ޒަމާނާއި އެއްވަރަށް މީހުންގެ ދިރިއުޅުމާއި، ދިރިއުޅުމަށް ބިނާ ކުރަމުންދާ ގެދޮރާއި، ކެއިން ބުއިމާއި އަދި އެނޫންވެސް ކަންކަން ބަދަލުވެ، ތަރައްގީވެ، ފަހި ދިރިއުޅުމަކަށް ދިވެހިންވެސް މިސްރާބު ޖަހާފައިވާއިރު، ރާއްޖޭގައި މަދުން ނަމަވެސް، ދަތި ހާލުގައި ދިރިއުޅެމުންދާ ޢާއިލާތައް އެބަތިއްބެވެ. 

ވެހޭ ވާރެއިން ސަލާމަތްވުމަށް އަހަރެމެންގެ ގޭގައި ފުރާޅާއި ސީލިންގް ހުރި ނަމަވެސް، ކާބަފައިންގެ ޒަމާން ފަދައިން، ވާރޭ ވެހުމުން، ގޭފުރާޅު ފޫއްދާލާފައި، މުޅި ގޭތެރެއަށް ފެން އެޅި، ހިފައިގެންގުޅޭ ތަކެއްޗަށް އެކަމުގެ ގެއްލުންވެ އެތަކެއް އުނދަގޫތަކާއި ކުރިމަތިލާންޖެހޭ އާއިލާތައް އަދިވެސް މިރާއްޖޭގައި ދިރިއުޅެއެވެ. 

ހޫނު ގަދަ ދުވަސްތަކުގައި، ދިލަ ހޫނާއި އުދާސްކަމުގައި އެ ޢާއިލާތައް ދިރިއުޅެމުންދާއިރު އަހަރެމެން ފިނި ކޮޓަރީގައި އަރާމު އެނދުގައި ތިބޭ އިރު އެކަމުގެ ހުރި ވޭން އިހްސާސް ނުވެދާނެއެވެ.

އާޓިކަލްގައި ގެނެސްދޭން މިއުޅެނީވެސް އެފަދަ ހާލުގައި ދިރިއުޅެމުންދާ ޢާއިލާއެއްގެ ވާހަކައެވެ. 

މިއީ ލޮލަށް ނުފެންނަ މީހަކަށް ގަބޫލުކުރަންވެސް ދަތި ހާލެއްގައި ހއ. އުލިގަމުގައި ދިރިއުޅެމުންދާ ޢާއިލާއެއްގެ ވާހަކައެވެ. ތިން ކުދިންނާއިއެކު ދެމަފިރިއެއް ހއ. އުލިގަމުގައި ހުންނަ ގެއެއްގައި ދިރިއުޅެމުންދަނީ ހީވެސް ނުކުރާ ފަދަ ދަތި ހާލުގައެވެ. އެ އާއިލާގައި ތިބި ތިން ކުދިންގެ ތެރެއިން އެންމެ ކުޑައީ ތުއްތު އަލްސަން އެވެ. 

އަލްސަންގެ ޢާއިލާ ދިރިއުޅެމުންދާ ގެ. ގޭގެ ބޮޑުބައި ހެދިފައިވަނީ ފަނުންނާއި ޓިނުން--ފޮޓޯ/އެހީ ޖަމިއްޔާ

ދިވެހިރާއްޖޭގައި ހާލުގައި ދިރިއުޅެމުންދާ މިފަދަ އާއިލާތަކަށް އެކި ގޮތްގޮތުން އެހީތެރިކަން ފޯރުކޮށްދެމުން ގެންދާ ޖަމިއްޔާ އެއް ކަމަށްވާ އެހީ ޖަމިއްޔާއިން އަލްސަންގެ މި ޢާއިލާ ދިރިއުޅެމުންދާ ގެއަށް ވަނީ ޒިޔާރަތް ކޮށްފައެވެ. އެގޮތުން ކުރި ޒިޔާރަތުގައި އެ ޖަމިއްޔާ އަށް ފާހަގަ ކުރެވުނު ކަންކަމާއި ގުޅޭގޮތުން ހިއްސާ ކުރި މައުލޫތު ތަކުގައި އެ ޢާއިލާ އުޅެމުންދާ ގޭގެ ހާލަތާއި، ޢާއިލާގެ އާއްމު ދިރިއުޅުމުގެ ހާލަތު ވަނީ ހާމަކޮށްދީފައެވެ. 

ޢާއިލާ ނިދާން ބޭނުން ކުރާ ކޮޓަރިއެއް-- ފޮޓޯ: އެހީ ޖަމިއްޔާ

އަލްސަންގެ ބައްޕަ އަކީ ދަނޑުވެރިކަން ކުރާ މީހެކެވެ. އެ ޢާއިލާއަށް ކައިބޮއި ހަދަން ފައިސާ ލިބެނީ، އެ މަގުންނާއި، ހެޔޮއެދޭ ބައެއް ފަރާތް ތަކުންދޭ ދީލަތި އެހީގެ އިތުރުން ބައެއް ފަހަރު ފިހާރަ ތަކުން ދަރަންޏަށް ތަކެތި ނަގައިގެންކަމަށްވެސް އެހީ ޖަމިއްޔާއިން މައުލޫމާތު ދެއެވެ. އަދި ދަނޑުވެރި ކަމަކީ މޫސުމީ ކަމަކަށް ވާއިރު، އެކަމުން ލިބޭ ފައިސާއިން ދެކޮޅު ޖެހޭވަރު ވުމަކީ މިފަދަ ޒަމާނެއްގައި ވާނޭ ކަމެއް ނޫނެވެ. 

