މުޅި ތަޙްޤީޤު ފައިލް ތަޙްޤީޤުލޮގާއި އެކު ބެލުމުގެ ޙައްޤު ދިފާޢަށް ލިބިގެންވާކަމަށާއި، އެ ލިޔެކިއުންތައް ދެއްކުުުމަކީ ދައުލަތުގެ މައްޗަށް ލާޒިމް ކަމެއްކަން ސްްްްޕްރީމްކޯޓުުުން ނިންމި ނިންމުމާއެކު ދެން ދައުލަތަަށް ބަހަނާ ނުދެއްކޭނެ ކަމަށް ކުރީގެ ރައީސް ޔާމީން އަބްދުލްގައްޔޫމް ގެ ވަކީލުންގެ ޓީމުގައި ހިމެނިވަޑައިގަންނަވާ އަބްދުالله ޝިޔާޒް ވިދާޅުވެއްޖެއެވެ. 

ރ. ފުއްގިރި މައްސަލައިގެ ޝަރީއަތުގެ ކުރިން ހުށައަޅަން ޖެހޭ ހުށައެޅުންތަކާއި ގުޅޭގޮތުން ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ސުޕްރިމް ކޯޓުގައި އިސްތިއުނާފުކުރި މައްސަލައިގެ ހުކުމް ރޭގައި ސުޕްރީމްކޯޓުން ވަނީ ކޮށްފައެވެ. 

އެގޮތުން ސުޕްރީމް ކޯޓުން ނިންމާފައި ވަނީ ކުށުން ބަރީއަވުމުގެ ވަސީލަތެއްގެ ގޮތުގައި ގާނޫނު އަސާސީގެ 51 ވަނަ މާއްދާގެ (ބ) އިން ކަށަވަރު ކޮށްދީފައިވާ ހައްގުތަކުގެ ތެރޭގައި ގާނޫނު ތަންފީޒުކުރާ އިދާރާއިން ތަހުގީގުގެ ބޭނުމަށް އެއްކޮށްފައި ހުރި ހުރިހާ މައުލޫމާތެއް ދިފާއަށް ލިބުމުގެ ފުރުސަތު ދިނުން ހިމެނޭ ކަމަށް ގަބޫލުކުރެވޭ ކަމަށެވެ.

Advertisement

އަދި އެހައްގު ތެރޭގައި ޖިނާއީ އިޖުރާއަތުގެ ގަވައިދުގައި ބަޔާންކުރާ އުސޫލުން ގާނޫނު ތަންފީޒުކުރާ އިދާރާއެއްގެ އޮފިސަރަކު ކުރި ނުވަތަ ބޭނުންކުރާ މައްސަލައިގެ ފައިލު އެކުގައި ބެލުމުގެ ހައްގުވެސް ހިމެނޭ ކަމަށް ހުކުމުގައި ބުނެފައި ވެއެވެ.

ސްޕްރީމް ކޯޓުގެ އެ ނިންމުމާއި ހަވާލާދެއްވައި ޝިޔާޒް ކުރެއްްވި ޓުވީޓެއްގައި ވަނީ، އެއީ ދިވެހިރާއްޖޭގައި ޖިނާޢީ ޢަދުލުގެެ ނިޒާމަށް މުޅިން އައު ކަމެއްް ކަމަށާ، ތަހްގީގާއި ގުޅޭ ލިޔެކިޔުންތައް ނުދެއްކުމަށް ދެން ދައުލަތަށް ބަހަނާ ނުދެއްކޭނެކަމަށެވެ. 

ރޭގެ ހުކުމާއި ގުޅިގެން ރައީސް ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ ޑރ. މުހައްމަދު ޖަމީލްވެސް ވަނީ އެއީ ވަރަށް ބޮޑު ކާމިޔާބީއެއް ގޮތަށް ސިފަ ކުރައްވާފައެވެ.

އަދި ޔާމީންގެ ފަރާތުން އެދުނު ގޮތައް ކްރިމިނަލް ކޯޓާއި ހައިކޯޓުގެ ހުކުމް ބާތިލް ނުކުރިނަމަވެސް ޖަމީލް ވިދާޅުވީ ކުމުގެ ނަތީޖާއަކީ ދައުލަތުގެ އަތުގައި ހުރި ލިޔުންތަކުގެ ތެރޭގައި ހިމެނޭ ހުރިހާ ލިޔުމުންތަކެއް ބެލުމުގެ ފުުރުސަތު ލިބިގެން ދިއުން ކަމަށެވެ.

"މުޅި ޖުމްލަ މައްސަލަ، އަޅުގަނޑުމެން ހުށައެޅި ގޮތަށް ސުޕްރީމް ކޯޓްގައި މާތްالله ގެ ތަނަވަސް ރަހްމަތާއެކު އަޅުގަނޑުމެންނަށް ކާމިޔާބު ވެގެން މިދިޔައީ. އަޅުގަނޑުމެން އެދުނު މިންވަރަށް ވުރެވެސް ބޮޑަށް ސުޕްރީމް ކޯޓުން އެކަމުގެ މަގު ކޮށައި ދެއްވައިފި. ސުޕްރީމް ކޯޓްގެ މިރޭގެ ހުކުމުގެ ނަތީޖާއަކީ ދައުލަތުގެ އަތުގައި ހުރި ލިޔުންތަކުގެ ތެރޭގައި ހިމެނޭ ހުރިހާ ލިޔުމުންތަކެއް ބެލުމުގެ ފުުރުސަތު އަޅުގަނޑުމެންނަށް ލިބޭނެ. އެއްވެސް އިސްތިސްނާއެއް ނެތި،" ޖަމީލް ވިދާޅުވިއެވެ.

މީގެ އިތުރުން އެ ހުކުމާއިއެކު ކުރީގެ ނައިބު ރައީސް އަހްމަދު އަދީބާއި، އަބްދުالله ޒިޔަތުގެ ހެކިބަސް ބަލައިގަތުމާއި މެދު ގޮތެއް ކަނޑައަޅަން ޖެހޭނެ ކަމަށް ނިމިގެން ގޮސްފައިވާ ކަމަށްވެސް ޖަމީލް ވިދާޅުވި އެވެ.

"ހަގީގަތުގައި އަޅުގަނޑުމެންނަށް ލިބިގެން މިދިޔައީ ވަރަށް ބޮޑު ކާމިޔާބީއެއް. ސަބަބަކީ ފަނޑިޔާރުން ވަރަށް ސާފް ސަރީހަ ގޮތެއްގައި މި މައްސަލަ ކުރިއަށްދާއިރު މި ދެ ހެއްކާ (އަދީބު އާއި ޒިޔަތު) ބެހޭ ގޮތުން ގޮތެއް ކަނޑައަޅަން ޖެހޭނޭ. އަޅުގަނޑުމެން ބޭނުންވީ މިހާރުވެސް އެ ގޮތް ކަނޑައަޅަން،" ޖަމީލް ވިދާޅުވިއެވެ.