މިއަހަރު ތެރޭގައި ބޮޑުބައި ނިންމަވާނެ ކަމަށް ވިދާޅުވި 61 ޕޮލިސް ސްޓޭޝަންގެ މަސައްކަތް އަދި ފެށޭނެ އިރެއްވެސް އެނގިވަޑައިނުގަންނަވާ ކަމަށް ހޯމް މިނިސްޓަރު ޢިމްރާން އަބްދުالله ވިދާޅުވެއްޖެ އެވެ.
މުޖުތަމަޢުގެ ރައްކާތެރިކަމާއި، ރައްޔިތުންގެ ހައްގުތައް ކަށަވަރު ކުރުމަށްޓަކައި، އަތޮޅުތެރޭގައި ހިންގޭ ކުށްތައް ހުއްޓުވައި އަމާން މާހައުލެއް ޤާއިމްކުރުމަށް 61 ޕޮލިސް ސްޓޭޝަން މިއަހަރު ޤާއިމްކުރުމުގެ މަސައްކަތް މިއަހަރުގެ އޭޕްރީލް މަހުގެ ތެރޭގައި ފަށްޓަވާނެކަމަށް މިއަހަރުގެ ފެބްރުއަރީމަހުގެ 15 ވަނަ ދުވަހު އޮތް މަޖިލީހުގެ ޖަލްސާގައި ޢިމްރާން ވަނީ ވިދާޅުވެފަ އެވެ. އަދި އޭގެ ތެރެއިން ބައެއް ސްޓޭޝަން ތަކުގެ މަސައްކަތް މިއަހަރު ތެރޭގައި ނިންމާލެވޭނެ ކަމަށްވެސް ޢިމްރާން ވިދާޅުވިއެވެ.
އެހެންނަމަވެސް، އެތަނުން އެއްވެސް ޕޮލިސް ސްޓޭޝަނެއްގެ މަސައްކަތް މިހާތަނަށްވެސް ފެށިފައި ނުވާއިރު, ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު އަބްދުالله ރިޔާޒު ވަނީ އެ ޕްރޮޖެކްޓް ގެ މަސައްކަތް ތަކާއި ގުޅޭގޮތުން މިއަދުގެ ޖަލްސާގައި ޢިމްރާން އާއި ސުވާލު ކުރައްވާފައެވެ.
އެ ސުވާލުގެ ޖަވާބުގައި ޢިމްރާން ވިދާޅުވީ އެ މަޝްރޫއު އަކީ އިންޑިއާގެ އެގްޒިން ބޭންކުގެ ފައިނޭންސުން ކުރިއަށްގެންދާ މަޝްރޫޢޫއެއްކަމަށެވެ.
"އެ ޕްރޮޖެކްޓް ކުރިއަށް ގެންދިޔުމަށް ރާއްޖޭގެ ފަރާތުން ކުރަންޖެހޭ ކަންކަން 7 މާރިޗު 2023 ގައިވަނީ ކޮށް ނިމިފައި. މިހާރު ފައިނޭންސް ގެ މަސައްކަތް ހަމަޖެހުމާއި އެކުގައި މަސައްކަތް ފެށުމަށް، ކޮންޓްރެކްޓަރ ވެސް ވަނީ ހުރިހާ ކަމެއް ޢަމަލީ ގޮތުން ފެށުމަށް ނިންމާފައި. މިހާރު އަޅުގަނޑުމެންނަށް އޮތީ ފައިނޭންސް ގެ ކަންކަމަށް ބޭނުންވާ ލިޔެ ކިޔުންތައް ހަމަޖެހި، އެކަން ޢަމަލީ ގޮތުން ފެށުން. ފައިނޭންސް ގެ ކަންކަން ހަމަޖެހުމުން އިރާދަކުރެއްވިޔާ ފެށޭނެ ކަމަށް. އަޅުގަނޑުމެން އުއްމީދު މިކުރަނީ މި އަހަރު ފެށޭނެ ކަމަށް."
