ލަހެއް ފަހެއް ނެތި ކުރިއަށް އޮތް ރިޔާސީ އިންތިޚާބުގެ ކެމްޕޭނަށް ނުކުތުން އަވަސް ކުރުމަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ޤާސިމް އިބްރާހިމް، އެ ޕާޓީގެ ލީޑަރޝިޕަށާއި ޕާޓީއަށް އަންގަވައިފިއެވެ. 

މިކަން އަންގައި، ޖުމްހޫރީ ޕާޓީގެ ޑެޕިއުޓީ ލީޑަރު އިޤްބާލް އާދަމް މިއަދު ކުރެއްވި ޓްވީޓެއްގައި ވިދާޅުވީ، ރިޔާސީ އިންތިޚާބު 2023ގެ ކެމްޕޭން ފެށުމަށްޓަކައި ވާންޖެހޭ އެންމެ ފަހުގެ ތައްޔާރީތައް ނިންމައި، އަވަހަށް ކެންޕޭން ފެއްޓުމަށް ގާސިމް ޕާޓީއަށް އަންގަވާފައިވާ ކަމަށެވެ. 

ކުރިއަށް އޮތް ރިޔާސީ އިންތިޚާބުގައި އެމްޑީޕީ އާއި އެކު ކޯލިޝަން ހެދުމަށް އެދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ޖުމްހޫރީ ޕާޓީއަށް ސިޓީ ފޮނުއްްވާފައި ވަނިކޮށް، އެ ޕާޓީން ވަނީ، އިންތިޚާބު ގައި އެ ޕާޓީގެ ކެންޑިޑޭޓެއް ނެރެގެން ޕާޓީ އިސްވެ ހަދާ ކޯލިޝަނެއްގެ ތެރެއިން އިންތިޚާބުގައި ވާދަ ކުރިމަށް ނިންމާފައެވެ.  

އެއާއެކު، އެ ޕާޓީން ވަނީ، ޕާޓީ އާއި އެކު ކޯލިޝަން ހެދުމުގެ ދައުވަތު އިދިކޮޅު ޕީޕީއެމް ހިމެނޭހެން ގިނަ ސިޔާސީ ޕާޓީ ތަކަށް ދީފައެވެ. ނަމަވެސް އެ ދަޢުވަތު ޕީޕީއެމާއި، އެމްއެންޕީ އަދި އެމްޑީއޭ އިންވެސް ގަބޫލު ކޮށްފައެއް ނުވެއެވެ. 

ރިޔާސީ އިންތިޚާބަށް ވާންޖެހޭ ފަހުގެ ތައްޔާރީތައް ޖޭޕީން ވާން ފަށާފައިވާއިރު، އެޕާޓީން އަދިވެސް އަންނަނީ ސިޔާސީ ފަރާތްތަކާއި އެކު ގުޅުން ބަދަހިކޮށް އިންތިހާބުގައި ކޯލިޝަން ހެދުމާއިމެދު މަޝްވަރާތައް ކުރަމުންނެވެ. އެގޮތުން، ސަރުކާރު ކޯލިޝަންގައި ހިމެނޭ އެމްއާރްއެމް އާއި، އެމްޑީޕީގެ ފިކުރެއްގެ ދިރުން ފެކްޝަނާއި އެކު ދޭތެރެއިން އަންނަނީ ބައްދަލުވުންތައް ބާއްވަމުންނެވެ.