ޔޫސުފް ޝަފީއު (ޔޫއްޕެ) ޖުމްހޫރީ ޕާޓީއަށް ސޮއިކޮށްފިއެވެ.

ޖުމްހޫރީ ޕާޓީގެ ތަރުޖަމާނު އަލީ ސޯލިހު ވިދާޅުވީ، ރޭ ޖޭޕީއަށް ސޮއި ކުރި މެމްބަރުންގެ ތެރޭގައި ރާއްޖޭގެ މަޝްހޫރު ގޯލްކީޕަރ ހަސަން ރަމީޒް (ޓިމޯ)، ޔޫސުފް ޝަފީއު އަދި ކުރީގެ ޗީފް ޕްރިޒަންސް އޮފިސަރ މުޙައްމަދު ތައުފީގް ހިމެނޭ ކަމަށެވެ.

މީގެ ކުރިންވެސް ޖޭޕީގެ މެމްބަރެއްގެ ގޮތުގައި ހުރުމަށްފަހު ޔޫއްޕެ ވަނީ 2011 ވަނަ އަހަރު އެމްޑީޕީއަށް ސޮއި ކޮށްފައެވެ.

Advertisement

ރާއްޖޭގެ ޚިދުމަތްތެރީން ގައުމުގެ ހަމަޖެހުމާއި، ކުރިމަގަށްޓަކައި ޖޭޕީ އާއިއެކު ސިޔާސީ ކަމަރު ބަންނަވާ، ރިޔާސީ ދަތުރު ގައި ބައިވެރިވެލެއްވުމަށް އެ ޕާޓީގެ ލީޑަރު ގާސިމް އިބްރާހިމް ވަނީ އެދިލައްވާފައެވެ.

މިފަހުން ގިނަ އަދަދެއްގެ މީހުން ދަނީ ޖޭޕީއާ ގުޅެމުންނެވެ.

އެގޮތުން ނިމިދިޔަ ދައުރުގެ ފ. އަތޮޅު ކައުންސިލްގެ ނައިބު ރައީސްކަން ކުރައްވާފައިވާ މަޙްމޫދު އަޙްމަދާއި، ފ. ދަރަބޫދޫ ކައުންސިލުގެ ރައީސް ކަން ކުރައްވާފައިވާ އަލީ މުޙައްމަދު ވަނީ ޖޭޕީއާއި ގުޅިފައެވެ.

ގާސިމް ވަނީ އެ ބޭފުޅުން ކުރިން އުޅުއްވި ސިޔާސީ ޕާޓީ ދޫކުރައްވާ، ޖޭޕީއާއި ގުޅިވަޑައިގެންނެވީތީ އެދެބޭފުޅުންނަށް މަރުޙަބާއާއި ޝުކުރުދަންނަވާފައެވެ.

މިއާއިއެކު ގާސިމް ވަނީ ރާއްޖޭގެ އެންމެހާ ކަންކޮޅުތަކުގައި ދިރިއުޅުއްވާ މިފަދަ ޚިދުމަތްތެރީން ޤައުމުގެ ހަމަޖެހުމާއި، ކުރިމަގަށްޓަކައި ޖޭޕީއާއިއެކު ސިޔާސީ ކަމަރު ބަންނަވާ، ގާސިމް އާއިއެކު ރިޔާސީ ދަތުރު ގައި ބައިވެރިވެލެއްވުމަށް އެދިފައެވެ.

މި ދެ ބޭފުޅުންގެ އިތުރުން ފ. އަތޮޅުގެ ނިލަންދޫ ދާއިރާއާއި އަދި ބިލެތްދޫ ދާއިރާއިން ގިނަ އަދަދެއްގެ މެމްބަރުންތަކެއްވެސް ވަނީ ޖޭޕީއާއި ގުޅިފައެވެ.

މިއާއިއެކު ޕާޓީގެ މެމްބަރޝިޕް އިތުރުކޮށް، ރާއްޖޭގެ އެންމެހާ ކަންކޮޅުތަކެއްގައި ޖުމްހޫރީ ޕާޓީ ގެ މެންބަރުން ހަރަކާތްތެރިކަން އިތުރުކޮށް، ރައްޔިތުންގެ ކުރިމަގަށްޓަކައި ކުރިއަށް އޮތް ރިޔާސީ އިންތިޚާބު ޕާޓީއަށް ކާމިޔާބު ކުރުމަށް މެންބަރުންގެ ބަދަހި ސަފުތައް އަވަހަށް ރުކުރަވާލައްވަން ވެސް ގާސިމް ވަނީ އެދިފައެވެ.