ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީއާއެކު ކޯލިޝަން ހެދުމުގެ ދައުވަތު، މޯލްޑިވްސް ތާރޑްވޭ ޑިމޮކްރަޓިކް ޕާޓީ (އެމްޓީޑީ) އަށްވެސް ފޮނުވައިފިއެވެ. އެމްޓީޑީއަކީ އެމްއެމްޕީއާރުސީގެ ޚިޔާނާތުގެ މައްސަލައިގައި ހުކުމް ތަންފީޒު ކުރައްވަމުން ގެންދަވާ، ކުރީގެ ނާއިބު ރައީސް އަހުމަދު އަދީބު ރައީސް ކަން ކުރައްވާ ޕާޓީއެވެ. 

ޖޭޕީގެ ލީޑަރު ޤާސިމް އިބްރާހިމް ސޮއި ކުރައްވައި ފޮނުއްވި އެސިޓީގައި ވަނީ 2023ގެ ރިޔާސީ އިންތިހާބު ކާމިޔާބު ކުރުމަށް ޖުމްހޫރީ ޕާޓީއިން ކުރަމުންދާ މަސައްކަތުގައި، ގިނަ ބައެއްގެ ބައިވެރިވުން ބޭނުންވާ ކަމަށާ އެހެން ކަމުން އެކަމާއި ގުޅިގެން އެމްޓީޑީ މަސްވަރާ ކުރެއްވުމަށް ބޭނުންވާ ކަމަށެވެ. 

ޖުމްޙޫރީ ޕާޓީގެ ލީޑަރު ޤާސިމް އިބްރާހީމަކީ އެ ޕާޓީގެ ރިޔާސީ ކެންޑިޑޭޓުކަމަށް ކަނޑައެޅި ހިސާބުން ޖޭޕީން ވަނީ އެޕާޓީ އިސްވެ އޮވެ ހިންގާ ކޯލިޝަނެއް ހެދުމަށް ސިޔާސީ ޕާޓީތަކަށް ދަޢުވަތު ފޮނުވާފައެވެ. އެގޮތުން ޕީޕީއެމާއި އެމްއެންޕީ އަދި އެމްއާރުއެމް އަށް ވެސް ވަނީ ދައުވަތު އަރުވާފައެވެ. 

Advertisement

ނަމަވެސް، ޕީޕީއެމާއި އެމްއެންޕީންވެސް ޖޭޕީގެ ދައުވަތު ގަބޫލު ކޮށްފައެއް ނުވާއިރު ކޯލިޝަން ހެދުމާއި ގުޅޭގޮތުން އެމްއާރްއެމް އިން އަދި ވަކި ގޮތެއް ނިންމާފައެއް ނުވެއެވެ.