ތާރީހުގައި ދިވެހިރާއްޖެ އެންމެ ގިނަ ދުވަސް ވަންދެން އެ ބައެއްގެ އަޅުވެތިކަމުގެ ދަށުގައި އޮތް ޕޯޗުގީޒުންވެސް ރާއްޖޭގެ މަސް ކަނޑުން ބައެއް ވިއްކާލާފައި ނުވާކަމަށާއި، މަސް ކަނޑު ވިއްކާލި ހަމައެކަނި ސަރުކާރަނީ ރައީސް އިބްރާހިމް މުޙައްމަދު ޞާލިހުގެ ސަރުކާރުކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ. 

އަލީ ހުސެއިން މިފަދައިން ވިދާޅުެވފައިވަނީ ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިޔައީ ސަރުކާރުގެ އިހުމާލުންކަން ފާހަގަކޮށް ރައްޔިތުންގެ މަޖިލީހުގެ ދެވަނަ ދައުރުގެ ފުރަތަމަ ޖަލްސާގައި ވާހަކަދައްކަވަމުން ނެވެ. 

އޭނާ ވިދާޅުވީ ރާއްޖޭގެ ކަނޑުގެ ސަރަހައްދުން ބައެއް ދޫކޮށްލުމަކީ ނުވަތަ ވިއްކާލުމަކީ ދިވެހި ތާރީހުގައި ވެސް ބަޔަކު ކޮށްފައިވާ ކަމެއް ނޫން ކަމަށެވެ. އަދި މި ސަރުކާރުން އެކަން ކުރީތީ ވަރަށް ބޮޑަށް ހިތާމަކުރައްވާކަމަށް އަލީ ހުސެއިން ވިދާޅުވި އެވެ. 

Advertisement

އަލީ ހުސެއިން ވިދާޅުވީ ދިވެހިރާއްޖޭގެ ޤާނޫނުގައި ރާއްޖޭގެ އެކްސްކުލޫސިވް އިކޮނޮމިކް ޒޯނަކީ ކޮބައިކަން ސާފުކޮށް ބަޔާންކޮށްފައިވާ ކަމަށެވެ. އަދި މިހާތަނަށް އަމަލުކުރަމުން ވެސް އައީ އެ ގާނޫނުގައި ބަޔާންކޮށްފައިވާ ސަރަހައްދަކީ ދިވެހިންގެ ތަނެއްގެ ގޮތުގައި ދެކިގެން ކަމަށެވެ. 

އެހެން ނަމަވެސް ރައީސުލްޖުމްހޫރިއްޔާއަށް ހައިސިއްޔަތު ލިބިވަޑައިގެންފައިވާ ނުވާ ސިއްރު ސިޓީފުޅެއް ފޮނުވައިގެން ރާއްޖޭގެ ކަނޑުގެ ސަރަހައްދުން ބައެއް ވިއްކާލާފައިވާ ކަމަށާއި، މިއީ އެއްވެސް ސަރުކާރުން ކޮށްފައިވާ ކަމެއް ނޫންކަމަށް އަލީ ހުސެއިން ވިދާޅުވި އެވެ. 

އެއާއެކު އޭނާ ވިދާޅުވީ މި ކަމުގެ ސަބަބުން ރާއްޖޭގެ މަސްވެރިކަމުގެ ސިނާއަތަށް ބޮޑު ގެއްލުމެއް ލިބިގެންދާނެ ކަމަށެވެ. ފަހަރެއްގައި އެކަމުގެ އަސަރުތައް ހަފްތާއެއްގެ ތެރޭ ނުވަތަ މަސް ދުވަސްތެރޭ ނުފެނިދާނެކަން އޭނާ ފާހަގަކުރެއްވި އެވެ. 

އެހެން ނަމަވެސް ރާއްޖޭގެ ކަނޑުގެ ސަރަހައްދުގެ ގޮތުގއި ބަލަމުން އައި ސަރަހައްދުން ސަރުކާރުގެ އިހުމާލުން ގެއްލިގެން ދިޔަ ބައިން ދާއަޅައިގެން މަސްވެރިކަން ކުރަން ފެށުމުން އެކަމުގެ ނޭދެވޭ އަސަރުތައް ދެކުނުގެ މަސްވެރިންނަށް ކުރާނެ ކަމަށާއި، އަދި އެއީ އިޔާދަ ނުކުރެވޭނެ ވަރުގެ ގެއްލުމަކަށް ވެގެންދާނެކަމަށް އަލީ ހުސެއިން ވިދާޅުވި އެވެ. 

ކަނޑުގެ ސަރަހައްދުން ގެއްލުނު ބައި ހޯދުމަށް ގިނަ ސިޔާސީ ޕާޓީތަކާއި ލީޑަރުން ހިމެނޭހެން އިއްތިހާދެއް ހަދާފައިވާއިރު، ކަނޑުވިއްކާލުމާއި ދެކޮޅަށް ޕެޓިޝަނެއްގައި ސޮއިކުރަން ވެސް ވަނީ ފަށާފައެވެ. އަދި އެ މައްސަލައާއި ގުޅިގެން ބަންޑާރަނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަަލަ ވެސް ވަނީ މަޖިލީހަށް ހުށައަޅާފަ އެވެ.