ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މޮރިޝަސްގެ ބޮޑުވަޒީރަށް ސިޓީފުޅެއް ފޮނުވާ ދިވެހިރާއްޖޭގެ ސަރަހައްދުން ބައެއް ދޫކޮށްލާފައިވާކަމަށް ވިދާޅުވެ ބައެއް މެމްބަރުން ހައްދަވަނީ ކަނޑައެޅިގެން އިތުރުފުޅުކަމަށް އެމްޑީޕީގެ ޕީޖީ ގުރޫޕުގައި ހިމެނިވަޑައިގަންނަވާ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ.

ޝަރީފް މިފަދައިން ވިދާޅުވެފައިވަނީ ރާއްޖޭގެ ހާއްސަ އިގްތިސާދީ ސަރަހައްދުން ބައެއް ގެއްލޭފަދަ ގޮތަކަށް ސަރުކާރުން މޮރިޝަސްއަށް ފޮނުވި ސިޓީ ރައްޔިތުންނަށް ހާމަ ކުރުމަށާއި، ރާއްޖެއިން ބައެއް ވިއްކާލުމަށް ޑީލް ހަދާފައިވާ ކަމަށް ތުހުމަތުކޮށް އެ މައްސަލަ ތަހުގީގުކޮށް ފިޔަވަޅު އެޅުމަށް ގޮވައިލައި މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ހުށައަޅުއްވާފައިވާ ކުއްލި މައްސަލައަށް ބަހުސް ކުރައްވަމުން ނެވެ. 

ޝަރީފު ވިދާޅުވީ ފޯޅަވައްސަކީ ރާއްޖޭގެ ސަރަހައްދެއްކަމަށް މިހާތަނަށް ކަނޑައަޅާފައި ނުވާކަމަށެވެ. ދެ ގައުމުގެ ދެމެދުގައި ސަރަހައްދާއި ގުޅޭގޮތުން ޚިލާފު އުފެދިއްޖެ ނަމަ އެކަން ހައްލު ކުރެވޭނީ ބައިނަލްއަގުވާމީ ކޯޓަކަށް ގޮސްގެން ކަމަށާއި، މިހާރު އިޓްލޮސްގައި ކުރިއަށް ދަނީ އެ މައްސަލަކަމަށް އޭނާ ވިދާޅުވި އެވެ.

އަދި ސަރުކާރުން ވަކާލާތު ކުރަމުންދަނީ ރާއްޖެއަށް އެންމެ ފައިދާ ބޮޑު ގޮތަށް ކަމަށާއި، ރާއްޖޭގެ ސަރަހައްދުން އެންމެ އަކަ އިއްޗިއެއްވެސް ގެއްލޭގޮތަށް މި ސަރުކާރުން މަސައްކަތް ކުރަމުން ނުދާކަމަށް ޝަރީފު ވިދާޅުވި އެވެ. 

އެއާއެކު އޭނާ ވިދާޅުވީ ރައީސް ޞާލިހުގެ ސިޓީފުޅަކުން ރާއްޖޭގެ ސަރަހައްދުން ބައެއް ގެއްލޭގޮތަށް ޑީލު ހައްދަވާފައިވާކަމަށް ވިދާޅުވެ ބައެއް މެމްބަރުން ހައްދަވަމުންދަނީ ކަނޑައެޅިގެން އިތުރުފުޅުތަކެއް ކަމަށެވެ. 

ޝަރީފުު އިތުރަށް ވިދާޅުވީ ރާއްޖޭގެ ސަރަހައްދުން ބައެއް އެހެން ފަރާތަކަށް ދިނުމަކީ ރައީސުލްޖުމްހޫރިއްޔާއަށް ކުރެވޭނެ ވަރުގެ ކަމެއްވެސް ނޫން ކަމަށެވެ.

ފޯޅަވަހީގެ ސިޔާދަތީ ބާރު މޮރިޝަސްއަށް ލިބެންޖެހޭކަމަށް ރާއްޖެއިން ގަބޫލުކުރުމަކީ ސަރަހައްދު ކަނޑައެޅުމުގެ މައްސަލައާއި ގުޅުމެއް އޮތް ކަމެއް ނޫން ކަމަށާއި، އެ ސްޓޭންޑާއި ގުޅިގެން މިހާރު ކޯޓުގައި ކުރިއަށްދާ މައްސަލައަށް އެއްވެސް އަސަރެއް ނުކުރާނެކަމަށް ޝަރީފު ވަނީ ވިދާޅުވެފަ އެވެ.