ޗާގޯސް މައްސަލާގައި ކުރީގެ ބައެއް ބަންޑާރަ ނައިބުންނާއި ވަޒީރުންނާއި ސިޔާސީ ބައެއް ބޭފުޅުން ބައިވެރިވެވަޑައިގަންނަވާ ނޫސްވެރިންގެ ބައްދަލުވުން ބޭއްވުމަށް ކުރިން ހަމަ ޖައްސާފައިވާ ތަން އެންމެ ފަހު ވަގުތު ނުދިން ކަމަށް ކުރީގެ ބަންޑާރަ ނާއިބު ޑރ. މުހައްމަދު މުނައްވަރު ވިދާޅުވެއްޖެ އެވެ.

މިއަދު ހަވީރު 4:00 ގައި މެންހަޓަން ބިޒްނަސް ހޮޓެލްގެ ބެންކުއެޓް ހޯލުގައި ބާއްވަން ހަމަ ޖެހިފައިވާ ނޫސްވެރިންގެ ބައްދަލުވުމަށް އެތަން ކުއްޔަށް ދިނުމަށްފަހު މިއަދު މެންދުރު 1:30 ވީފަހުން މި ބައްދަލުވުން ބާއްވަން ދެވެން ނެތް ކަމަށް އަންގާފައިވާ ކަމަށް މުނައްވަރު ވިދާޅުވިއެވެ.

އެހެންކަމުން މި ބައްދަލުވުން މިހާރު ބާއްވަމުން ދަނީ މާލެ ސިޓީގެ މޭޔަރު ޑރ. މުހައްމަދު މުއިއްޒުގެ ގެކޮޅު ދިމްޔާތު ގައެވެ.

މި ބައްދަލުވުމުގައި ކުރީގެ ބަންޑާރަ ނާއިބު އާޒިމާ ޝަކޫރާއި، ޑރ. މުނައްވަރު އާއި ކުރީގެ ފޮރިން މިނިސްޓަރު ދުންޔާ މައުމޫން ވެސް ބައިވެރިވެ ވަޑައިގަތެވެ.

މިއާއިއެކު ސިޔާސީ ޕާޓީތަކުގެ ތެރެއިން ޕީޕީއެމް އާއި ޕީއެންސީ އަދި އެމްއެންޕީގެ އިތުރުން ސަރުކާރު ކޯލިޝަންގައި ހިމެނޭ އެމްއާރްއެމް އާއި ޖުމްހޫރީ ޕާޓީވެސް ބައިވެރިވިއެވެ.

އެގޮތުން ޕީޕީއެމްގެ ނާއިބު ރައީސް އަހްމަދު ޝިޔާމް އާއި، ޕީއެންސީގެ ނާއިބު ރައީސް އިބްރާހިމް ޝުޖާއު އާއި، އެމްއާރްއެމްގެ ނާއިބު ރައީސް އަހްމަދު އުޝާމް އާއި، އެމްއާރްއެމްގެ ނާއިބު ރައީސް އައިމިނަތު ނާދިރާ، އަދި ޖުމްހޫރީ ޕާޓީގެ ކެންދޫ ދާއިރާގެ މެންބަރު އަލީ ހުސައިން ބައިވެރިވެވަޑައިގަންނަވައެވެ.

މީގެ އިތުރުން ރައީސް ނަޝީދުގެ ފެކްޝަންގެ ފަރާތުން އެސްޓީއޯގެ ކުރީގެ އެމްޑީ ހުސައިން އަމްރު ބައިވެރިވެވަޑައިގަންނަވައެވެ.