ޤައުމީ އުފެެއްދުންތެރިކަން، ނުވަތަ ދައުލަތުގެ ނޮމިނަލް ޖީޑީޕީ ފުރަތަމަ ފަހަރަށް 100 ބިލިއަން ރުފިޔާއަށް މިއަހަރު އަރާނެކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ. 

ފިނޭންސް މިނިސްޓަރު މިފަދައިން ވިދާޅުވެފައިވަނީ ރާއްޖޭގެ އިޤްތިޞާދު ކުރިއަރަމުންދާކަން ހާމަކުރައްވާ މިއަދު ކުރެއްވި ޓްވީޓުތަކެއްގަ އެވެ. 

އެގޮތުން މިނިސްޓަރު ވިދާޅުވީ ރާއްޖޭގެ ނޮމިނަލް ޖީޑީޕީ 107.2 ބިލިއަން ރުފިޔާއަށް އަރާނެކަމަށް ލަފާކުރާއިރު މިއީ އިޤްތިޞާދީގޮތުން މިހާތަނަށް އަންނާނެކަމަށް ލަފާކުރެވޭ އެންމެ ބޮޑު ބަދަލުކަމަށެވެ. 

ރާއްޖެއާއި ދުނިޔޭގެ އިޤްތިޞާދަށް އެކި ހުރަސްތައް ކުރިމަތިވަމުންދިޔަ ނަމަވެސް، ރާއްޖެއިން އިޤްތިޞާދީގޮތުން ހޯދަމުންދާ ކުރިއެރުންތަކަކީ ސަރުކާރުން އަޅަމުންދާ ހަރުދަނީ އިޤްތިޞާދީ ފިޔަވަޅުތަކުގެ ނަތީޖާކަމަށް މިނިސްޓަރު ވިދާޅުވި އެވެ. 

މިނިސްޓަރު އަމީރު އިތުރަށް ވިދާޅުވީ ފަތުރުވެރިކަމުގެ ދާއިރާއިން ބޮޑެތި ކުރިއެރުންތަކެއް ލިބެމުންދާއިރު، އެކަމުގެ ސަބަބުން ދަތުރުފަތުރާއި، އިމާރާތްކުރުމާއި އެހެނިގެން ސިނާއަތްތަކަށްވެސް ކުރިއެރުން ލިބެމުންދާ ކަމަށެވެ.

ދިވެހިރާއްޖޭގެ އިޤްތިޞާދު ރަނގަޅުވަމުން އަންނަކަމަށް ބައިނަލްއަގުވާމީ މާލީ އިދާރާތަކުން އަންނަނީ ފާހަގަކުރަމުން ނެވެ. 

ރާއްޖޭގެ އިޤްތިޞާދަށް އަންނަމުންދާ ކުރިއެރުންތައް ވޯލްޑް ބޭންކުން އެންމެފަހުން އާންމުކޮށްފައިވާ "މޯލްޑިވްސް ޑިވެލޮޕްމަންޓް އަޕްޑޭޓް" ރިޕޯޓުގައިވެސް ވަނީ ފާހަގަކޮށްފަ އެވެ. އެރިޕޯޓުގައި ބުނެފައިވާ ގޮތުން  ރާއްޖޭގެ ފަތުރުވެރިކަން ކުރިއަރަމުންދިއުމުގެ ސަބަބުން ރިއަލް އެސްޓޭޓް، ޓްރާންސްޕޯޓް އަދި ޓްރޭޑްގެ ސިނާއަތަށްވެސް އޭގެ ހެޔޮ އަސަރު ކުރަމުންދާނެ އެވެ.

ފަތުރުވެރިކަމުގެ ސިނާއަތްތަކަށް ލިބުނު ކުރިއެރުންތަކުގެ ސަބަބުން ރާއްޖޭގެ އިޤްތިޞާދަށް 12.3 އިންސައްތައިގެ ކުރިއެރުމެއް ލިބިފައިވާކަމަށްވެސް ވޯލްޑް ބޭންކުގެ ރިޕޯޓުގައި ފާހަގަކޮށްފައި ވެއެވެ.