ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ރަސްމީ ދަތުރުފުޅެއްގައި އެމެރިކާގެ ވޮޝިންގޓަނަށް ފުރާވަޑައިގެންފިއެވެ.

މިކަން ހާމަކޮށް ރައްޔިތުން މަޖްލީހުގެ އިދާރާއިން ނެރުން ބަޔާނެއްގައި ބުނެފައިވަނީ މިމަހުގެ 12 އިން 17 އަށް ރައީސް ނަޝީދު ކުރައްވާ މި ދަތުރުފުޅަކީ އިންޓަރނޭޝަނަލް މަނިޓަރީ ފަންޑް (އައިއެމްއެފް) އާއި ކްލައިމެޓް ވަލްނަރަބަލް ފޯރަމާއި ގުޅިގެން ބާއްވާ ވަލްނަރަބަލް 20 (ވީ 20) ގެ މާލީ ވަޒީރުންގެ 10 ވަނަ ބައްދަލުވުމުގައި ބައިވެރިވެ ވަޑައިގަތުމަށް ކުރައްވާ ދަތުރުފުޅެއް ކަމަށެވެ.

އެގޮތުން މި ބައްދަލުވުމުގައި ބައިވެރިވެ ވަޑައިގަތުމަށް، ވީ 20 ގްރޫޕްގެ ރިޔާސަތު ބަލަހައްޓަވާ ގާނާގެ މިނިސްޓަރ ފޮރ ފިނޭންސް އެންޑް އިކޮނޮމިކް ޕްލޭނިންގ، ކެނެތް އޮފޯރި-އަޓާ ޚާއްސަ ދައުވަތުގެ ސިޓީފުލެއް ރައީސް ނަޝީދަށް ފޮނުއްވާފައިވާ ކަމަށް ބަޔާނުގައި ބުނެފައިވެއެވެ.

Advertisement

މިއާއިއެކު ރައީސް ނަޝީދުގެ މި ދަތުރުފުޅުގެ ހުރިހާ ޚަރަދެއް ބަލަހައްޓާނީ ކްލައިމެޓް ވަލްނަރަބަލް ފޯރަމް (ސީވީއެފް) އިން ކަމަށްވެސް މަޖިލީހުގެ އިދާރާއިން ބުނެފައިވެއެވެ.

މި ބައްދަލުވުމުގެ މި ފަހަރުގެ ޝިއާރަކީ "ފްރޮމް އަކްޓާ ޓު މަރަކެޝް: އެޑްވޮކޭޓިންގ ފިޓް-ފޯރ-ކްލައިމެޓް ފައިނޭންޝަލް އާކިޓެކްޗަރ އެންޑް ޑިވެލޮޕްމަންޓް-ޕޮޒިޓިވް ކްލައިމެޓް އެކްޝަން." އެވެ.

މީގެ އިތުރުން ރައްޔިތުން މަޖްލީހުގެ ރައީސްގެ ދަތުރުފުޅުގައި އައިއެމްއެފް އާއި ވާރލްޑް ބެންކް އަދި ސީވީއެފް ގެ އިސްވެރިންނާއި ބައްދަލުކުރެއްވުމަށް ހަމަޖެހިފައިވާ ކަމަށްވެސް ބަޔާނުގައި ބުނެފައިވެއެވެ.