މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ވަކިވީ ޕާޓީ އުފެދި އެ އަސާސްތަކުގެ މަތީގައި ހިންގަމުން އައި ހުރިހާކަމެއް ދޫކޮށްލާ ޑިމޮކްރަސީއާއި މުޅިން ބީރައްޓެހި ކަންތައްތަކެއް ޕާޓީގެ ތެރެއަށް ގެނެސް އެކުގައި މަސައްކަތް ނުކުރެވޭވަރަށް އެކަހެރިކޮށް ބާކީ ކޮށްލުމުންކަމަށް އެމްޑީޕީ އުފެދުނު އަހަރު ޕާޓީއާއި ގުޅިވަޑައިގެން މިހާތަނަށް ވެސް ޕާޓީގައި ހުންނެވި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެ އެވެ.
އެމްޑީީޕީގެ ރައީސް މުޙައްމަދު ނަޝީދަށް ތާއީދުކުރައްވާ ގިނަ މެމްބަރުންތަކެއް ވަނީ އެމްޑީޕީން ކެނޑި އާ ސިޔާސީ ޕާޓީއެއް އުފައްދާނެކަން އިއުލާނުކޮށްފަ އެވެ.
އެކަން އިއުލާނުކުރުމަށް އެ މެމްބަރުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިންތި ވަނީ މިއަދު އެމްޑީޕީގެ އަސާސްތަކާއި ޕާޓީ ފެޔަށް ޖެހިފައިވާ މިންވަރު ތަފްސީލުކޮށްދެއްވާފަ އެވެ.
އެންމެ ފުރަތަމަ ކަމެއްގެ ގޮތުގައި އިންތި ފާހަގަކުރެއްވީ ޕާޓީގެ ރައީސް މުޙައްމަދު ނަޝީދު ބާކީ ކޮށްފައިވާ ވާހަކައެވެ. އޭނާ ވިދާޅުވީ އެމްޑީޕީއަކީ އަބަދުވެސް މަޝްވަރާގެ އުސޫލު އިސްކުރާ ޕާޓީއެއް ކަމަށެވެ.
އެހެން ނަމަވެސް މި ވެރިކަން ފެށިގެން ދިއުމާއި އެކު ނަޝީދު އެކަހެރިކޮށްފައިވާ ކަމަށާއި، ކަންކަމުގައި ނަޝީދުގެ މަޝްވަރާ ނުހޯއްދަވާކަމަށެވެ.
އެކަން ކުރީ ޕާޓީ ހިޞާރުކުރަން ބޭނުންވާ ވަކި ބަޔަކު ރާވައިގެންކަމަށް އިންތިގެ ވާހަކައިގައި އިޝާރާތްކުރެއްވި އެވެ.
"އަޅުގަނޑުމެން ބައިވެރިއެއް ނުކުރޭ. ފެށުނީއްސުރެ އެކަން ހިނގަނީ އެގޮތަށް. މި ވެރިކަމަށް އައުމާއި އެކުގައި ވެރިކަން އެމްޑީޕީން ފެށުމާއި އެކުގައި، އަޅުގަނޑުމެން ބާކީ ކުރަމުން ދިޔައީ. ޚާއްސަގޮތެއްގައި އެމްޑީޕީގެ ރައީސް ބާކީކުރަމުން، އެމްޑީޕީގެ ރައީސްގެ މަޝްވަރާއެއް އެއްގޮތަކަށް ވެސް ނުހޯއްދަވާ ފެށުނީއްސުރެ އެ އަމާޒަށް ޕާޓީން މަސައްކަތް ކުރަމުން ދިޔައީ ބަޔަކު މި ޕާޓީގެ ތެރެއަށް ވެރިވެގަތުމަށް ކުރި މަސައްކަތެއްގެ ތެރޭގައި"
މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އިންތި ވިދާޅުވީ މިހާރު އެމްޑީޕީގެ ކަންކަން ނިންމަން ތިބި ފަރާތްތައް ވަނީ ޕާޓީގެ ތާރީޚުގައި ވެސް ބަޔަކު ނުވާ މިންވަރަށް އެ ޕާޓީއަށް ޚިޔާނާތްތެރިވެފައި ކަމަށެވެ.
އެތެރޭގެ އިންތިޚާބެއް ކާމިޔާބުކުރުމަށް އެމްޑީޕީގެ މެމްބަރުންތަކެއް ޕާޓީން ވަކިކުރުމަކީ އެމްޑީޕީގެ ތާރީޚުގައިވެސް ބަޔަކު ހިންގި އެންމެ ބޮޑު ޚިޔާނާތުގެ ގޮތުގައި އިންތި ސިފަކުރެއްވި އެވެ.
