ސިޔާސީ މަގުސަދެއްގައި ނަމަވެސް ނުވަތަ ސަމާސާ އަކަށްވެސް އަވަށްޓެރި އިންޑިޔާގެ ބޮޑުވަޒީރު ނަރެންދުރަ މޯދީގެ ބޮލުގައި ވަގު ބަދުނާމް އަޅުވައިގެން ނުވާނެ ކަމަށާ، އެއީ ކުރަން ހެޔޮވާ ވަރުގެ ކަމެއް ނޫން ކަމަށް މަރަދޫ ދާއިރާގެ މެންބަރު އިބްރާހީމް ޝަރީފު (މަވޯޓާ) ވިދާޅުވެއްޖެ އެވެ.
މިއަދުގެ މަޖިލީހުގެ ޖަލްސާގައި ވަނީ، މަޑަވެލި ދާއިރާގެ މެންބަރު ޙުސައިން ފިރުޝާން ހުށަހަޅުއްވާފައިވާ، އެމް.ޑީ.ޕީ ވެރިކަމެއް އޮވެމެ، އެމް.ޑީ.ޕީގެ މެނިފެސްޓޯގައިވާ މަސްވެރިކަމުގެ ސިޔާސަތު ހިންގުމުގައި ފަހަތުފަޔަށް ބުރަވެ، ސަރުކާރުން މަސްވެރިކަމުގެ ސިޔާސަތާ ދެކޮޅަށް ވާހަކަދެއްކުން ހުއްޓާލައި އެމް.ޑީ.ޕީގެ މެނިފެސްޓޯގައިވާ ގޮތަށް އަދި ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ޝާއިޢުކޮށްފައިވާ ސިޔާސަތު ތަންފީޒުކުރުމަށް ގޮވާލައި ހުށަހަޅާ ޤަރާރުގެ ބަހުސް ކުރިއަށްގެންގޮސްފައެވެ.
އެ ބަހުސްގެ ތެރެއިން އިދިކޮޅު މެންބަރުންވަނީ، ޗާގޯސްގެ ކަނޑުގެ ފުށުއަރާ ސަރަހައްދުގެ އިން ވަކިކުރި މައްސަލާގައި ރާއްޖޭގެ ކަނޑުން ބައެއް ގެއްލި، އޭގެ ނޭދެވޭ އަސަރު ރާއްޖޭގެ މަސްވެރިކަމަށް ކުރަމުންދާ ކަމަށް ވިދާޅުވެފައެވެ. އަދި އެ މައްސަލައިގައި ކަނޑުގެ ސަރަހައްދުން ބައެއް ދޫކޮށްލީ 500 މިލިއަން ޑޮލަރިގެ ޑީލެއް ހަދައިގެން ކަމަށްވެސް އިދިކޮޅު ފަރާތްތަކުން ވަނީ ވިދާޅުވެފަ އެވެ.
އެ ވާހަކަތަކަށް ރައްދު ދެއްވައި ވާހަކަ ދައްކަވަމުން ޝަރީފު ވިދާޅުވީ، ސަމާސާ އަކަށްވެސް އެފަދަ ވަގު ބަދުނާމް ރާއްޖޭގެ އަވަށްޓެރި ގައުމެއްގެ އިސްތަށިފުޅުގައި އަޅުވައިގެން ނުވާނެ ކަމަށެވެ. އެހެނީ އެފަދަ ކަންކަމަކީ ގައުމީ ސަލާމަތަށް ނުރައްކާވާނެ ކަމެއް ކަމަށްވެސް އޭނާ ވިދާޅުވި އެވެ.
ސަމާސާ އަކަށްވެސް އަޅުގަނޑުމެންގެ އަވަށްޓެރި ގައުމެއްގެ ވެރިއެއްގެ ބޮލުގައި ވަގު ބަދުނާމް އަޅުވައިގެން ނުވާނެ. ހެޔޮ ނުވާނެ. އަޅުގަނޑު އާދޭހާއެކު ދަންނަވަން މި އިއްޒަތްތެރި މެންބަރުން، މި ތާނގައި އިދިކޮޅު ޕާޓީގެ މެންބަރުންވެސް މި ގައުމު ސުންނާފަތިވެ، މި ގައުމުގެ މުޅި ގައުމީ ސަލާމަތަށް ނުރައްކާތެރިވާފަދަ ވާހަކަތައް ސިޔާސީ ބޭނުމަށްވެސް ނުދެއްކެވުން.
އަޅުގަނޑު އެދެން. އިންޑިޔާގެ ބޮޑުވަޒީރުގެ ބޮލުގައި، އިސްތަށިފުޅުގައި، ވަގު ބަދުނާމް އަޅުގަނޑުމެން ސިޔާސީ ބޭނުމަށްވެސް އަޅުވާކަށް ހެޔޮ ނުވާނެ. އެއީ ކޮށްގެން ވާނެ ކަމެއް ނޫން. މޮރިޝަސް ގެ ބޮޑުވަޒީރުގެ ބޮލުގައި ވަގު ބަދުނާމް އަޅުވާކަށް ނުވާނެ. މިއިން ކޮންމެ ބޭފުޅަކަށްވެސް އެނގޭނެ ކޮތަޅަކަށް ލައިގެން 500 މިލިއަން ޑޮލަރު ހިފައިގެން ކަނޑު ގަންނަން އެއްވެސް ފަރާތަކަށް ނާދެވޭނެކަން. އެއީ ދުނިޔޭގެ ނިޒާމް އޮންނަ ގޮތެއް ނޫން ކަން.
މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ)
ޝަރީފް ވިދާޅުވީ އެހެން ގައުމަކަށް އެއްވެސް އެއްޗެއް ނުލިބި، ރާއްޖެއަށް އެއްކޮށް ކަނޑު ނެނގޭގޮތަށް ބައިނަލްއަގުވާމީ ކަނޑުގެ ގާނޫނު ތަން ނުދޭ ކަމަށެވެ. އެގޮތުން، ރާއްޖޭގެ 200 މޭލާއި، އެހެން ގައުމެއްގެ 200 މޭލާއި ފުށުއަރާނަމަ، ދެ ގައުމުގެ ދެމެދުގައި އެ ބައި ބަހަންޖެހޭނެ ކަމަށާ، ގާނޫނު އޮތީ އެގޮތަށް ކަމަށް އޭނާ ވިދާޅުވި އެވެ. އަދި އިޓްލޮސްގެ ނިންމުމާއި އެކު ރާއްޖެއަށް ލިބުނީ ވަރަށް ބޮޑު ކާމިޔާބީއެއް ކަމަށާ، އެ މައްސަލާގައި ރާއްޖެއަށް ހައްގުވާ ހުރިހާ އެއްޗެއް ރާއްޖެއަށް ލިބިފައިވާ ކަމަށް އޭނާ ވިދާޅުވި އެވެ.
ޝަރީފު ވިދާޅުވީ ވޭތުވެދިޔަ 100 އަހަރު ތެރޭގައިވެސް، މި ސަރުކާރުން މަސްވެރިކަމަށް އަހައްމިއްޔަތު ދިން ސަރުކާރެއް ނެތް ކަމަށާ، އަދި މި ސަރުކާރުން މަސްވެރިކަމަށް ހޭދަކުރި ވަރަށް ހޭދަކުރި ސަރުކާރެއް ނެތް ކަމަށެވެ. އެހެން ކަމުން ހަގީގަތާއި ޚިލާފް ނުދެއްކެވުމަށްވެސް އޭނާ ވަނީ އެދިލައްވާފައެވެ.
Advertisement
This content is created and paid for by advertisers and does not involve Voice Journalists
