ޖުމްހޫރީ ޕާޓީ (ޖޭޕީ)ގެ ކެމްޕޭން މެނޭޖަރުކަމަށް އެ ޕާޓީގެ ޑެޕިއުޓީ ލީޑަރ އަމީން އިބްރާހިމްއާއި ސްޕެޝަލް އެންވޯއީ އިލްހާމް އަހުމަދު ހަމަޖައްސަވައިފިއެވެ.

ޖޭޕީގެ ލީޑަރ ގާސިމް އިބްރާހިމް އެ ޕާޓީގެ ވަޓްސްއަޕް ގްރޫޕަށް ފޮނުވި މެސެޖެއްގައި ވިދާޅުވީ، މި އަހަރުގެ ރިޔާސީ އިންތިހާބުގެ ކެމްޕޭން ހިންގުމުގެ ކަންކަން ރާވައި ކުރިއަށް ގެންދިއުމަށް ނިންމާފައިވާގޮތް މެމްބަރުންނަށް އަންގާ ކަމަށެވެ.

އެގޮތުން، މުޅި ކެމްޕޭންގެ ހުރިހާ ކަމެއް ދެބަޔަކަށް ބަހާލައިގެން ކުރިއަށް ގެންދާނެ ކަމަށާއި ޕާޓީގެ ސެކްރެޓޭރިއަޓްއާ ގުޅިގެން ކުރިއަށް ގެންދިއުމަށް ދެ ކެމްޕޭން މެނޭޖަރުން ހަމަޖައްސާ ކަމަށެވެ.

Advertisement

އެގޮތުން އުތުރުގެ ކެމްޕޭން މެނޭޖަރަކަށް އަމީން ހަމަޖައްސަވާފައި ވާއިރު ދެކުނުގެ ކެމްޕޭން މެނޭޖަރަކީ އިލްހާމްއެވެ.

އަމީންއާއި ހަވާލު ކޮށްފައި ވަނީ ހއ. އަތޮޅުން ފެށިގެން އދ. އަތޮޅުުގެ ނިޔަލަށް އަދި މާލެ ސަރަހައްދު ދެބައިކޮށް އެއްބައެވެ. އިލްހާމްއާ ހަވާލު ކޮށްފައި ވަނީ ވ. އަތޮޅުން ފެށިގެން ސ. އަތޮޅުގެ ނިޔަލަށް އަދި މާލެ ސަރަހައްދު ދެބައިކޮށް އެއްބައެވެ.

ޕާޓީގެ ރިޔާސީ ޓިކެޓް ހަވާލު ކުރުމާއި ކެމްޕޭން ލޯންޗްކުރުންވެސް، ޕާޓީގެ ސެކްރެޓޭރިއެޓްއާ ގުޅިގެން ކުރިއަށް ގެންދިއުމަށް ހަވާލު ކޮށްފައި ވަނީ އިލްހާމް އަދި އަމީންއާއެވެ.

ރިޔާސީ އިންތިޚާބުގައި ޖޭޕީގެ ޓިކެޓުގައި ވާދަކުރުމަށް އެ ޕާޓީގެ ލީޑަރު އަދި ރައްޔިތުން މަޖިލީހުގެ މާމިގިލި ދާއިރާގެ މެމްބަރު ޤާސިމް އިބްރާހިމް ނިންމަވާފައި ވަނީ މާރޗް މަހުގެ ފަހުކޮޅުގައެވެ.

އެޕާޓީގައި ރިޔާސީ ކެނޑިޑޭޓެއްގައި ހުންނަންޖެހޭ ޝަރުތުތައް ފުރިހަމަވާ އެތައް ބޭފުޅުންނެއް ތިއްބެވި ނަމަވެސް އިންތިޚާބަށް ކުރިމަތިލުމަށް އެ ޕާޓީގެ ރިޔާސީ ޓިކެޓްއަށް އިއުލާނު ކުރެވުނު މުއްދަތުގެ ހަމަވާން ދިޔައިރު އެއްވެސް ބޭފުޅަކު ޕާޓީގެ ޓިކެޓަށް ވާދަ ކުރުމަށް އެދި ހުށަހަޅާފައެއް ބުނެއެވެ.

އެހެންކަމުން ޕާޓީގެ ލީޑަރުގެ ހައިސިއްޔަތުން ޕާޓީގެ މެމްބަރުން އެދޭގޮތް ހާސިލުކުރުމަށްޓަކައި އެޕާޓީގެ ފަރާތުން ރިޔާސީ އިންތިޚާބުގައި ރައީސުލްޖުމްހޫރިއްޔާ ކަމުގެ މަގާމަށް ކުރިމަތިލުމަށް ޤާސިމް ނިންމެވީއެވެ.

ޖޭޕީއަކީ ސަރުކާރާއިއެކު ކޯލިޝަން ހަދާފައިވާ ޕާޓީއެއް ކަމުގައި ވީނަމަވެސް މިއަހަރުގެ ރިޔާސީ އިންތިޚާބަށް ޖޭޕީ ނިކުންނާނީ އެ ޕާޓީ އިސްވެ ހަދާ ކޯލިޝަންއަކުން މީގެ ކުރިން ވަނީ ނިންމާފައެވެ. އަދި ޖޭޕީއާއިއެކު ކޯލިޝަން ހެދުމަށް އެހެން ޕާޓީތަކަށް ވަނީ ހުޅުވާލައިފައެވެ.