ރާއްޖެއަށް މަސްތުވާތަކެތި އެތެރެ ކުރި އިންޑިއާ މީހަކަށް އިނގެރޭސި އަދި ހިންދީ ބަސް ވެސް ނޭނގުމުގެ ސަބަބުން ދެކެވޭ ވާހަކަތައް ފަހުމް ނުވާތީ އޭނާގެ ބަންދު ކުރު މުއްދަތަކަށް ކަނޑައަޅަން ކްރިމިނަލް ކޯޓުން ނިންމައިފިއެވެ.

މިދިޔަ މަހުގެ 12 ގައި ލަލްތުލަންޕަރި ކިޔާ އުމުރުން 57 އަހަރުގެ އިންޑިއާ އަންހެން މީހާ އަތުލައިގަނެފައިވަނީ ކަސްޓަމްސްއިން އެނާ ހުއްޓުވައި އޭނާގެ ލަގެޖު ބަލައިފާސްކުރުމުގެ ތެރެއިން މަސްތުވާތަކެތި ފެނުމުގެ ސަބަބުންނެވެ.

އިއްޔެ އޭނާއަށް ކޯޓުގައި އަޑުއެހުން ބޭއްވިއިރު ދައުލަތުގެ ފަރާތުން ވަކީލަކު ހަމަޖައްސާދީފައިވީ ނަމަވެސް އޭނާއަށް އިނގެރޭސި އަދި ހިންދީ ބަސްވެސް ނޭނގޭ ކަމަށް ކްރިމިނަލް ކޯޓްއިން ވަނީ ބުނެފައެވެ.

އެހެންކަމުން ވަކީލާއި މުއާމަލާތުކުރުމުގައިވެސް ދަތިތަކެއް ހުރި ކަމަށާއި ތަރުޖަމާނު މެދުވެރިކޮށް ދައްކާ ވާހަކަތައްވެސް އޭނާއަށް ފަހުމް ނުވާކަން ފާހަގަކުރެވުނު ކަމަށް ކޯޓްއިން ބުނެފައިވެއެވެ.

މީގެ އިތުރުން 5 ދުވަހުގެ ކުރު މުއްދަތަކަށް އޭނާ ބަންދުގައި ބެހެއްޓުމަށް ނިންމާފައިވަނީ މިކަންކަމަށް ރިއާޔަތްކޮށްފައި ކަމަށް ކޯޓު އަމުރުގައި ގާޒީ އާދަމް މުހައްމަދު ވަނީ ފާހަގަކުރައްވާފަވެއެވެ.