ވައިގެ މަގުން އިތިއޯޕިއާއިން ރާއްޖެއައި އިންޑިއާގެ ފަސިންޖަރެއްގެ ލަގެޖުން މަސްތުވާތަކެތި އަތުލައިގެންފިއެވެ.
މިކަމާއި ގުޅިގެން ކަސްޓަމްސްއިން ނެރުން ބަޔާނެއްގައި ބުނެފައިވަނީ މި ތަކެތި އަތުލައިގަނެފައިވަނީ ވައިގެ މަގުން ގިނަ އަދަދެއްގެ މަސްތުވާތަކެތި ރާއްޖެއަށް އެތެރެކޮށްފާނެކަމަށް ކަސްޓަމްސްއަށް ލިބުނު އިންޓެލިޖެންސް މައުލޫމާތަކަާ ގުޅިގެން ކަމަށެވެ.
އެގޮތުން މިމައުލޫމާތާއި ގުޅިގެން އިއްޔެ އިތިއޯޕިއާ އިން ރާއްޖެއައި އިންޑިއާގެ އުމުރުން 56 އަހަރުގެ އަންހެން ފަސިންޖަރަކު ހުއްޓުވައި، ބަލާފާސްކުރުމުގެ ތެރޭގައި މަސްތުވާތަކެތި ކަމަށް ޝައްކު ކުރެވޭ ތަކެތި ފެނުމުން އެ ތަކެތި ފުރަތަމަ މަރުހަލާގައި ކަސްޓަމްސްއިން ތަހުލީލުކޮށްފައިވާ ކަމަށް ބުނެފައިވެއެވެ.
އަދި މި ތަހުލީލުގައި އަތްދަބަހުން ފެނުނު ތަކެތި މަސްތުވާތަކެތީގެ ބާވަތެއް ކަމަށްވާ 'ކޮކެއިން' އަށް، އަދި ލަގެޖުން ފެނުނު އެކަތި މަސްތުވާތެކެތީގެ ބާވަތެއް ކަމަށްވާ 'ހެރޮއިން' އަށް ޕޮޒިޓިވް ވެފައިވާ ކަމަށް ކަސްޓަމްސްއިން މައުލޫމާތު ދީފައިވެއެވެ.
މިއާއިއެކު މި އަންހެންމީހާގެ އަތްދަބަހާއި ފޮށީގައި ރައްކާކޮށްފައި ހުރި 1.180 ކިލޯ ކޮކެއިން އަދި 4.2 ކިލޯ ހެރޮއިން އާއިއެކު ޖުމްލަ 5.380 ކިލޯގެ މަސްތުވާތަކެތި އަތުލައިގަނެވިފައިވާއިރު، މިތަކެތީގެ މަގުމަތީގެ އަގު 9 މިލިއަން ރުިފޔާއަށްވުރެ މަތިވާނެކަމަށް ކަސްޓަމްސްއިން ލަފާ ކުރެއެވެ.
މީގެ އިތުރުން މި މައްސަލަ އިތުރަށް ތަހްޤީޤު ކުރުމަށްޓަކައި އަންހެން މީހާއާއި އޭނާގެ އަތުން އަތުލައިގަނެވުނު މަސްތުވާތަކެތި މިހާރު ދިވެހި ފުލުހުންގެ ޚިދުމަތާ ހަވާލު ކުރެވިފައިވާ ކަމަށް ކަސްޓަމްސްއިން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
