ނަރުހުންގެ ތައުލީމަށް އިންވެސްޓުކުރުމަކީ ދިވެހިރާއްޖޭގެ ސިއްޙީ ނިޒާމު ހަރުދަނާކުރުމަށް އެޅޭނެ މުހިންމު ފިޔަވަޅެއްކަމަށް ޖުމްހޫރީ ޕާޓީގެ ރައީސް އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ. 

ޤާސިމް މިފަދައިން ވިދާޅުވެފައިވަނީ ނަރުހުންގެ ދުވަހުގެ ހެޔޮއެދުމާއި ތަހުނިޔާ ރާއްޖޭގެ ނަރުހުންނަށް އަރިސްކޮށް ކުރެއްވި ޓްވީޓެއްގަ އެވެ. 

ބައިނަލް އަޤްވާމީ ނަރުހުންގެ ދުވަހުގެ ހެޔޮއެދުމާއި ތަހުނިޔާ ރާއްޖޭގެ ލޮބުވެތި އެންމެހާ ނަރުހުންނަށާއި ނަރުހުންގެ ޢާއިލާތަކަށާއި، އެންމެހައި ސިއްހީ ޚިދުމަތްތެރިންނަށް އަރިސްކުރަމުން ޤާސިމް ވިދާޅުވީ ނަރުހުންގެ ޚިދުމަތަކީ އެފަދަ ދެވަނައެއް ނެތް، އެ ޚިދުމަތަކާ މެދު ޝުކުރުން ހިތް ފުރޭ ޚިދުމަތެއް ކަމަށެވެ.

Advertisement

އިންސާނާއަށް އެންމެ އެހީތެރިކަމާއި އަޅާލުން ބޭނުން ވާ ވަގުތަކީ އޭނާ ބަލިހާލަތުގައިވާ ވަގުތު ކަމަާއި، އެ ވަގުތު ނަރުހުން ހިނިތުންވުމާއި ލޯތްބާއި އޯގާތެރިކަމާއެކު އަޅާލާ އަޅާލުމަކީ ބަލިމީހާގެ ތަކްލީފުތައް ދުރުވެ، الله ތަޢާލާގެ އިރާދަފުޅާއެކު ބަލިފަސޭހަވުމަށްޓަކައި އޮންނަ ވަރަށް އަވަސް މަގެއްގެ ގޮތުގައި ޤާސިމް ސިފަކުރެއްވި އެވެ.

‏އަދި ވިދާޅުވީ މިއަހަރުގެ ބައިނަލް އަޤްވާމީ ނަރުހުންގެ ދުވަހާ ދިމާކޮށް، ވިލާ ކޮލެޖުގައި ޑިޕްލޮމާ އިން ނާސިންގ ކޯސް ހަދަމުންދާ ދަރިވަރުންނަށް، އަހަރަކު ތިން ސްކޮލަޝިޕް ރާއްޖޭގެ ނަރުހުންގެ ޖަމިއްޔާއާ ގުޅިގެން ވިލާފައުންޑޭޝަން މެދުވެރިކޮށް ހަމަޖެހިގެން ދިއުމަކީ އަދި މީގެތެރެއިން އަންހެން ކެންޑިޑޭޓުންނަށް ހާއްސަކޮށްގެން ދެ ސްކޮލަޝިޕާއި ފިރިހެން ކެންޑިޑޭޓުންނަށް އެއް ސްކޮލަޝިޕް ހަމަޖެހިގެން ދިއުމަކީ އޭނާ ނުހަނު އުފާކުރާ ކަމެއް ކަމަށެވެ. 

ޤާސިމް އިތުރަށް ވިދާޅުވީ "އަހަރުމެންގެ ނަރުހުންނަކީ އަހުރުމެންގެ މުސްތަޤްބަލް" ކަމުގައިވުމަށްޓަކައި، ނަރުހުންގެ ތައުލީމަށް އިންވެސްޓްކުރުމަކީ ރާއްޖޭގެ ސިއްޙީ ނިޒާމް އިތުރަށް ހަރުދަނާކުރުމަށް އެޅޭނެ މުހިންމު ފިޔަވަޅެއްކަމަށް ދެކިވަޑައިގަންނަވާ ކަމަށެވެ. 

ނަރުހުންގެ ދުވަހާއި ދިމާކޮށް ޤާސިމްގެ ވިލާ ކޮލެޖުން ނަރުހުންނަށް ޚާއްސަ ސްކޮލާޝިޕްތަކެއް ދީފައިވާއިރު، ސިއްޙީ ދާއިރާއަށް ޚިދުމަތްކުރާ ފަރާތްތަކުގެ ތައުލީމަށް ލުއި ގޮތްތަކެއް ހޯއްދަވާދެއްވުމަށް މަސައްކަތްޕުޅު ކުރައްވާކަމަށް ޤާސިމް ވަނީ މީގެކުރިންވެސް ވިދާޅުވެފަ އެވެ.