މަޖިލިސްގެ މެންބަރެއްގެ ނަން އިއްވުމުން ޖަލްސާ ދޫކޮށް ދިއުމަށް އިންކާރުކޮށްފިނަމަ، އެމެންބަރަކު ޖަލްސާގައި ނެތްކަމަށް ބަލައި ޖަލްސާ ކުރިއަށް ގެންދިއުމަކީ މަޖްލިސްގެ ގަވާއިދާ ހިލާފްކަމެއް ނޫން ކަމަށް ރައްޔިތުން މަޖްލިސްގެ ވިލިމާލެ ދާއިރާގެ މެމްބަރު އަހްމަދު އުޝާމް ވިދާޅުވެއްޖެއެވެ.
އުޝާމް މިހެން ވިދާޅުވެފައިވަނީ މިއަދުގެ ރައްޔިތުންގެ މަޖިލިސްގައި އައްޑޫ މީދޫ ދާއިރާގެ މެމްބަރު ރޮޒައިނާ އާދަމްގެ ނަން އިއްވާ، މަޖިލީސް ތަޅުމުން ނިކުތުމަށް މަޖިލީހުގެ ރިޔާސަތުން އެންގެވުމުން ދެކޮޅު ހެއްދަވާ، ޖަލްސާގައި ރޮޒައިނާ ނެތް ކަމަށް ބަލައި މަޖިލީހުގެ ރައީސް މުހައްމަދު ނަޝީދު ޖަލްސާ ކުރިއަށް ގެންދެވުމާއި ގުޅިގެންނެެވެ.
އެގޮތުން އުޝާމް ވިދާޅުވެފައިވަނީ މަޖިލީހުގެ މެންބަރެއްގެ ނަން އިއްވުމުން ނިކުންނަން އިންކާރުކޮށްފިނަމަ، އެމެންބަރަކު ޖަލްސާގައި ނެތްކަމަށް ބަލައި ޖަލްސާ ކުރިއަށް ގެންދިއުމަކީ މަޖިލީހުގެ ގަވާއިދުގެ ދަށުން މަޖިލީހުގެ ރައީސްއަށް ލިބިދީފައިވާ ބާރެއް ކަމަށެވެ.
މި މާއްދާ ޓްވީޓްގައި އެކުލަވާލައި އުޝާމް އިތުރަށް ވިދާޅުވީ އެހެންކަމުން މިއީ މަޖްލީހުގެ ގަވަައިދާއި ޚިލާފުކަމެއް ނޫން ކަމަށެވެ.
ޗުއްޓީއިން އެނބުރިއައިސް ރައްޔިތުންގެ މަޖިލީހުގެ ދެ ވަނަ ދައުރުގެ ފުރަތަމަ ޖަލްސާ މިއަދު ފަށާފައިވާއިރު، އެމްޑީޕީގެ ތެރޭގައި އުފެދިގައިވާ ބައިބައިވުންތަކާއި މެމްބަރުންގެ މެދުގައި އޮތް ރުޅިވެރިކަން މިއަދުގެ ޖަލްސާގައި ވަނީ ފަޅައިގެންގޮސްފަ އެވެ.
މަޝްރަހު އެންމެ ބޮޑަށް ހޫނުވެގެން ދިޔައީ ފެނަކަ ކޯޕަރޭޝަނުން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސް ކުރުމަށާއި، ފެނަކައިގެ ފައިނޭންސް އަދި މެނޭޖުމަންޓު އޮޑިޓެއް ހެދުމަށާއި ދަރަނި އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލާ ހުށައެޅި ޤަރާރަށް ބަހުސްކުރަމުން ދިޔަ ވަގުތުތައެވެ.
އެ ޤަރާރަށް އެމްޑީޕީން ވަކިވެވަޑައިގެން މެމްޑިޕީގެ މެމްބަރުން ވާހަކަދައްކަވަން ފެއްޓެވުމާއެކު ސަރުކާރު ފަޅީގެ މެމްބަރުން ނިޒާމީ ނުގުތާތައް ފުލުފުލުގައި ނަގާ އެ މޭރުމުން ވާހަކަ ނުދެއްކޭނެކަމަށް ދިޔައީ ބުނަމުންނެވެ. އަދި އެ މެމްބަރުންނަށް ވަގުތު ދެނީ ކޮން އުސޫލަކުންތޯ ތަކުރާރުކޮށް ރިޔާސަތަށް ދިޔައީ ސުވާލުކުރަމުންނެވެ.
ރައްޔިތުންގެ މަޖިލީހުގެ ކުޅުދުއްފުށީ އުތުރުދާއިރާގެ މެމްބަރު ޔާސިރު އަބްދުއްލަތީފު ވާހަކަ ދައްކަވަމުން ދިޔައިރު މެމްބަރު ރޮޒައިނާ ގެންދެވީ ހަޅޭއްލަވާ އަޑުގަދަ ކުރަމުންނެވެ.
އެކަމާއި ގުޅިގެން ރިޔާސަތުން ވަނީ 3 ފަހަރު ރޮޒައިނާގެ ނަން އިއްވުމަށްފަހު މަޖިލީސް ދޫކުރައްވާ ވަޑައިގަތުމަށް އެދިވަޑައިގަންނަވާފަ އެވެ.
އެހެން ނަމަވެސް ރޮޒައިނާ މަޖިލީސް ދޫކޮށް ވަޑައިގަތުމަށް ދެކޮޅު ހައްދަވައި ވިދާޅުވަމުން ގެންދިޔައީ އޭނާއަށް ނަން އިއްވާފައިވަނީ ގަވައިދާއި ޚިލާފަށް ކަމަށެވެ.
އެކަމާއި ގުޅިގެން މަޖިލީސް ހޫނުވެ، ރިޔާސަތުން ވަނީ ކުޑަވަގުތުކޮޅަކަށް މަޖިލީސް މެދުކަނޑާލުމަށްފަހު އަނެއްކާވެސް ޖަލްސާ ކުރިއަށް ގެންދިޔައިރުވެސް ރޮޒައިނާ މަޖްލީސްް ތަޅުން ދޫކޮށް ދިއުމަށް އިންކާރުކޮށފައިވާތ، ޖަލްސާގައި ރޮޒައިނާ "ނެތް ކަމަށް ބަލައި" ޖަލްސާ ކުރިއަށް ގެންގޮސްފައެވެ.
Advertisement
This content is created and paid for by advertisers and does not involve Voice Journalists
