ދިވެހިރާއްޖެ ތަރައްޤީ ކޮށް، ދަރަނިން ސަލާމަތްވެފައިވާ ގައުމަކަށް ހެދުމަށް، ޖުމްހޫރީ ޕާޓީ އާއި ގުޅިގެން ކުރިއަށް އޮތް ރިޔާސީ އިންތިހާބުގައި މަސައްކަތް ކުރުމަށް އެ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހީމް އެދިވަޑައިގެންފިއެވެ.
ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ ގޮތުން ޖުމްހޫރީ ޕާޓީން އަންނަނީ އެ ޕާޓީގެ މެންބަރުން އިތުރު ކުރުމުގެ މަސައްކަތް ކުރަމުންނެވެ. އެގޮތުން ގިނަ މެންބަރުން ތަކެއް އެ ޕާޓީއާއި މިހާރުވެސް ގުޅެމުންދާއިރު، އިއްޔެ ވެސް އެކި ދާއިރާތަކުން ޖޭޕީއާ އަލަށް 600 އަށް ވުރެ ގިނަ މެމްބަރުން ވަނީ ގުޅިފަ އެވެ.
އޭގެތެރޭގައި އއ. ތޮއްޑޫ ދާއިރާ އާއި، މަތިވެރި ދާއިރާއާއި، ހދ. މަކުނުދޫ ދާއިރާ އާއި، ގަލޮޅު އުތުރު ދާއިރާ އާއި, ރ. ދުވާފަރު ދާއިރާ އާއި، ހއ. ދިއްދޫ ދާއިރާ އާއި، މާފަންނު ހުޅަނގު ދާއިރާ އާއި، ށ. ކަނޑިތީމު އަދި ރ. އުނގޫފާރު ދާއިރާއިން ގުޅުނު 282 މެންބަރުން ހިމެނެއެވެ.
އެކަމާއި ގުޅިގެން އެ މެންބަރުންނަށް މަރުހަބާ ދަންނަވައި ކުރެއްވި ޓްވީޓެއްގައި ގާސިމް ވަނީ އެކަމުގައި އިސްކޮށް ހަރަކާތްތެރިވި ފަރާތްތަކަށް ޝުކުރު އަދާކުރައްވާ ފައެވެ.
އަދި ގައުމުގެ ކުރިމަގު އުޖާލާކޮށް، ރައްޔިތުންނަށް ހަމަޖެހުމާއި ތަރައްގީ ގެނެސް، ދަރަނިން ސަލާމަތްވެފައިވާ ގައުމަކަށް ދިވެހި ގައުމު ހެދުމަށް ޖޭޕީއާއެކު ކުރިއަށް އޮތް ރިޔާސީ އިންތިހާބުގައި ވީހާ ވެސް ގިނަ ރައްޔިތުން ބައިވެރިވުމަށް އެދޭ ކަމަށް ޤާސިމް ވަނީ ވިދާޅުވެފައެވެ.
"އިރާދަކުރެއްވިއްޔާ މިއީ ޖޭޕީގެ ފަހަރު،" ގާސިމް ވިދާޅުވި އެވެ.
ކުރިއަށް އޮތް ރިޔާސީ އިންތިހާބުގައި ގާސިމް ވާދަކުރައްވަން އިއުލާން ކުރައްވައި ކެންޕޭނުގެ މަސައްކަތް ޕާޓީން ވަނީ ފަށާފައެވެ. އެގޮތުން ކެމްޕޭން މެނޭޖަރަކަށް ހަމަޖައްސާފައި ވަނީ އޭނާގެ ސްޕެޝަލް އެންވޯއީ އިލްހާމް އަހުމަދާއި ޖޭޕީގެ ޑެޕިއުޓީ ލީޑަރު އަމީން އިބްރާހިމް އެވެ.
Advertisement
This content is created and paid for by advertisers and does not involve Voice Journalists