ޢާއިލާ ކެއްކުމަށް ބޭނުންކުރާ ބަދިގެ-- ފޮޓޯ: އެހީ ޖަމިއްޔާ

ހއ. އުލިގަމުގައި މިފަދަ ދަތިހާލުގައި ދިރިއުޅެމުން ދިޔަ ނަމަވެސް މި ޢާއިލާގެ ތުއްތު ދަރިފުޅު، އަލްސަންގެ އުއްމީދުތައް ނުހަނު ބޮޑެވެ.

"މަންމާ ހާސްނުވޭ އަހަރެން ބޮޑުވެގެން މަންމައަށް ބޮޑު ބިއްލޫރި ގެއެއް އަޅައިދޭނަން. ދެން މަންމަ ބައިންދާނީވެސް ފުށް ޖަހާފަ ސްޓޯބެރީކާން." މިއީ އަލްސަން އޭނާގެ މަންމައަށްޓަކައި ކުރާ އުއްމީދެވެ. 

ޢާއިލާ ބޭނުން ކުރަމުންދާ ފާޚާނާ އެތެރެ. މިތަނުގެ ތެރޭގައި ފެންވެރޭނެ ލުއި ގޮތެއް ނެތް.-- ފޮޓޯ: އެހީ ޖަމިއްޔާ

މި އުއްމީދުތައް ހާސިލްކޮށްދީ، އެ އާއިލާ އުޅެމުންދާ ދަތި އުނދަގޫ ތަކަށް ލުުއެއް ހޯދައި ދިނުމަށް އެހީ ޖަމިއްޔާއިން މިހާރު ވަނީ މަސައްކަތް ފަށާފައެވެ. 

އެގޮތުން އެފަދަ ޢާއިލާ ތަކަށް އެހީވުމަށް އެ ޖަމިއްޔާއިން ފަށާފައިވާ "އެހީވާނަން"ގެ ފުރަތަމަ ޕްރޮޖެކްޓު ޚާއްސަ ކޮށްފައި ވަނީ ތުއްތު އަލްސަންގެ ޢާއިލާއަށް އެހީވުމަށް ކަމަށްވާއިރު، މި އެހީ ފޯރުކޮށްދިނުމަށް އެ ޖަމިއްޔާ އަށް އެހީ ވުމުގެ ފުރުސަތު އާއްމުންނަށް ވަނީ ހުޅުވާލެވިފައެވެ. 

އަލްސަންގެ ޢާއިލާ ބޭނުންކުރަމުންދާ ފާޚާނާ. މިތަނުގެ ހާލު ހުރިގޮތުން މިއީ ފެންވަރާ ގައިން ތާހިރު ވުމަށް އެކަށޭނެ ތަނެއްނޫން-- ފޮޓޯ: އެހީ ޖަމިއްޔާ

އެހެންކަމުން މި ބަރަކާތްތެރި ރަމަޟާން މަހުގެ ފަހު ދިހައިގެ މި ދުވަސްތަކާއި ރޭ ތަކުގައި، މި ނިކަމެތި ޢާއިލާއަށް އެހީވުމަށް  ބޭނުންވާ ފަރާތްތަކުން ފައިސާގެ އެހީ ދެއްވުމަށް އަންނަނިވި އެކައުންޓަށް ފައިސާ ޖަމާކުރުމުން އެކަން ހަމަޖެހޭނެ ކަމަށް އެޖަމިއްޔާއިން ބުނެއެވެ. 

ފައިސާގެ އެހީތެރިކަން ދެވެން ނެތް ފަރާތްތަކުން ތަކެތި ހަދިޔާކޮށްގެން ވެސް އެހީ ވެދެވޭނެކަމަަށް އެހީ ޖަމިއްޔާއިން ބުނެފައިވެއެވެ.

އެގޮތުން އެހީވާން ބޭނުންވާ ފަރާތްތަކުން އެހީ ޖަމިއްޔާގެ ޓީމާއި ގުޅާލައިގެން މިކަން ކުރިޔަށް ގެންދެވޭނެ އިންތިޒާމް ވަނީ ހަމަޖެހިފައެވެ. އެކަމާއި ގުޅޭ އިތުރު މައުލޫމާތު 7803433 އަށް ގުޅާލުމުން ލިބޭނެކަމަށްވެސް އެހީ ޖަމިއްޔާއިން މައުލޫމާތު ދެއެވެ.

އެހީ ޖަމިއްޔާ އިން އިތުރަށް ބުނީ، މިފަދަ އިތުރު ހަރަކާތްތައް މެދުނުކެނޑި ކުރިއަށް ގެންދިއުމަށްޓަކައި ލިބިގެންދާ ފައިސާގެ %12.5 ހަރަކާތް ރާވާ ހިންގުމުގެ ޚަރަދުތަކަށް ބޭނުންކުރެވިގެން ދާނެ ކަމަށެވެ.