ރެޑްވޭވް މެގަމޯލް ކައިރީގައި ހަދާފައިވާ އުނިމާ ޕާކިން ޒޯނުން ކާރު ޕާކު ކުރާނެ ޖާގަ ކުއްޔަށް ދިނުމަށް އަރބަންކޯ އިން ހުޅުވާލައިފިއެވެ. 

އެގޮތުން މިކަމާއި ގުޅިިގެން މިއަދު އަރބަންކޯއިން ނެރުން ބަޔާނެއްގައި ބުނެފައިވަނީ ބީލަމުގެ އުސޫލުން ދޫކުރުމަށް ޖުމުލަ 10 ޖާގަ ހުޅުވާލާފައިވާއިރު ބީލަން ފެށޭ އަގަކީ 1500 ރުފިޔާ ކަމަށެވެ. އަދި މި ޖާގަތައް ކުއްޔަށް ދިނުމަށް ކަނޑައެޅިފައިވަނީ މީލާދީ ގޮތުން 12 މަސްދުވަހުގެ މުއްދަތަކަށް ކަމަށެވެ.

މިއާއިއެކު ބީލަމުގައި ބައިވެރިވުމަށް އެދި ހުށަހަޅާ ފަރާތްތަކުގައި ހުންނަން ޖެހޭ ޝަރުތު ތަކުގެ ތެރޭގައި، ދިވެހި ރައްޔިތެއް ކަމުގައިވުން، އުމުރުން 18 އަހަރު ފުރިފައިވުން، އަދި އެ ފަރާތެއްގެ ނަމުގައި ރަޖިސްޓްރީ ކޮށްފައިވާ ކާރަކަށް ޕާކު ކުރަން ބޭނުންވާ ކާރު ވުން ހިމެނޭ ކަމަށް އަރބަންކޯއިން ވަނީ ބުނެފައެވެ.

Advertisement

އަދި އެފަރާތަކީ އަރބަންކޯ މިވަގުތު އެއްވެސް ޕާކިން ޖާގައެއް ކުއްޔަށް ހިފާފައިވާ ފަރާތެއް ކަމުގައި ވެގެން ނުވާނެ ކަމަށް ވެސް އެ ކުންފުނިން ވަނީ ފާހަގަކޮށްފައެވެ.

މި ޖާގަތަކަށް ކުރިމަތިލާ ފަރާތްތަކަށް ޕޮއިންޓު ދިނުމުގައި ބީލަމުގެ ގޮތުގައި ހުށަހަޅާ އަގަށް 80 ޕޮއިންޓު، އަދި އެ ނޭބަރހުޑްގައި ދިރިއުޅޭ ފަރާތްތަކަށް 20 ޕޮއިންޓު ކަނޑައަޅާފައި ވެއެވެ. މި ބީލަމާބެހޭ އިތުރު މައުލޫމާތު މި ލިންކުން ލިބޭނެއެވެ. bit.ly/3Wf9MQL

އަރބަންކޯއިން އިތުރަށް ބުނެފައިވަނީ މިކަމުގެ މައިގަނޑު މަގުސަދަކީ ހުޅުމާލޭގައި ދިރިއުޅޭ ރައްޔިތުންނަށް ހުޅުމާލޭގައި ފަސޭހަ ކަމާއި އަދި ހަމަހަމަ ކަމާއެކު ކާރު ޕާކު ކުރުމަށް މަގުފައި ކޮށްދިނުން ކަމަށާއި ޖާގައިގެ ދަތިކަމުގެ ސަބަބުން ވެހިކަލް ޕާކު ކުރުމަށް ދިމާވާ ދަތިތައް ހައްލު ކުރުމަށް އަރބަންކޯއިން އަންނަނީ ގިނަގުނަ މަސައްކަތް ތަކެއް ކުރަމުން ކަމަށެވެ.

އެގޮތުން ދިވެހިރާއްޖޭގެ އެންމެ ފުރަތަމަ ސްމާޓް ޕާކިންގ ސޮލިއުޝަން އެ ކޯޕަރޭޝަނުން މި ހަފުތާ ތެރޭގައި ތައާރަފު ކޮށްފައިވާއިރު ފުރަތަމަ ސްމާޓް ޕާކިންގ ޒޯންގެ ގޮތުގައި ހުޅުމާލޭގެ ފެރީ ޓާމިނަލް ސަރަހައްދުގައިވާ ފިތުރޯނު ސްމާޓް ޕާކިންގ ޒޯނު ހުޅުވައި، އިތުރު ސްމާޓް ޕާކިންގ ޒޯނުތައް ތައާރަފު ކުރުމުގެ މަސައްކަތް އަރބަންކޯއިން މި ވަގުތު ދަނީ ކުރަމުންނެވެ.

މިއާއިއެކު ރައްޔިތުންނަށް ވީހާވެސް ލުއިފަސޭހަ އިންގިލާބީ ބަދަލެއް ޕާކިންގެ ކަންކަމަށް ގެނައުމަކީ އެ ކުންފުނީގެ އުއްމީދެއް ކަމަށް އަރބަންކޯއިން ވަނީ ފާހަގަކޮށްފައެވެ.