ސަރުކާރުން ކަމެއް ބޭނުންވީމަ އެކަމެއް އަވަސް ކުރަންވެގެން އެމަނިކުފާނު ކަމެއް ކުރައްވާނެ ކަމަށް ހީނުުކުރެއްވުމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވެފައިވަނީ މިއަދު އޮތް ރައްޔިތުން މަޖްލީހުގެ ޖަލްސާގައި މަހިބަދޫ ދާއިރާގެ މެމްބަރު އަހްމަދު ޠާރިގު (ޓޮމް)، ޖަލްސާގެ ވަގުތު ނުނިމެނީސް ނިމުނު ކަމަށް މަޖިލީހުގެ ރައީސްއަކަށް ކަނޑަނެޅޭނެ ކަމަށް ވިދާޅުވެ ހުށަހެޅި ނިޒާމާއި ގުޅޭ މައްސަލައަށް ރައްދު ދެއްވަމުންނެވެ.

މިކަމާއި ގުޅިގެން ރައީސް ނަޝިދު ވިދާޅުވީ ބަހުސްގައި ބައިވެރިވެ ވަޑައިގަންނަވަން މެމްބަރުން އެދި ވަޑައިގަންނަވާނަމަ ބަހުސް ކުރިއަށް ގެންދަން ޖެެހޭނެ ކަމަށެވެ.

އެގޮތުން މިހާރު ނުނިމި ހުރި މަސައްކަތްތަކުގެ ތެރެއިން ކޮންމެ މަސައްކަތަކީވެސް ވަރަށް ގިނައިރު ބަހުސް ކުރެވިފައިވާ މަސައްކަތްތަކެއް ކަމަށާއި ގިނަ ސިޔާސީ ޕާޓީތަކުގެ ވަގުތު ހަމަވެފައިވާ ކަމަށް ރައީސް ނަޝީދު ފާހަގަކުރެއްވިއެވެ.

މިއާއިއެކު މިއަދު މަޖްލިސް ޗުއްޓީއަށް ދާއިރު މިމަސައްކަތްތައް ކޮމިޓީ ތަކަށް ފޮނުވިފައި އޮތްކަމަށް ވާނަމަ ކުރިއަށް އޮތް ދެ ހަފްތާގެ ތެރޭގައި ކޮމިޓީ މަސައްކަތް ކުރެވި، އަލުން އަނބުރާ މަޖްލީހުގައި އިށީންނައިރު އެތައް ކަމަކަށް ވަގުތުން ގޮތް ނިންމޭ ގޮތަކަށް އޮންނާނެ ކަމަށް އުންމީދު ކުރައްވާ ކަމަށާއި މަސައްކަތްކުރަނީ އެ ތަސައްވަރުގައި ކަމަށް ރައީސް ނަޝީދު ވިދާޅުވިއެވެ.

"އެއްވެސް މެމްބަރަކުގެ ހިތަށް ވައްދަވައިގެން ނުވާނެ ސަރުކާރުން ކަމެއް ބޭނުންވީމާ އެކަމެއް އަވަހަށް ކުރަންވެގެން އަޅުގަނޑަށް ޖެހިގެން މިތަނުގައި އިނދެ އަޅުގަނޑު ކަމެއް ކުރާނެ ކަމަށް. އެއީ އެކަން ހިނގާނެ ގޮތެއްނޫން." ރައީސް ނަޝީދު ވިދާޅުވިއެވެ.

އެގޮތުން ކުނި ނައްތާލުމާއި ގުޅޭ ގާނޫނުގެ ތެރެއިން ބައެއް ބިިލްތަކާއިމެދު ކަންބޮޑުވެ ލައްވާ ކަމަށް ބައެއް ބޭފުޅުން ވިދާޅުވަނީ 50 ހަކަށް މީހުންގެ ރިޓްވިޓް ފެނި ރާއްޖޭގެ ރައްޔިިތުން މިކަމާއި ދޭތެރޭ ވަރަށް ބޮޑަށް ކަންބޮޑު ވީއޭ ހިތަށްއެރުމުން ކަމަށާއި އެހެންވީމަ މިކަމަށް ކޮންމެހެން ވެސް ޖަލްސާތައް ކުރިއަށް ގެންގޮސްގެން ގޮތެއް ނިންމަން ޖެހޭނޭ ކަމަށް ހީކުރެވުމުން ކަމަށް ރައީސް ނަޝީދު ވިދާޅުވިއެވެ.

އެހެެން ނަމަވެސް ހަގީގަތުގައި ރާއްޖޭގެ ރައްޔިތުން ކަންބޮޑުވާ ކަމަށް އެމަނިކުފާނަށް ފާހަގަވެފައިވަނީ ފަރުތަކަށް ލިބޭ ގެއްލުމާއި ތިމާވެއްޓަށް ލިބޭ ގެއްލުމާއި ސިއްހަތަށް ލިބޭ ގެއްލުމުގެ ސަބަބުން ކަމަށް ރައީސް ނަޝީދު ވިދާޅުވިއެވެ.

