މިއަދު ބޭއްވުނު ރައްޔިތުން މަޖްލީހުގެ ގުރައިދޫ ދާއިރާގެ ގޮނޑީގެ ބައި-އިލެކްޝަންގައި ފުރަތަމަ ފަހަރަށް އެމްޑީޕީއިން ކާމިޔާބުވުމަކީ އެޕާޓީއަށް ލިބުނު ބޮޑު ކުރިއެރުމެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް މިހެން ވިދާޅުވެފައިވަނީ ބައި-އިލެކްޝަންގައި އެމްޑީޕީގެ ފަރާތުން ވާދަކޮށް ކާމިޔާބު ހޯއްދެވި ޝާޒް އިބްރާހިމްއަށް ހޫނު މަރުހަބާ ދަންނަވަމުން ކުރެއްވި ޓްވީޓެއްގައެވެ.

އެގޮތުން ރައީސް ވިދާޅުވީ މި އިންތިޚާބުން ހާމަވެގެން ދިޔައީ ސަރުކާރާއެކު ދާއިރާގެ ރައްޔިތުން ތިއްބެވިކަމަށެވެ.

އަދި ފުރަތަމަ ފަހަރަށް މިދާއިރާގެ ގޮނޑި އެމްޑީޕީއަށް ކާމިޔާބުވަމަކީ ޕާޓީއަށް ލިބުނު ބޮޑުކުރިއެރުމެއް ކަމަށް ރައީސް ވަނީ ފާހަގަކުރައްވާފައެވެ.

މިއަދު ކުރިއަށް ދިޔަ ބައި-އިލެކްޝަންގެ ވަގުތީ ނަތީޖާ ދައްކާ ގޮތުން އިބްރާހިމް ޝާޒްއަށް ވަނީ ޖުމްލަ 1340 ވޯޓު ލިބިފައެވެ. އަދި ޝާޒްއާއި ވާދަ ކުރި ޕީޕީއެމްގެ ހުސެއިން ރިޒާ 1226 ވޯޓު ލިބިފައިވާއިރު، އެމްއެންޕީގެ ކެނޑިޑޭޓް އާރިފް އަށް ލިބިފައިވަނީ 128 ވޯޓެވެ.

ގުރައިދޫ ދާއިރާގެ ގޮނޑި އެމްޑީޕީން ކާމިޔާބުކޮށްފައިވަނީ ސަރުކާރުން އިންތިޚާބުގެ ތެރެއަށް ވަދެ ވަރަށް ބޮޑަށް ނުފޫޒު ފޯރުވައިގެން ކަމަށް އިދިކޮޅު ކޯލިޝަނުން ދަނީ ތުހުމަތު ކުރަމުންނެވެ. 

އެގޮތުން މިއަދު ވޯޓުލުމަށް ހަމަޖެހިފައިވާ ވަގުތު އެއް ގަޑިއިރު އިތުރުކުރީ އެހިސާބަށް ނަތީޖާތައް ދައްކާގޮތުން އެމްޑީޕީއަށް ކާމިޔާބު ނުކުރެވޭނެކަން ޔަގީން ކުރެވޭތީކަމަށް އިދިކޮޅުން ވަނީ ތުހުމަތުކޮށްފަ އެވެ. އަދި ވަގުތު އިތުރުކުރީ ސަރުކާރުން ނުފޫޒު ފޯރުވައިގެންކަމަށް އީސީގެ ރައީސް ފުއާދު ތައުފީގު ވިދާޅުވިކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވަނީ ވިދާޅުވެފަ އެވެ.