އެމްޑީޕީގެ ރައީސް މުހައްމަދު ނަޝީދު ގެ ފިކުރެއްގެ ދިރުން ގޮފިން އުފައްދާފައިވާ އައު ސިޔާސީ ޕާޓީ "ދަ ޑިމޮކްރެޓްސް" ޕާޓީގެ ހުރިހާ ކަމެއްވެސް ކުރިއަށް ދާނީ ހުޅިވާލެވިގެން ވަރަށް ޓްރާންސްޕޭރެންޓް ކޮށް ކަމަށް އެ ޕާޓީން ބުނެފި އެވެ.  

ހ. މައިޒާންދޮށުުގޭގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ދަ ޑިމޮކްރެޓްސް ގެ ތަރުޖަމާނު ފާތިމަތު އަފްޝަން ލަތީފު ވިދާޅުވީ ފަހަކަށް އައިސް ސިޔާސީ ނިޒާމަށް ޒުވާނުން ކުރަމުން އައި އިތުބާރު ގެއްލިފައިވާ ކަމަށާ، ޒުވާނުން ސިޔާސީ މައިދާނުގައި ހަރަކާތްތެރިވާން ބޭނުން ނުވާ ކަމަށެވެ. އެހެންކަމުން ދަ ޑިމޮކްރެޓްސް އުފެއްދުމުގެ އެންމެ މުހިންމު އެއް ބޭނުމަކީ ރައްޔިތުންގެ އިތުބާރު އަލުން، މުޅި ސިޔާސީ ނިޒާމަށް ހޯދައި ދިނުން ކަމަށް އޭނާ ވިދާޅުވި އެވެ. 

އަފްޝަން ވިދާޅުވީ އެޕާޓީގެ މަގުސަދަކީ، ޕާޓީގެ އޮނިގަނޑާއި، ޕާޓީގެ މެންބަރޝިޕާއި، ހިންގާ ގަވާއިދާއި، ޕާޓީގެ ސިޔާސަތު ތަކާއި ހުރިހާ ކަމެއްވެސް، ވީހާވެސް ގިނަ ބައެއްގެ ބައިވެރި ވުމާއި އެކުގައި ކުރިއަށް ގެންދިޔުން ކަމަށެވެ. އެގޮތުން ޕާޓީ އެންމެ ފުރަތަމަ ފެށިގެން އައިސް، ޕާޓީގެ ނަން ކަނޑައެޅުމުގައިވެސް އެތައް ބައެއްގެ ޚިޔާލު، މީސްމީޑިއާގެ އެކި މަންސަތަށް މެދުވެރިކޮށް ހޯދިފައިވާ ކަމަށް އޭނާ ވިދާޅުވި އެވެ.

އަފްޝަން ވިދާޅުވީ މިހާރުވެސް އަދި ކުރިއަށް އޮތް ތަނުގައިވެސް ޚިޔާލުތައް ހުށަހެޅުމުގެ ފުރުސަތު އާއްމުންނަށް ހުޅުވާލެވިފައިވާ ކަމަށާ، އެގޮތުން މީސްމީޑިއާގެ އެކި މަންސަތަކުން އެކަން ކުރެވޭނެ ކަމަށެވެ. އަދި އެގޮތުން ހުށަހެޅޭ ޚިޔާލަކީ ނައްސިކޮށް އަންނަ ޚިޔާލެއް ކަމުގައި ވީ ނަމަވެސް އެކަން ބަލައިގަނެ، އެ ޚިޔާލުވެސް އާއްމުންނާއި ހިއްސާ ކުރެވޭނެ ކަމަށެވެ.  

އަފްޝަން ވިދާޅުވީ އެ ޕާޓީގެ އުއްމީދަކީ ވީހާވެސް ގިނަ އައު ބޭފުޅުން އެ ޕާޓީއާއި އެކުގައި މަސައްކަތް ކުރުން ކަމަށެވެ.