ދިވެހިރާއްޖެއިން ޔޫރަޕުގެ ޤައުމުތަކަށް ބޭރުކުރާ މަހުން ނަގާ ޑިއުޓީ ކަނޑާލުމަށް ކުރަން ޖެހޭ އެއްވެސް މަސައްކަތެއް ފޮރިން މިނިސްޓަރު އަބްދުالله ޝާހިދު ނުކުރައްވާކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ބޮންޑާ މިފަދައިން ވިދާޅުވެފައިވަނީ ދިވެހިރާއްޖޭގެ ކަނޑުގެ ސަރަހައްދުން ބައެއް މޮރިޝަސްއަށް ލިބުމާއި ގުޅިގެން މަސްވެރިކަމަށް ކުރާނެ އަސަރުތަކުގެ ވާހަކަތައް ބަޔާންކޮށް ޗެނަލް-13 ގެ ޕްރޮގްރާމެއްގައި ވާހަކަދައްކަވަމުން ނެވެ.
ބޮންޑާ ވިދާޅުވީ މޮރިޝަސްއިން ޔޫރަޕުގެ ގައުމުތަކަށް ބޭރުކުރާ މަހުން ޑިއުޓީއެއް ނަގަމުން ނުދާކަމަށެވެ. އެހެން ނަމަވެސް ރާއްޖެއިން ބޭރުކުރާ މަހުން 22 ޕަސެންޓުގެ ޑިއުޓީއެއް ނަގާކަމަށެވެ.
އަނެއްކޮޅުން މޮރިޝަސްއަކީ މަސްވެރިކަން ކުރާ ޤައުމަކަށް ނުވެފައި، އެމީހުންގެ ވިޔަފާރިއަކީ އެމީހުންގެ ކަނޑުތަކުން ދާއެޅުމަށް ލައިސެންސް ދޫކުރުންކަމަށް ވާއިރު، ރާއްޖޭގެ ކަނޑުގެ ސަރަހައްދުން މޮރިޝަސްއިން ދާ އަޅަން ފަށައިފިނަމަ ލިބޭނެ ގެއްލުން އެތައް ގުނައެއް ބޮޑުވެގެންދާނެކަމަށް ބޮންޑާ ވިދާޅުވި އެވެ.
އޭނާ ވިދާޅުވީ އީޔޫއިން ރާއްޖެއިން ބޭރުކުރާ މަހަށް ނަގާ ޑިއުޓީ ކުޑަކުރާނެކަމަށް ސަރުކާރުން އެތައް ފަހަރެއްގެ މަތިން ބުނެފައިވާކަމަށެވެ.
އެހެން ނަމަވެސް ފޮރިން މިނިސްޓަރު ޝާހިދު އެއް ގައުމުން އަނެއް ގައުމަށް ދަތުރުތައް ކުރައްވަމުން ގެންދަވަނީ ގައުމުތަކަށް ބޭނުންވާ ވޯޓު ހޯދައިދިނުމަށް ލޮބީކުރުމަށް ކަމަށް ބޮންޑާ ވިދާޅުވި އެވެ.
ރާއްޖެއިން ބޭރުކުރާ މަހުން ނަގާ ޑިއުޓީ ކަނޑާލުމުގެ އެއްވެސް މަސައްކަތެއް ސަރުކާރުން ކުރަމުން ނުދާ ކަމަށާއި، ޝާހިދު މަސައްކަތް ކުރައްވަނީ އޭނާގެ ވަކި އެޖެންޑާއެއް ހާސިލުކުރުމަށް ކަމަށް ބޮންޑާ ވިދާޅުވި އެވެ.
"މި 22 ޕަސެންޓަކީ، ޔޫރަޕިއަން ޔޫނިއަނުން މި ނަގާ ރާއްޖެއިން އެކްސްޕޯޓުކުރާ މަހުން ނަގާ 22 ޕަސެންޓަކީ މަސްވެރިންގެ ޖީބަށް ވަންނާނެ ފައިސާ. އަޅުގަނޑުމެން ދާދި ފަހުން މި ވާހަކަ ދެއްކީމަ ވެސް އަބްދުالله ޝާހިދު ވިދާޅުވީ ކެނޑެނީ.. ކަނޑަނީ.. ކަނޑަނީ.. އަޅުގަނޑު ވަކިން ފޯނުކޮށްގެން ކަނޑައަޅާފައި ތިބޭ އެހެން ސަފީރުންނާއި ހިސާބަށް ވާހަކަދެއްކިން މި ކަން ކޮށްދޭން. އެކަމަކު މިހާތަނަށް ފޮރިން މިނިސްޓްރީން ނެތް އެކަމެއް ކޮށްފަ، އެމީހުން ކޮންމެސް އެހެން ކަމެއް ކުރަނީ. އެމީހުންގެ އަމިއްލަ ކަންކަން ކުރަނީ. ރުވަންޑާއާއި މި ތަންތަނަށް ގޮއްސަ އެއީ ބޭރުގައުމުތަކަށް ބޭނުންވާ ވޯޓު ހޯދަން ލޮބީކުރަން...އަބްދުالله ޝާހިދު ވޯޓު ހޯދަން މި ހިނގަނީ ކަޅުދަބަސް ހިފައިގެން"
މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ)
ބޮންޑާ އިތުރަށް ވިދާޅުވީ ހަގީގަތުގައި މިހާރު ރާއްޖޭގައި ފޮރިން މިނިސްޓަރެއް ނެތް ކަމަށެވެ.
ފޯޅަވަހި މައްސަލައިގައި ކަނޑުގެ ސަރަހައްދުން ބައެއް ގެއްލިގެން ދިއުމުގައި ވެސް ޝާހިދުގެ އިހުމާލު އޮތް ކަމަށާއި، ކަނޑުގެ ސަރަހައްދު ދޫކޮށްލީ 500 މިލިއަން ޑޮލަރުގެ ޑީލެއް ހަދައިގެން ކަމަށާއި، އެ ޑީލު ހެދުމުގައި އިސްކޮށް އުޅުއްވީ ވެސް ޝާހިދުކަމަށް ބޮންޑާ ވަނީ ތުހުމަތުކުރައްވާފަ އެވެ.
އެ މައްސަލައާއި ގުޅިގެން ޝާހިދުގެ އިތުބާރު ނެތްކަމުގެ މައްސަލަ ވެސް ވަނީ ރައްޔިތުންގެ މަޖިލީހަށް ހުށައަޅާފަ އެވެ.
Advertisement
This content is created and paid for by advertisers and does not involve Voice Journalists