"އެމްޑީޕީއަށް އެންމެ ބޮޑު ޚިޔާނާތެއް ވެފައިވަނީ ވޭތުވެދިޔަ 5 އަހަރުގެ ތެރޭގައި. އެއީ އެމްޑީޕީގެ އާންމު މެމްބަރުންގެ ތެރޭގައި 39000 އާއި 40000 އާއި ގާތްކުރާ އަދަދުގެ މީހުން ތިމާމެންގެ އަމިއްލަ ޕްރައިމަރީއެއްގެ ބޭނުމުގައި، ދަހިވެތިކަމުގައި، ޕާޓީން ވަކިކޮށްފައި ވަނީ. މިވަރުގެ ބޮޑު ޚިޔާނާތެއް އެމްޑީޕީގެ ތާރީހުގައި ވެސް ނެތް އެމްޑީޕީއަކަށް ބަޔަކު ވެފައެއް"
މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އޭގެ އިތުރުން އިންތި ވިދާޅުވީ އެމްޑީޕީއަކީ އަބަދުވެސް ވައްކަމާއި ކޮރަޕްޝަނާއި ދެކޮޅަށް މަސައްކަތްކުރަމުން އައި ޕާޓީއެއް ކަމަށެވެ.
މިވެރިކަމާއި ހަމަޔައިން ފެނިގެން މިދިޔައީ ވައްކަމާއި ކޮރަޕްޝަން މެކުހަށް ޖަހާފައިވާ މަންޒަރު ކަމަށާއި، މިއަދު އެމްޑީޕީއަކީ އިންސާނުން ގަނެވިއްކުމުގެ ވިޔަފާރި ހިންގާ ޕާޓީއަކަށް ބަދަލުވެފައިވާކަމަށް އިންތި ވިދާޅުވި އެވެ. އަދި ވިދާޅުވީ އެއީ ދުވަހަކުވެސް އޭނާއަށް އެއްބަސްވެގެން ނުވަރަ ބަލައިގަނެގެން ހުރެވޭނެ ކަމެއް ނޫން ކަމަށެވެ.
"މާ މަކަރުވެރި ހީލަތްތެރި ގޮތަކަށް ޑިމޮކްރަސީގެ ނިޒާމު (މިހާރު) ހަލާކުކުރަމުން ދަނީ. މިއީ އެމްޑީޕީ އަޅުގަނޑުމެން ޤަބޫލުކުރާ ގޮތެއް ނޫން. ޑިމޮކްރަސީގެ ނިޒާމު ހަލާކުކުރުމުގެ ތެރެއިން ކުރާ އެއްބާވަތުގެ ކަމަކީ.... އިންސާނުން ގަނެވިއްކާ ބަޔަކަށް މި ޕާޓީ ވެއްޖެ. އެމްޑީޕީގެ އެތެރެއިން ގައުމީ މަޖިލީހާއި އެމްޑީޕީގެ ޕާލަމެންޓްރީ ގުރޫޕު ސަރުކާރުން ބޭނުންގޮތަކަށް ރަބާ ސްޓޭމްޕު ޖަހާ ބައެއްގެ ގޮތަށް ބަދަލުކުރުމަށްޓަކައި ގަނެވިއްކާ ބައެއްގެ ގޮތުގައި ހަދާ މިހާރު އެގޮތަށް ނިންމައިފި"
މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އިންތި ވިދާޅުވީ އެމްޑީޕީން ވަކިވީ އުފަލުން ނޫން ކަމަށެވެ. އަދި އާ ޕާޓީއެއް އުފައްދާ ވާހަކަ އިއުލާނުކުރުމަކީވެސް ލިބިގެންދާ މާ ބޮޑު އުފަލެއް ނޫން ކަމަށެވެ.
އެހެން ނަމަވެސް ނެތެމުންދާ އެމްޑީޕީގެ އަސާސްތައް ނަގަހައްޓާ، އެމްޑީޕީގެ ފިކުރު ދަމަހައްޓަން އާ ސިޔާސީ ޕާޓީއެއް އުފައްދަން ޖެހޭކަން އޭނާ ފާހަގަކުރެއްވި އެވެ. އަދި އެ ފިކުރުގައި މަސައްކަތް ކުރަން ބޭނުންވާ ހުރިހާ ފަރާތްތަކަށް އެ ސިޔާސީ ޕާޓީއާއި ގުޅިގެން މަސައްކަތް ކުރުމުގެ ފުރުސަތު އޮންނާނެކަން އިންތި ފާހަގަކުރެއްވި އެވެ.
އެއާއެކު އިންތި ވިދާޅުވީ އާ ސިޔާސީ ޕާޓީއެއް އުފެއްދުމަކީ މި ސަރުކާރާއި މެދު، އަދި އެމްޑީޕީ މިހާރު ހިންގަމުންދާ ގޮތާއި މެދު މާޔޫސްވެފައިވާ އެތައް ބަޔަކަށް އުންމީދެއް ލިބިގެންދާނެ ކަމެއް ދެކިވަޑައިގަންނަވާ ކަމަށެވެ.
Advertisement
This content is created and paid for by advertisers and does not involve Voice Journalists
