ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވާދަނުކުރައްވަން ނިންމަވާފައިވާ ކަމަށާއި، އެމަނިކުފާނު ގަސްދުކުރައްވަނީ އެ އިންތިޚާބުގައި ޕީޕީއެމް ފަހަތަށް އެރުމަށްކަމަށް ބުނެ ބައެއް ނޫސްތަކުގައި ރިޕޯޓުކޮށްފައިވާ ޚަބަރުތައް ޖޭޕީން ދޮގުކޮށްފި އެވެ.
ކުރިއަށް އޮތް ރިޔާސީ އިންތިޚާބުގައި ޖޭޕީ އިސްވެ އޮވެ ހިންގާ ކޯލިޝަނަކާއެކު ވާދަކުރަން ނިންމާފައިވަނީ އެ ޕާޓީގެ ގައުމީ ކޮންފަރެންސްގެ އަގުލަބިއްޔަތުން ނެވެ. އަދި ޕާޓީގެ ރިޔާސީ ކެންޑިޑޭޓަކީ ޤާސިމްކަމަށް ޕާޓީން ވަނީ ނިންމަވާފަ އެވެ.
އޭގެ އިތުރުން ރިޔާސީ އިންތިޚާބުގައި ޤާސިމަށް ތާއީދުކުރާނެކަމަށް އެމްޑީޕީގެ ރައީސް މުޙައްމަދު ނަޝީދުގެ ފިކުރެއްގެ ދިރުން ގޮފިން ވެސް ވަނީ އިއުލާނުކޮށްފަ އެވެ. އަދި އެ ފަރާތުގެ ދެމެދުގައި މަޝްވަރާތަކެއް ވެސް ވަނީ ކުރިއަށް ގެންގޮސްފަ އެވެ.
ޖުމްހޫރީ ޕާޓީން ރިޔާސީ އިންތިޚާބަށް ތާޔާރުވުމުގެ ކަންކަން ފޯރިއާއެކު ކުރިއަށްދާ ދަނޑިވަޅެއްގައި ބައެއް ނޫސްތަކުން ގެންދަނީ ޤާސިމް ރިޔާސީ އިންތިޚާބުގައި ވާދަނުކުރައްވަން ނިންމަވާފައިވާކަމަށް ރިޕޯޓުކޮށް ޚަބަރުތައް ފަތުރަމުން ނެވެ.
އެކަމާއި ގުޅިގެން ޖުމްހޫރީ ޕާޓީގެ ނައިބު ލީޑަރު އަލީ ޝާހު ކުރެއްވި ޓްވީޓެއްގައި ވަނީ ނޫސްތަކުގައިވާ ވާހަކަތަކަށް ރައްދުދެއްވާފަ އެވެ. ޝާހު ވިދާޅުވީ ޤާސިމް ރިޔާސީ އިންތިޚާބުގައި ވާދަ ނުކުރައްވާނެކަމަށް ބުނެ ބައެއް ނޫސްތަކުގައި ޖަހާފައިވާ ޚަބަރަކީ އެއްވެސް އަސާސެއް ނެތް ދޮގު ޚަބަރުތަކެއް ކަމަށެވެ. އަދި އެފަދައިން ޚަބަރުތައް ފަތުރަކީ ރައްޔިތުންގެ މެދުގައި ނުތަނަވަސްކަން އުފެއްދުމަށްކަމަށް ޝާހު ވިދާޅުވި އެވެ.
"ރައްޔިތުންގެ ތެރޭގައި ނުތަނަވަސްކަން އުފެއްދުމަށްޓަކައި ޤާސިމް އިބްރާހިމް ރިޔާސީ އިންތިޚާބްގައި އެހެން ޕާޓީއަކަށް ތާއީދުކޮށްފާނެ ކަމަށާއި، ރިޔާސީ ރޭހުގައި ވާދަ ނުކުރައްވާނެކަމަށް ފަތުރާ ވާހަކައަކީ އެއްވެސް އަސާސެއް ނެތްވާހަކައެއް"
ޖޭޕީގެ ނައިބު ލީޑަރު އަލީ ޝާހު
ޤާސިމް ރިޔާސީ އިންތިޚާބުގައި ވާދަކުރައްވަން ނިންމުމާއި ގުޅިގެން ސަރުކާރަށް ތާއީދުކުރައްވާ އެމްޑީޕީގެ މެމްބަރުންގެ ފަރާތުންވެސް ބަހުގެ ހަމަލާތަކެއް ރައްދުވެގެން ދިޔައެވެ.
އެގޮތުން ޖޭޕީގެ ސްލޮޓުގައި ތިބި އެޕާޓީގެ ވަޒީރުންނާއި ސިޔާސީ މުވައްޒަފުން ވަރަށް "ހަޑިކޮށް" މަޤާމުތަކުން ދުރުކުރާނެ ކަމުގެ އިންޒާރު އެމްޑީޕީގެ މެމްބަރުން ވަނީ ދެއްވާފަ އެވެ.
އެހެން ނަމަވެސް 2018 ވަނަ އަހަރު އެކުލަވާލި ކޯލިޝަން ސަރުކާރުންވެސް އަދި ޖުމްހޫރީ ޕާޓީންވެސް ރޫޅާލާފައެއް ނުވެއެވެ. ޖޭޕީގެ ނިންމުމާއެކު ސަރުކާރުގައި ތިއްބެވި ޖޭޕީގެ ބައެއް ވަޒީރުންނާއި ވަޒީރު ފެންވަރުގެ ބޭބޭފުޅުން ޖޭޕީން ވަކިވެވަޑައިގެންނެވި ނަމަވެސް މިހާތަނަށް ސަރުކާރުން ޖެޕީގެ ސްލޮޓުތަކުގައި ތިއްބެވި އެއްވެސް ބޭފުޅަކު މަޤާމުން ވަކިކުރައްވާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
