މި ސަރުކާރުން ކަންކަން ސިއްރުކުރާކަމަށް ބުނުމަކީ ސަރުކާރަށް ރައްދުކުރެވޭ ނުހައްގު ބަހެއްކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިފަދައިން ވިދާޅުވެފައިވަނީ މައުލޫމާތު ހޯދާ ލިބިގަތުމުގެ ޤާނޫނުގެ ދަށުން ސަރުކާރުގެ އެކި އިދާރާތަކަށް ހުށައަޅާ މައުލޫމާތު ހާމަނުކުރުމަށް ސަރުކާރުން އުޒުރު ދައްކަމުން ދިއުމާއި، މައުލޫމާތު ހާމަނުކުރުމަށް ކޯޓަށް ދިއުން ފަދަ ކަންކަން ކުރައްވަމުން ދަނީ ކީއްވެގެންތޯ އައްސަވާ ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ.
މި ސަރުކާރު ވެރިކަމަށް އައީ ދެފުށް ފެންނަ ހާމަކަންބޮޑު ވެރިކަމެއް ކުރާނެކަމުގެ ވައުދުވެގެންކަމަށް ވުމުން "ސިއްރުން ވެރިކަން" ކުރައްވަން އުޅުއްވަނީ ކޮން ސަބަބަކާ ހުރެތޯ ރޭ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ސުވާލު ކުރައްވާފަ އެވެ.
އެ ސުވާލަށް ޖަވާބުދެއްވަމުން ފޮރިން މިނިސްޓަރު އަބްދުﷲ ޝާހިދު ވިދާޅުވީ ސަރުކާރުން ކަންކަން ސިއްރު ކުރާކަމަށް ބުނުމަކީ ސަރުކާރަށް ރައްދުކުރެވޭ ނުހައްގު ބަހެއް ކަމަށެވެ. މި ސަރުކާރަށްވުރެ ވަކި ހާމަކަން ބޮޑުކޮށް ވެރިކަން ކުރާ އެއްވެސް ސަރުކާރެއް ނެތް ކަމަށާއި، ސަރުކާރުން އަބަދުވެސް ރައްޔިތުންނަށް އެނގެން ޖެހޭ މައުލޫމާތުތަކާއި ހިސާބުތައް ހާމަކުރަމުންދާކަމަށް މިނިސްޓަރު ވިދާޅުވި އެވެ.
އެކަން ފާހަގަކުރައްވާ މިނިސްޓަރު ވިދާޅުވީ ސަރުކާރުން މައުލޫމާތު ހާމަކުރްމުންދާނީ އެކަމަށް އެކުލަވާފައިވާ އޮންނަ ގަވައިދުގެ އިމުގެ ތެރެއިން ކަމަށެވެ. އެގޮތުން އަނެކާގެ މަސްލަހަތު ގެއްލޭ ހިސާބަށް މައުލޫމާތު ހާމަ ނުކުރެވޭނެ ކަމަށާއި، އެ ހައްގުތަކަކީ ސަރުކާރުން ހިމާޔަތްކުރަން ޖެހޭ ހައްގުތަކެއްކަމަށް ވާތީ އެފަދަ މައުލޫމާތުތައް ހާމަނުކުރެވޭނެކަމަށް ޝާހިދު ވިދާޅުވި އެވެ.
"އަޅުގަނޑުމެން އެންމެން ވެސް ފަރިތަވާން ޖެހޭ އަނެކާގެ ހައްގުތަކާއި ބެހޭގޮތުން. އަދި ހަމަ އެއާއެކު ބައިނަލްއަގުވާމީ އުސޫލުތަކަށް، ބައިނަލްއަގުވާމީ އުސޫލުތަކުގެ ތެރޭގައި އެބަހުރޭ ގައުމުތަކުގެ ދެމެދުގައި ހިނގާ ކޮރަސްޕޮންޑެންސްއަށް އިޚްތިރާމް ކުރުން، އަޅުގަނޑުމެންގެ ރައީސުލްޖުމްހޫރިއްޔާ ބޭރު ގައުމުގެ ކޮންމެ ވެރިއަކަށް ފޮނުވާ ސިޓީއެއް މީޑިއާގައި ޖަހަން ފަށައިފިއްޔާ އަޅުގަނޑުމެންނާ ވާހަކަދައްކާނެ ބަޔަކު ނުވާނެ"
ފޮރިން މިނިސްޓަރު އަބްދުﷲ ޝާހިދު
އަބްދުﷲ ޝާހިދު ވިދާޅުވީ މައުލޫމާތު ހާމަކުރުމަކީ ކުރީ ސަރުކާރުތަކުން ވަރަށް ބޮޑަށް ހަނިކޮށްފައި އޮންނަ ކަމެއް ކަމަށެވެ. އެހެން ނަމަވެސް މި ސަރުކާރުން އަބަދުވެސް ދެވެން އޮތް އެންމެ ގިނައެއްކޮށް މައުލޫމާތު ހާމަކުރައްވަމުންދާ ކަމަށާއި، ސަރުކާރު ހިންގަމުންދަނީ ދެފުށް ފެންނާނެހެން ހާމަކަން ބޮޑު ގޮތަކަށް ކަމަށް ޝާހިދު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