"ސައިންސްވެރިން ބުނަމުން މި އަންނަނީ މިކަން ވަމުން އަންނަނީ ކޮތަޅުތަކުގެ ސަބަބުންނޭ. އެހެންވީމާ އަޅުގަނޑަށް ފެންނަ ފެނުމުގައި އެއީކީއެއް އަވަސްކޮށް ގެންގޮސް އަޅުގަނޑުމެން ނިންމަންޖެހޭ ބާވަތުގެ ބަހުސެއްނޫން. އެއީ ފުންކޮށް އަޅުގަނޑުމެން ވިސްނަން ޖެހޭ ބާވަތުގެ ކަމެއް." ރައީސް ނަޝިދު ވިދާލުވިއެވެ.

އެހެންވީމާ އެމައްސަލަ ކޮމިޓީއަށް ފޮނުވައިދެވޭނެ ކަމަށާއި މިއަދުގެ ބަހުސްގައި ބައިވެރިވެ ވަޑައިގަންނަވަން އެދިވަޑައިގަންނަވާ މެމްބަރުން ތިއްބަވަނިކޮށް ބަހުސް ނިންމާލަން އެމަނިކުފާނު ގަސްތު ނުކުރައްވާ ކަމަށް ރައީސް ނަޝީދު ވިދާޅުވިއެވެ.

ސަރުކާރުން ސްޕޮންސާކޮށްގެން ކުނި މެނޭޖުކުރުމުގެ ޤާނޫނަށް ހުށައެޅި އިސްލާހުގައިވަނީ ސިންގަލް ޔޫސް ޕްލާސްޓިކް ކޮތަޅުން ދެ ރުފިޔާގެ ފީއެއް ނެގުމަށް ކަނޑައަޅާފަ އެވެ. އެ އިސްލާހު ހުށައެޅިއިރު ކުނި ގާނޫނުގެ 35 ވަނަ މާއްދާއަށް އޭރު ގެނައި އިސްލާހުގައި އޮތީ 50 ކޮތަޅު ނުވަތަ އެއަށް ވުރެ ގިނަ ކޮތަޅު ހިމެނޭ ކޮތަޅު ބޮޑިން ފީ ނެގުން އިސްތިސްނާކޮށްފަ އެވެ. 

އެހެން ނަމަވެސް ބިލު ފާސްކުރިއިރު އެ އިސްތިސްނާ ހިމަނާފައެއް ނުވެއެވެ. އެކަމާއި ގުޅިގެން ޕްލާސްޓިކް ކޮތަޅު ގަންނަ ކޮންމެ މަރުހަލާއެއްގައި ދައުލަތަށް ދެ ރުފިޔާ ދައްކަން ޖެހެއެވެ. އަދި އެކަމުގެ ސަބަބުން ކޮތަޅު ބޮނޑީގެ އަގުތަކަށް ވަނީ ވަރަށް ބޮޑެތި ބަދަލުތަކެއް އައިސްފަ އެވެ. 

އެ މައްސަލައިގައި ރައްޔިތުންގެ ޝަކުވާ ބޮޑުވުމާއި ގުޅިގެން، އަދި ސަރުކާރަށް ގިނަ ފާޑުކިޔުންތަކެއް އަމާޒުވާން ފެށުމުން އެ މާއްދާ އަލުން އިސްލާހުކުރުމަށް މިހާރު ވަނީ މަޖިލީހަށް ހުށައަޅާފަ އެވެ. އަދި ކޮތަޅު ބިލު އިސްލާހުކޮށްފައި ނޫނީ ރައްޔިތުންގެ މަޖިލީސް ޗުއްޓީއަށް ނުދިއުމަށް ސަރުކާރަށް ތާއީދު ކުރާ މެމްބަރުންވަނީ އެދިވަޑައިގެންފައެވެ.

އެ އިޚްތިޔާރު މެމްބަރަށް ލިބިގެން ނުވާކަން ތަކުރާރުކޮށް ހަނދާންކޮށްދެއްވަމުން ނަޝީދު ވިދާޅުވީ މިހާރުވެސް ތާވަލުކުރެވިފައިވާ ގޮތަށް މަޖިލިސް މާދަން ފެށިގެން ޗުއްޓީއަށް ދާނެ ކަމަށެވެ. 

އެހެންކަމުން ދެން އެ ބިލު އިސްލާހު ކުރާނީ މަޖިލީސް ޗުއްޓީއިން އެނބުރި އައިސްފައެވެ. އެ މުއްދަތުގެ ތެރޭގައި އަމަލުކުރެވެމުން ދާނީ މިހާރުވެސް އަމަލުކުރާ ޤާނޫނަށެވެ. 

އެހެންކަމުން މަޖިލީސް ޗުއްޓީގައި އޮންނަ މުއްދަތުގެ ތެރޭގައި މިހާރުވެސް ނަގާގޮތަށް ކޮންމެ ކޮތަޅަކުން 2 ރުފިޔާގެ ފީއެއް ދައުލަތަށް ނަގަމުންދާނެ އެވެ. އަދި ކޮތަޅު ބޮނޑީގެ އަގުތައްވެސް ހުންނާނީ މިހާރު އުފުލިފައިވާ އަގުތަކުގަ އެވެ.