ކޮމިޝަނަރ އޮފް ޕޮލިސް މުޙައްމަަދު ޙަމީދު ރަސްމީ ދަތުރުފުޅެއްގައި ނ. އަތޮޅަށް ވަޑައިގެން ނ. މަނަދޫ / އަންނާރުމާގެ، ނައީމާ މޫސާގެ މަރުގެ މައްސަލައިގެ ތަހުގީގު ކުރިއަށްދާގޮތް ގާތުން ބައްލަވައިފިއެވެ.

މިކަމާއި ގުޅިގެން ފުލުހުން ނެރުން ޚަބަރެއްގައި ބުނެފައިވަނީ ސީޕީ ނ. އަތޮޅަށް ކުރައްވާ ރަސްމީ މި ދަތުރުފުޅުގައި ކްރައިމް އިންވެސްޓިގޭޝަން ކޮމާންޑްގެ ހެޑް އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ރިޔާޟް އާއި ފުލުހުންގެ ސީނިއަރ ބައެއް އޮފިސަރުން ބައިވެރިވެލައްވާފައިވާ ކަމަށެވެ.

އެގޮތުން މި ދަތުރުފުޅުގެ ތެރެއިން ސީޕީ ވަނީ މިއަދު ނ. އަތޮޅު މަނަދޫއަށް ވަޑައިގެން، އެރަށު ކައުންސިލާއި އެރަށުގެ ކަމުވޮށިގެންވާ ބައެއް ފަރާތްތަކާ ބައްދަލުކުރެއްވުމުގެ އިތުރުން އެރަށު ޕޮލިސް ސްޓޭޝަންގައި މަސައްކަތްކުރައްވާ ފުލުހުންނާއި އާންމު މުވައްޒަފުންނާ ބައްދަލުުރައްވާފައި ކަމަށް ފުލުހުން މައުލޫމާތު ދެއެވެ.

އަދި ނައީމާގެ މަރުގެ މައްސަލަައިގެ ތަހުގީގު ކުރިއަށްދާ ގޮތް ކައިރިން ބައްލަވާލައްވާ، ނައީމާ މޫސާގެ އާއިލާއާ ބައްދަލުކުރައްވައި، ތަހުގީގާ ގުޅޭ މަޢުލޫމާތު ހިއްސާކުރައްވާފައިވާ ކަމަށް ވެސް ފުލުހުން ބުނެފައިވެއެވެ.

މީގެއިތުރުން ސީޕީ ވަނީ އެރަށުގައި އަލަށް އިމާރާތްކުރަމުންދާ ފުލުހުންގެ އައު ޕޮލިސް ސްޓޭޝަންގެ މަސައްކަތްތައް ކުރަމުންދާ ސައިޓަށް ވަޑައިގެން މަސައްކަތްތައް ކުރިއަށްދާގޮތް ބައްލަވާލައްވާފައި ކަމަށް ފުލުހުން ބުނެފައިވެއެވެ.

ނައީމާގެ މަރަށް މިހާރު މަސްދުވަހަށް ވުރެ ގިނަ ދުވަސް ވެފައިވީއިރުވެސް ފުލުހުން ކުރަމުންދާ ތަހްގީގުގެ ތެރެއިން މީހަކު ހައްޔަރު ކޮށްފައެއް ނުވެއެވެ.

ނަމަވެސް މައްސަލައިގެ ތަޙްޤީޤަށް އެރަށު ބައެއް މީހުންގެ ސާމްޕަލް ފުލުހުން ވަނީ ނަގާފައެވެ.

މަނަދޫން ވާހަކަ ދެއްކި ބައެއް މީހުން ބުނީ، ނަޢީމާގެ ގެއަށް ޢާންމުކޮށް ވަދެ އުޅޭ މީހުންނާއި، އެނޫންވެސް ބައެއް މީހުންގެ އިނގިލީގެ ނިޝާން ފުލުހުން ނަގައި ރަށުގެ އެކި ސަރަޙައްދުތަކަށް ފުލުހުން ގޮސް ބައެއް މީހުންނާއި ސުވާލުކުރަމުން އަންނަކަމަށެވެ.