މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް) އިން ސީއެންއެން އިންޓަނޭޝަނަލް ކޮމާޝަލްއާއެކު އިޝްތިހާރު ކުރުމާއި ބްރޭންޑެޑް ކޮންޓެންޓް ހެދުމުގެ ޕާޓްނަޝިޕް އެއްބަސްވުމެއްގައި ސޮއިކޮށް، ރާއްޖޭގެ ދެމެހެއްޓެނިވި ދިރިއުޅުމުގެ ވައްޓަފާޅިތައް ޕްރޮމޯޓްކުރުމުގެ މަސައްކަތް ފަށައިފިއެވެ.

28 ފެބްރުއަރީގައި އެމްއެމްޕީއާރުސީގެ މައި އޮފީހުގައި ބޭއްވުނު ސޮއިކުރުމުގެ ޙަފްލާގައި އެމްއެމްޕީއާރުސީގެ ފަރާތުން އެއްބަސްވުމުގައި ސޮއިކުރެއްވީ އެމްއެމްޕީއާރުސީގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ، ތޮއްޔިބު މުޙައްމަދެވެ. އަދި ސީއެންއެންގެ ފަރާތުން ސޮިކުރައްވާފައިވަނީ ސީއެންއެން އިންޓަނޭޝަނަލް ކޮމާޝަލްގެ ޑިރެކްޓަރު-ސޭލްސް އަބިޖީތު ދަރުއެވެ.

މިކަމާއި ގުޅީގެން އެމްއެމްޕީއާރުސީ އިން މިއަދު ނެރުން ނޫސް ބަޔާނެއްގައި ބުނެފައިވަނީ މި އަހަރުގެ މޭ މަހާއި، ޖޫންމަހުގެ ތެރޭގައި ކުރިއަށްދާ މި ގްލޯބަލް ކެމްޕޭންގައި، ރާއްޖޭގެ ޖަޒީރާ ރަށްތަކުގެ ގުދުރަތީ ރީތިކަމާއި، ތިމާވެށީގެ ބަޔޯޑައިވަރސިޓީ ރައްކާތެރިކުރުމަށް ކުރަމުންދާ މަސައްކަތްތައް، އަދި ހާއްސަކޮށް މި ރޮނގުން ހިންގާ މަޝްރޫއުތަކަށް އަލިއަޅުވާލާ ޕްރޮމޯޓުކޮށް، އެންވާރަމަންޓަލ-ީކޮންޝަސް ފަތުރުވެރިންނަށް ހިދުމަތް ދިނުމުގައި ރާއްޖެއިން ހިންގާ ހަރަކާތްތައް ޕްރޮމޯ ޓުކުރާނެ ކަމަށެވެ.

Advertisement

އެގޮތުން، ރީސައިކަލްކޮށްފައިވާ ރިސޯޓް އިންޓީރިއާތަކުން ފެށިގެން ވޮލަންޓިއަރުން ހިންގާ ކޮންޒަވޭޝަން ޕްރޮގްރާމްތަކަށާއި މިފަދަ ކަންކަމަށް މުޖުތަމަޢުއިން ދޭ ސަމާލުކަމަށް އަލިއަޅުވާލާނެ ކަމަށް އެމްއެމްޕީއާރުސީއިން ބުނެފައިވެއެވެ. އަދި މި ކެމްޕޭނުގައި ރާއްޖޭގައި ދެމެހެއްޓެނިވި ފަތުރުވެރިކަމާއި ސަގާފަތް ރައްކާތެރިކުރުން ހަރުދަނާ ކުރުމަށް މަސައްކަތް ކުރާ ރައްޔިތުންނަށް ޙާއްސަކޮށް އަލިއަޅުވާލާނެ ކަމަށް އެކުންފުނިން ފާހަގަކޮށްފައިވެއެވެ.

