ދިވެހިރާއްޖެއާއި ޗާގޯސްއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ސަރުކާރުގެ އިހުމާލުން ގެއްލިގެން ދިޔަ ދިވެހިރާއްޖޭގެ ކަނޑުގެ ސަރަހައްދު ހޯދުން އަވަސްކުރުމަށް ގޮވާލާ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު ހުށައެޅުއްވި ޤަރާރު މަޖިލީހުން ބޭރުކޮށްލައިފި އެވެ. 

އާދަމް ޝަރީފު ހުށައެޅުއްވި އެ ގަރާރުގައި ބުނެފައިވަނީ ދިވެހިންނަކީ ޒަމާނުއްސުރެ މަސްވެރިކަމުން ކެއިންބުއިމާއި އަސާސީ ބޭނުންތައް ފުއްދަމުން އައި ބައެއް ކަމަށާއި އިގްތިސޯދީ ސަރަހައްދުން 200 ނޯޓިކަލް މޭލު ބޭރަށް ނުކުމެވޭ ވަރަށް ބޮޑެތި އޮޑިދޯނިފަހަރު އުފައްދާފައިވާ ކަމަަށެވެ.

ނަމަވެސް އައްޑޫ ދެކުނުން އޮންނަ މަސްކަނޑުން 45،331 އަކަކިލޯމީޓަރު ރާއްޖެއަށް ގެއްލޭގޮތަށް އިޓްލޮސްއިން ނިންމިއިރު ދިވެހި ސަރުކާރުން ދިވެހި މަސްކަނޑުގެ ދިފާއުގައި ނުނިކުންނަ ކަމަށް އެ ގަރާރުގައި ފާހަގަ ކުރިއެވެ.

ދިވެހިރާއްޖޭގެ ހާއްސަ އިގްތިސޯދީ ސަރަހައްދުގެ ތެރޭގައި ހިމެނޭ ކަނޑުގައްޔާއި، ކަނޑުގެ އަޑީގެ ބިމުގައިވާ ދިރުންހުރި އަދި ދިރުމެއްނެތް ޠަބީޢީ އަގުހުރި ހުރިހާ އެއްޗެއް މިލްކުވެގެން ވަނީ ދިވެހި ދައުލަތަށް ކަމަށް ގާނޫނުގައި ބަޔާންކުރާއިރު، އަދި ދިވެހި މަސްކަނޑަކީ ރާއްޖޭގެ އިގްތިސޯދީ ބާރުތަކާ ގުޅުންހުރި ތަނަކަށްވާއިރު ރާއްޖެއަށް ގެއްލުން ލިބޭ ފަދަ ގޮތަކަށް ސަރުކާރުގެ ސްޓޭންޑް ބަދަލު ކުރުމުގެ ސަބަބުން ލިބުނު ގެއްލުމަށް ދިވެހިންގެ ކިބައިން ސަރުކާރުން މައާފަށް އެދުމަށް އެ ގަރާރުގައި ވަނީ ގޮވާލާފައެވެ.

މީގެ އިތުރުން އެ ގަރާރުގައި ބުނީ އިޓްލޮސްގެ ނިންމުން ދިވެހިން ބަލައި ނުގަންނަ ކަމަށެވެ. އަދި އެ ނިންމުން މުރާޖަޢާ ކުރުމަށް ދިވެހި ސަރުކާރުގެ ފަރާތުން ހުށަހަޅަން ޖެހޭ ކަމަށާއި ދިވެހި މަސްކަނޑުން ގެއްލުނުބައި ހޯދުމަށް ކުރަންޖެހޭ ކަންތައްތައް އަވަހަށް ފަށަން ޖެހޭ ކަމަށެވެ.

އެ ގަރާރަށް ބަހުސް ކުރުމަށް މަޖިލީހުގައި މިއަދު ނެގި ވޯޓުގައި ބައިވެރިވެވަޑައިގެންނެވީ 51 މެންބަރުންނެވެ. އެ ގަރާރު ބަލައިގަތުމާ ދެކޮޅަށް 33 މެންބަރުން ވޯޓު ދެއްވި އިރު ފެންނަ ކަމަށް ވޯޓު ދެއްވީ 18 މެންބަރުންނެވެ.

އެ ޤަރާރު ފާސްކުރުމަށް 26 މެމްބަރުންގެ ވޯޓު ބޭނުންވާނެއެވެ. އެހެންކަމުން އެ ޤަރާރު ބަލައިގަންނަން ފާސްވެފައިނުވާތީ ވަނީ ބޭރުކޮށްލާފަ އެވެ.