"ދެން އަޅުގަނޑުމެންނަށް އެގްޒިން ބޭންކުން ހަމަޖެހޭ ފައިނޭންސް ވީމާ ސީދާ ހަމަޖެހޭނީ ކޮންދުވަހަކު ކަމެއް ބުނާކަށް ނޭނގެ. އެހެންނަމަވެސް އެ ބޭފުޅުން ވީ އެންމެ އަވަހަށް ކޮށްދޭނެ ކަމަށް ވިދާޅުވަނީ. ކޮންޓްރެކްޓަރ މިހާރު ހުރީ ތައްޔާރަށް. ފައިނޭންސް ގެ ކަންކަން ހަމަޖެހުމާއި އެކު އެކަން ފަށައިގަތުމަށް އަޅުގަނޑުމެން މިތިބީ އެކަމަށް ތައްޔާރުވެ."
ހޯމް މިނިސްޓަރު އިމްރާން އަބްދުالله
ޢިމްރާންގެ ޖަވާބާއި ގުޅިގެން ރިޔާޒް ވަނީ ފާއިތުވު އަހަރުގެ މާރިޗު މަހުގެ 21 ވަނަ ދުވަހުގެ މަޖިލީހުގެ ޖަލްސާގައި އެ ޕްރޮޖެކްޓް ގެ މަސައްކަތް މިދިޔަ އަހަރު ފެށި، މިއަހަރު ނިމެންވާއިރު %80 އިންސައްތަ ނިމޭނެ ކަމަށް އިމްރާން ވިދާޅުވި ކަން ހަނދުމަކޮށްދެއްވާފައެވެ. އަދި އެދުވަހު ހެއްދެވީ އިތުރުފުޅު ތޯވެސް ސުވާލު ކުރައްވާފައެވެ.
އެއާއެކު ޢިމްރާން ވަނީ އޭރު ވާހަކަ ދެއްކެވީ ކަންކަން އޭރު ނިންމޭނެ ކަމަށް ލަފާކުރެވިފައި ހުރި ގޮތަށް ކަމަށް ވިދާޅުވެފައެވެ. އަދި އެ ޕްރޮޖެކްޓް ގެ ރާއްޖޭގެ ފަރާތުން ދައްކަންޖެހޭ އެޑުވާންސަށް ދައްކާތާ 15 ދުވަސް ތެރޭގައި މަސައްކަތް ފަށަންޖެހޭ ކަމަށް އެގްރީމެންޓް ގައި ވާކަން ފާހަގަ ކުރައްވައި އިމްރާން ވަނީ އެޑްވާންސް ފައިސާވެސް ދައްކާފައިވާ ކަމަށް ވިދާޅުވެފައެވެ.
އެހެން ނަމަވެސް، ޕްރޮޖެކްޓް ލަސްވަނީ އެގްޒިން ބޭންކުން ފައިނޭންސް ނުލިބޭތީ ކަމަށާ، ލިބުނުހާ އަވަހަށް ފެށޭނެކަމަށް އިމްރާން ވިދާޅުވި އެވެ.
ރިޔާޒުގެ އިތުރުން، އެހެން މެންބަރުންވެސް ވަނީ އެރަށް ތަކުގައި ސަރުކާރުން އެޅުމަށް ނިންމާފައިވާ ޕޮލިސް ސްޓޭޝަންގެ މަސައްކަތާއި ގުޅިގެން ސުވާލު ކުރައްވާފައެވެ. އެ ސުވާލުތަކުގެ ޖަވާބުގައި ވެސް އިމްރާން ވިދާޅުވީ އެ ހުރިހާ މަސައްކަތް ތަކަކީވެސް އެ ޕްރޮޖެކްޓް ގެ ދަށުން ކުރަން ނިންމާފައިވާ މަސައްކަތް ކަމަށާ، ފައިނޭންސިންގ ހަމަ ޖެހުމުން ފެށޭނެ ކަމަށެވެ.
Advertisement
This content is created and paid for by advertisers and does not involve Voice Journalists