މި ޕާޓްނަޝިޕާ ބެހޭ ގޮތުން އެމްއެމްޕީއާރުސީގެ ސީއީއޯ އަދި އެމްޑީ ތޮއްޔިބު ފާ ގޮތުގައި ދެމެހެއްޓެނިވި ފަތުރުވެރިކަން ކުރިއެރުވުމުގައި ރާއްޖެ ވަނީ ކުރީ ސަފުގާ ކަމަށެވެ. އަދި މިއީ މި މަސައްކަތުގައި ރާއްޖެއިން ނަގާކިޔާލެވޭ ދިވެހިން ފާހަގަކޮށް، ޕްރޮމޯޓްކުރަންވީ ވަގުތު ކަމަށެވެ.

ތޮއްޔިބު އިތުރަށް ވިދާޅުވީ ސީއެންއެންއާއެކު ވެފައިވާ އެއްބަސްވުމަކީ ދުނިޔޭގެ ބޮޑު އޯޑިއަންސަކަށް ވާސިލްވުމަށް އެހީތެރިވެދޭނެ އެއްބަސްވުމެއް ކަމަށެވެ.

އަބީޖީތު ދަރު މި ޕާޓްނަޝިޕާ ބެހޭ ގޮތުން ވާހަކަ ދައްކަވަމުން ވިދާޅުވީ ރާއްޖޭގެ ގުދުރަތީ ރީތިކަން ދެމެހެއްޓުމަށް ކުރާ މަސައްކަތަކީ ވަރަށް ފުރިހަމަ ދުނިޔެ ހައިރާންކުރުވާ ފަދަ މަސައްކަތްތަކެއް ކަމަށެވެ.

މިއާއިއެކު ސީއެންއެންގެ ސްޓޯރީ ޓެލިންގ އާއި އެންގޭޖިންގ ބްރޭންޑެޑް ކޮންޓެންޓަކީ ތިމާވެއްޓަށް ސަމާލުކަންދޭ ދަތުރުވެރިންގެ މެދުގައި ދެމެހެއްޓެނިވި މަންޒިލެއްގެ ގޮތުގައި ރާއްޖެ އިތުރަށް ޕްރޮމޯޓް ކުރުމަށް މުހިންމު ދައުރެއް އަދާ ކުރާނެ ކަމަށްވެސް އަބީޖީތު ފާހަގަކުރެއްވިއެވެ.

މި ކެމްޕޭންގެ ތެރޭގައި ސީއެންއެން އިން ޑިޖިޓަލް އަދި ބްރޯޑްކާސްޓް މީޑިއަމްތަކުގައި "ދަ ޖަރނީ މެޓަރސް އިން 2023" ގެ ޝިއާރުގެ ދަށުން ޑެޑިކޭޓެޑް ކޮންޓެންޓް ދައުރު ކުރާނެއެވެ. މީގެ ތެރޭގައި ލިޔުންތަކާއި ވީޑިއޯތަކާއި އިޝްތިހާރުތަކާއ ސޯސަލް މީޑިއާ ޕޯސްޓްތައް ހިމެނެއެވެ.

އެމްއެމްޕީއާރުސީ އިން ވަނީ މިއީ ސީއެންއެންއާ ގުޅިގެން ރާއްޖެ ޕްރޮމޯޓުކުރުމަށް އެމްއެމްޕީއާރުސީއިން މަސައްކަތް ކުރާ ހަތަރު ވަނަ ފަހަރު ކަމަށް ފާހަގަކޮށް މީގެ ކުރިން ދުނިޔޭގެ ބާޒާރުގައ ރާއްޖޭގެ ޕްރެޒެންސް ދެމެހެއްޓުމަށް ކޮވިޑުގެ ބަލިމަޑުކަމުގެ ތެރޭގައިވެސް ކާމިޔާބު ތިން ކެމްޕޭން ހިންގާފައިވާ ކަމަށް ބުނެފައެވެ.

އަދި މި ކެމްޕެއިންތަކުގެ ތެރެއިން ބެލުންތެރިންނާއި ކިއުންތެރިން ޝައުގުވެރިވާފަދަ ކޮންޓެންޓް ސީއެންއެންއިން ބިނާކޮށް، ބައިނަލްއަޤްވާމީ ދަތުރުވެރިންނަށް ރާއްޖޭގެ ހޯލިސްޓިކް އެލިމެންޓް ޕްރޮމޯޓްކުރި ކަމަށް އެ ކުންފުނިން ބުނެފައިވެއެވެ.