިކޮށް ކަންތައް ކުރާ މައްސަލައަށް ޖަވާބު ދެއްވަން ޑިފެންސް މިނިސްޓަރ މާރިޔާ ދީދީ ދެކޮޅުހައްދަވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ނައިފަރު ދާއިރާގެ މެންބަރު އަޙްމަދު ޝިޔާމު ކުރެއްވި ސުވާލަކީ، ރާއްޖޭގައި ތިބި ބޭރު ސިފައިން ރާއްޖެއިން ބޭލުމަށް ގޮވާލާ ދިވެހިންނާމެދު އިހާނެތިކޮށް ކަންކުރުމަކީ ޑިފެންސް މިނިސްޓަރުގެ ހައިސިއްޔަތުން މާރިޔާ އަޙްމަދު ދީދީ ތާއީދުކުރައްވާ ކަމެއްތޯ އާއި ދިފާއީ ބާރުގައި ޚިދުމަތްކުރައްވައި ޝަރަފުވެރިކަމާއެކު ރިޓަޔާކުރައްވާފައިވާ ބޭފުޅުންނަށް ކުޑައިމީސްކުރުމަކީ މާރިޔާ މަޢާފަށް އެދިވަޑައިގަންނަވަންޖެހޭ ކަމެއްތޯއެވެ.

ޖަވާބުގައި މާރިޔާ ވިދާޅުވީ އެ ސުވާލަކީ އޭނާއާ ކުރެވޭނެ ސުވާލެއް ނޫންކަމަށެވެ.

މިނިސްޓަރިންނާ ސުވާލުކުރުމުގެ ޤާނޫނުގައި ބަޔާންކޮށްފައިވާ ގޮތުން، އެ ބޭފުޅުންނާ ސުވާލުކުރެވޭނީ ރަސްމީ ހައިސިއްޔަތުގެ ދާއިރާގެ ތެރެއިން ކުރައްވާ ކަންކަމާ ގުޅިގެން ކަން ފާހަގަ ކުރައްވަމުން މާރިޔާ ވިދާޅުވީ ޑިފެންސް މިނިސްޓަރުގެ ހައިސިއްޔަތުން އެފަދަ އެއްވެސް ކަމެއް ކޮށްފައި ނުވާނެ ކަމަށެވެ.

މީގެ އިތުރުން ޝިޔާމް ވަނީ މާލޭގައި ބޮމެއް ގޮއްވައި، އެ މައުލޫމާތު ލިބި ރައްޔިތުންނަށް ރައްކާތެރިކަން ކަށަވަރުނުވުމަކީ ފެއިލްވުންކަމަށް ގަބޫލުނުކުރައްވަންތޯ ސުވާލު ކުރައްވާފަ އެވެ.

ޝިޔާމްގެ ސުވާލުގެ ޖަވާބުގައި މާރިޔާ ވިދާޅުވީ އެކަމުގައި އޭނާގެ އެއްވެސް ފެއިލިއާއެއް ހިމެނޭކަމަށް ގަބޫލު ނުކުރައްވާ ކަމަށެވެ.

"އަޅުގަނޑު ފެއިލްވި ކަމަށް، އަޅުގަނޑު ގަބޫލުކުރޭތޯ އެހެން އައްސަވާފައިވާތީ އަޅުގަނޑު ދަންނަވަން، އަޅުގަނޑު ވަރަށް ސާފުކޮށް މި ދަންނަވަނީ އަޅުގަނޑު ގަބޫލެއް ނުކުރަން،" 

މާރިޔާ އިތުރަށް ވިދާޅުވީ އެއްވެސް ވަޒީރަކު ކުރާ ކަމެއް ނުވަތަ ނުކޮށް ދޫކޮށްލާ ކަމަކުން މަޖިލީހުގެ އެއްވެސް މެންބަރަކަށް އެ ވަޒީރަކު ފެއިލްވީ ކަމަށް ގަބޫލުކުރެވޭނަމަ އެ ވަޒީރަކަށް ފިޔަވަޅު އެޅުމުގެ އިހުތިޔާރު ގާނޫނު އަސާސީ އާއި ގާނޫނުން ލިބޭ ކަމަށް ގަބޫލުކުރައްވާ ކަމަށެވެ.

ނަޝީދަށް ހަމަލާދިނީ ގެއިން ނުކުމެވަޑައިގެން ކާރަށް އަރާވަޑައިގަންނަވަން އުޅުއްވަނިކޮށެވެ. ދުރާލާ ރާވައި، ގިނަ ދުވަސްތަކެއް ވަންދެން ނަޝީދަށް ފާރަލުމަށް ފަހު ދިން އެ ހަމަލާގެ އެއްވެސް އިންޓެލިޖެންސް މައުލޫމާތެއް ނުލިބޭކަމަށް ގައުމީ ދިފާއީ ބާރުންނާއި ފުލުހުން ވެސް ވަނީ ބުނެފަ އެވެ. އެ މައުލޫމާތު ޑިފެންސް މިނިސްޓްރީއަށް ލިބިފައި ނެތުމަކީ އިންޓެލިޖެންސް ފެއިލިއާއެއްކަން ފާހަގަކޮށް ގިނަ ބަޔަކު މާރިޔާގެ އިސްތިއުފާއަށް ވެސް ގޮވާލި އެވެ.