މި ސަރުކާރުން އިއުލާނުކޮށްފައިވާ އެންމެ ބޮޑު އުމްރާނީ މަޝްރޫއު ކަމަށްވާ ތިލަމާލެ ބުރިޖު އެޅުމުގެ މަސައްކަތުގެ ތެރެއިން މިހާރު ޖަހާފައިވާ ތަނބުތަކަކީ އެ ބްރިޖުގެ އަަސްލު ތަނބުތައް ކަމަށާއި، އެ މަސައްކަތް ކުރިއަށް ދާ ކަމަށް ޕްލޭނުން މިނިސްޓަރު މުޙައްމަދު އަސްލަމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ތިން ވަނަ ޖަލްސާއަށް ޕްލޭނިން މިނިސްޓަރު ހާޒިރު ކުރައްވާފައިވާއިރު، ރައްޔިތުންގެ މަޖިލީހުގެ މެމްބަރު އިބްރާހިމް ރަޝީދު ވަނީ ތިލަމާލެ ބުރިޖުގެ މަސައްކަތް ކޮންޓްރެކްޓާއި އެއްގޮތަށް ކުރިއަށް ދޭތޯއާއި، އެ ކޮންޓްރެކްޓާއި އެއްގޮތަށް ނުދާނަމަ ކޮންޓްރެކްޓު ބާތިލުކުރައްވާނެ ތޯ އައްސަވާ ސުވާލުކުރައްވާފަ އެވެ.
މެމްބަރުގެ ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ ބްރިޖުގެ މަސައްކަތް ޑިލޭތަކާއެކު ވެސް ކުރިއަށް ދާ ކަމަށެވެ.
ތިލަމާލެ ބްރިޖު އަޅަނީ ރައީސް ޔާމިނުގެ ޒައާމަތުގައި އެޅި ސިނަމާލެ ބްރިޖުގެ މަސައްކަތް ކުރިއަށް ދިޔަހެން ފުރަތަމަ ޓެމްޕަރަރީ ޕްލެޓްފޯމެއް ހަދާ، އެ ޕްލެޓްފޯމުގެ މަތީގައި ތިބެ ބްރިޖުގެ މަސައްކަތް ކުރާ އުސޫލުން ނޫންކަމަށް މިނިސްޓަރު ވިދާޅުވި އެވެ.
އެއާއެކު މިނިސްޓަރު ވިދާޅުވީ މިހާރު ފެންނަން ހުރި ތަނބުތަކީ އެ ބްރިޖުގެ އަސްލު ތަނބުތަށް ކަމަށެވެ. އަދި އެ ތަނބުތައް ޖެހުމުގެ ކުރިން ޓެސްޓުކުރުމަށް 2 ތަނބު ޖަހާފައިވާކަމަށް މިނިސްޓަރު ވިދާޅުވި އެވެ.
"ބްރިޖުގެ މަސައްކަތް އަސްލުގައި ހަމަ ކުރިއަށް އެބަދޭ. ގުޅިފަޅުގެ ކާސްޓިން ޔާޑުގައި މިހާރު ޑެކް ސެކްޝަންތައްވެސް ހަދަމުން ގެންދޭ އެބަ އަސްލު، މި ބްރިޖް އަޅަމުން ދަނީކީއެއް، ކުރީގެ ބްރިޖު އެޅިގޮތަށް ޓެމްޕަރަރީ ޕްލެޓްފޯމެއް ހަދާފަ ދެން އަސްލު ބުރިޖު އަޅަނީކީ ނޫން. ޖަހަމުންދާ ތަނބުތަކަކީ އަސްލު ހުންނާނެ ތަނބުތައް. އެންމެ ފުރަތަމަ ޖެހި ދެ ތަނބަކީ ޓްރައިލްއަށް ޖެހި ދެ ތަނބު، ދެން ޖަހަމުން އެ ގެންދަނީ އަސްލު ޖަހާ ތަނބުތައް"
ޕްލޭނިން މިނިސްޓަރު މުޙައްމަދު އަސްލަމް
ތިލަމާލެ ބްރިޖަކީ އިންޑިއާގެ އެފްކޯންސް ކުންފުންޏާއި ހަވާލުކޮށްގެން ހިންގާ މަޝްރޫއެކެވެ.
އިންޑިއާގެ އެފްކޮންސް އިންފްރާސްޓްރަކްޗާ ލިމިޓެޑާއި ދިވެހި ސަރުކާރާއެކު ތިލަމާލެ ބްރިޖުގެ މަޝްރޫއުގެ އެއްބަސްވުމުގައި ސޮއިކުރީ 2021 ވަނަ އަހަރު އެވެ. އެ މަޝްރޫއު ކުރިއަށްގެންދަނީ އިންޑިއާއިން ދޭ 100 މިލިއަން ޑޮލަރުގެ ހިލޭ އެހީ އާއި އެ ގައުމުގެ އެގްޒިމް ބޭންކުން ދޫކުރާ 400 މިލިއަން ޑޮލަރުގެ ލައިން އޮފް ކްރެޑިޓްގެ އެހީގަ އެވެ.
ބުރިޖުގެ މަސައްކަތް ނިންމުމަށް ހަމަޖެހިފައިވަނީ ދެ މައިލްސްޓޯންއަކަށް ބަހާލައިގެންނެވެ.
ފުރަތަަމަ މައިލްސްޓޯންގައި މާލެއިން ފެށިގެން ގުޅިފަޅާއި ހަމަޔަށެވެ. އެ މަސައްކަތް މިއަހަރުގެ ޑިސެމްބަރާއި ހަމަޔަށް ނިންމަން ޖެހެއެވެ. އަދި ދެވަނަ މައިލްސްޓޯންއަކީ 2024 ވަނަ އަހަރުގެ މެއި މަހަށް ގުޅިފަޅުން ތިލަފުށްޓާއި ހަމައަށް ބްރިޖުއަޅާ ނިންމާލުމެވެ.
އެކަމަށް އިޝާރާތްކުރައްވާ މިނިސްޓަރު ވިދާޅުވީ ބްރިޖު އަޅާ ކުންފުނީގެ ޝެޑިއުލަށް ބަލާއިރު ޑިލޭތަކެއް އުޅޭކަން ފާހަގަކުރެވިފައިވާ ކަމަށެވެ.
އެހެން ނަމަވެސް ލަސްވާ ލަސްވުންތައް ކަވަރު ކުރެވޭނެކަމަށް ގަބޫލު ކުރެވޭކަމަށާއި، ކޮންޓްރެކްޓަށް އިތުރު ބަދަލުތައް ގެނެސް މުއްދަތު އިތުރުކުރުމުގެ ވިސްނުމެއް އަދި ސަރުކާރުން ނުގެންގުޅޭކަމަށް މިނިސްޓަރު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
