މި ސަރުކާރުން ފަށާފައިވާ ތިލަމާލެ ބްރިޖުގެ މަސައްކަތް އަވަސްކުރަންކަމަށް ބުނެ އިންޑިއާއިން އިތުރު 100 މިލިއަން ޑޮލަރުގެ ލޯނެއްވެސް ނަގާފައިވާ ކަމަށާއި، މަސައްކަތް ޝެޑިއުލާއި އެއްގޮތަށް ނުދާކަމަށް ވިދާޅުވުމުން، ލޯނަށް ހެދިގޮތް ސާފުވެވަޑައިނުގަންނަވާ ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ.
އިންޑިއާގެ އެފްކޮންސް އިންފްރާސްޓްރަކްޗާ ލިމިޓެޑާއި ދިވެހި ސަރުކާރާއެކު ތިލަމާލެ ބްރިޖުގެ މަޝްރޫއުގެ އެއްބަސްވުމުގައި ސޮއިކުރީ 2021 ވަނަ އަހަރު އެވެ.
އެ މަޝްރޫއު ކުރިއަށްގެންދަނީ އިންޑިއާއިން ދޭ 100 މިލިއަން ޑޮލަރުގެ ހިލޭ އެހީ އާއި އެ ގައުމުގެ އެގްޒިމް ބޭންކުން ދޫކުރާ 400 މިލިއަން ޑޮލަރުގެ ލައިން އޮފް ކްރެޑިޓްގެ އެހީގަ އެވެ.
އޭގެ އިތުރުން ބްރިޖުގެ މަސައްކަތް އަވސްކުރުމަށް އިތުރު 100 މިލިއަން ޑޮލަރުގެ ލޯނެއް ސަރުކާރުން ވަނީ އިންޑިއާއިން ނަގާފައެވެ.
އެހެން ނަމަވެސް ރައްޔިތުންގެ މަޖިލީހުގައި މެމްބަރުން ކުރި ސުވާލަށް ޖަވާބުދެއްވަމުން ޕްލޭނިން މިނިސްޓަރު މުޙައްމަދު އަސްލަމް ވަނީ ބްރިޖުގެ މަސައްކަތް ކުރިއަށްދާ ދުވެލި ލަސްކަން ފާހަގަކުރައްވާފަ އެވެ. އަދި އެ މަސައްކަތް ޝެޑިއުލާއި އެއްގޮތަށް ނުދާކަން ހާމަކުރައްވާފަ އެވެ.
އެކަމާއި ގުޅިގެން ސައީދު ވިދާޅުވީ ބުރިޖު މަސައްކަތް އަވަސްކުރުމަށް ރައްޔިތުންގެ ބޮލުގައި ބޮޑު ލޯނެއް އަޅުވާފައިވާއިރު، ކުންފުނީގެ ޝެޑިއުލާއި ދޭތެރޭ މިނިސްޓަރުގެ ޔަގީންކަމެއް ނެތް ކަމަށެވެ. އަދި އެ މަސައްކަތް ކުރާ ސްޕީޑު "ސްލޯ" ކަމަށް މިނިސްޓަރު ޤަބޫލުފުޅު ކުރައްވާކަމަށެވެ.
އެހެންކަމުން އިތުރު ލޯނެއް ނެގި ބޭނުން އޮޅޭ ކަމަށާއި، އަދި އެ ލޯނު ނަގައިގެން ކުރިކަމެއްވެސް ސާފުނުވާކަމަށް ސައީދު ވިދާޅުވި އެވެ.
"ޕްލޭނިން މިނިސްޓަރު އެ ވިދާޅުވީ ނޭނގެއޭ ވަގުތަށް ބްރިޖު އެޅޭނެކަމެއް ވެސް، އަދި ޝެޑިއުލާއި ދޭތެރޭ ވެސް ޔަގީންކަމެއް ނެތޭ، އަދި ވަގުތު އިތުރުކުރުމާއި ދޭތެރޭ ވެސް ވިސްނަން ޖެހެއޭ.. ބުނިއިރު، އިންޑިއާ ސަރުކާރުން ނޫން ތޯ އިހަށްދުވަހު އެ ބްރިޖު އަވަސްކުރުމަށް 100 މިލިއަން ޑޮލަރުގެ ލޯނެއް ނެނގީ.. އެހެންވީމަ ވާއެއް ނުވާއެއް އެނބަ އެނގޭތޯ؟"
މާވަށު ދާއިރާގެ މެމްބަރު މުޙައްމަދު ސައީދު
ސައީދުގެ ވާހަކައިގައި ވަނީ މި ސަރުކާރުން ދަރަނި އިތުރުކުރަމުންދާ މިންވަރަށް ވެސް އަލިއަޅުވާލައްވާފަ އެވެ.
އެގޮތުން އޭނާ ވިދާޅުވީ ރައީސް ޞާލިހުގެ ވެރިކަމުގައި އެކަނި 55 ބިލިއަން ދަރަނީގެ ގޮތުގައި އުފައްދާފައިވާ ކަމަށެވެ. އަދި އެފދައިން ދަރަނި އުފައްދައިގެން ތަރައްގީއާއި ގުޅުންހުރި އެއްވެސް ކަމެއްގައި ނަތީޖާ ނެރެދޭފަދަ މަސައްކަތްތަކެއް ފެނިގެން ގޮސްފައި ނުވާކަން އޭނާ ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
