ހުޅުމާލޭގެ އަހަރީ ދުވަސް ފާހަގަކުރުމަށް ހާއްސަ ކުޑަކުދިންގެ ހަވީރެއް ބޭއްވުމަށް އަރބަންކޯއިން ނިންމައިފިއެވެ.

މާދަމާއަކީ ހުޅުމާލޭގައި މީހުން ދިރިއުޅެން ފެށިތާ 19 އަހަރު ފުރޭ ދުވަހެވެ. އެހެންކަމުން އެ ދުވަސް ފާހަގަކުރުމުގެ ގޮތުން އަރބަންކޯއިން ވަނީ ގިނަ ހަރަކާތްތަކެއް ރާވާފައެވެ.

އެގޮތުން މޯލްޑިވްސް ނެޝެނަލް ހައުސިން އެސޯސިއޭޝަންއާއި އަރބަންކޯއިން ގުޅިގެން މާދަމާ ހަވީރު ހުޅުމާލޭގައި ކުޑަކުދިންގެ ހަވީރެއް ބޭއްވުމަށް ވަނީ ހަމަޖައްސާފައެވެ.

ކުޑަކުދިންގެ ދުވަހާއި ހުޅުމާލެ އަށް 19 އަހަރު ފުރުން ފާހަގަކުރުމުގެ ގޮތުން މި ކުޑަކުދިންގެ ހަވީރު ބާއްވަން ހަމަޖެހިފައި ވަނީ ހަވީރު 4ން 6އަށް ހުޅުމާލޭ ދެވަނަ ފިޔަވަހީގެ ހިޔާ ޕާކުގައެވެ.

މި ހަވީރުގައި ލަވަކިޔުންތެރިޔާ ޝަލަބީ އަދި ރޮބޯމޭންގެ ހަރަކާތްތައް ކުދިންނަށް ދައްކާލުމަށް ހަމަޖައްސާފައިވާއިރު، ސްޕޯޓްސް ކާ ޝޯވެސް ކުރިއަށްދާނެ ކަމަށް އަރބަންކޯއިން ބުނެއެވެ.

މީގެ އިތުރަށް އަރބަންކޯގެ އިސްނެގުމަށް ހިޔާ މެޑިކަލް ސެންޓަރއާ ގުޅިގެން ގެންދާ ހެލްތު ޗެކްއަޕް ސްޓޭޝަނެއްވެސް މި ހަވީރުގައި ހިމެނިފައި ވެއެވެ.

އަރބަންކޯއިން ބުނީ، މި ހަރަކާތުގެ މަގުސަދަކީ ކުޑަކުދިންނަށް އުފާވެރި ވަގުތެއް ހޯދައިދީ، މުޖުތަމައުގެ މެދުގައި އޮންނަ ގުޅުން އެއްބައިވަންތަކޮށް، ބާރުވެރިކޮށް، ބަދަހިކުރުން ކަމަށެވެ. އަދި މުޖުތަމަޢުގައި ދިރިއުޅޭ މީހުންނަށް، ގެއިން ބޭރުގައިވެސް ދަރިންނަށް އުފާވެރި، ހަރުދަނާ، ޞުލްޙަވެރި މާޙައުލެއް ޤާއިމުކުރެވިދާނެކަން ދައްކުވައިދިނުން ކަމަށެވެ.