ރާއްޖޭގެ ފަހުގެ ތާރީޚްގައި ސިޔާސީ ގޮތުން އެންމެ ފުންނާބު އުސް ދެ ބޭފުޅުންގެ ބަސްވިކޭ ސިޔާސީ ޕާޓީއެއް ރާއްޖޭގައި ނެތޭ ހިސާބަށް ދިޔުމަކީ، ރާއްޖޭގެ ސިޔާސީ މަޝްރަހު ބައްޓަންވާގޮތާއިމެދު ދިރާސާކުރާ މީހުން ވިސްނާލަންޖެހޭ ކަމެއް ކަމަށް ހޯމް މިނިސްޓަރު އަދި އަދާލަތު ޕާޓީގެ ރައީސް ޢިމްރާން އަބްދުالله ވިދާޅުވެއްޖެ އެވެ. 

އިމްރާން މިފަދައިން ވިދާޅުވެފައި މިވަނީ، ރާއްޖޭގެ ސިޔާސީ މައިދާނުގައި ހުރި އެންމެ ތަޖުރިބާކާރު، އަދި ރާއްޖޭގެ ވެރިކަން އެންމެ ގިނަ ދުވަސް ވަންދެން ކުރެއްވި ކުރީގެ ރައީސް އަދި މޯލްޑިވްސް ރިފޯމް މޫވްމަންޓް (އެމްއާރްއެމް) އުވާލަން އީސީން ނިންމިކަން އިޢުލާން ކުރުމާއި ގުޅިގެންނެވެ. 

އީސީން އެމްއާރްއެމް އުވާލަން ނިންމީ ސިޔާސީ ޕާޓީތަކުގައި މަދުވެގެން ތިބެންޖެހޭ މެންބަރުން ކަމުގައިވާ 3000 މެންބަރުން ހަމަނުވުމުން ތިންމަސް ދުވަހުގެ ނޯޓިސް ދިނުމަށްފަހުގައެވެ. 

އެ ޕާޓީގައި 3000 މެންބަރުން ހަމަނުވެގެން ދެފަހަރެއްގެ މަތިން ނޯޓިން ދީފައިވެއެވެ. އެގޮތުން 2022 ވަނަ އަހަރުވެސް މެންބަރުން ހަމަ ކުރަން ނޯޓިސް ދިނުމުން، މުއްދަތު ތެރޭގައި ޕާޓީން ވަނީ މެންބަރުން ހަމަ ކޮށްފައެވެ. އެއަށްފަހު، އަނެއްކާވެސް އެ ޕާޓީގެ މެންބަރުންގެ އަދަދު 3000 އަށްވުރެ ދަށްވެފައި ވަނިކޮށް، ސަރުކާރުގެ ވުޒާރާތަކުގައި ތިބި އެ ޕާޓީއަށް ނިސްބަތްވާ ގިނަ މެންބަރުންވެސް ވަނީ ޕާޓީން ވަކިވެފައެވެ.

އެ މެންބަރުން ޕާޓީން ވަކިވެފައި ވަނީ މިދިޔަ ފެބުރުއަރީ މަހުގެ ތެރޭގައި އެ ޕާޓީއަށް މެންބަރުން ހަމަކުރުމަށް ނޯޓިސްވެސް ދީފައިވަނިކޮށެވެ. އެގޮތުން ޕާޓީއަށް ދިން ދެވަނަ ނޯޓިސްގެ މުއްދަތު ހަމަވީ މިދިޔަ ބުދަ ދުވަހަށެވެ. 
އިލެކްޝަންސް ކޮމިޝަނުގެ ވެބްސައިޓުގައިވާ މައުލޫމާތަށް ބަލާއިރު ފެބުރުއަރީއާ ހަމައަށް މެމްބަރުންގެ އަދަދަކީ 2،981 އެވެ.

އެމްއާރްއެމް އުވާލަން އީސީން ނިންމުމާއި ގުޅިގެން އެ ޕާޓީގެ ރައީސް ފާރިސް މައުމޫން ކުރެއްވި ޓްވީޓެއްގައި ވަނީ އެ ނިންމުމަކީ ކޮރަޕްޓް ނިންމުމެއްކަން ފާހަގަކުރައްވައި ހިމޭންކަމާއި އެކު ތިބުމަށް ޕާޓީގެ މެންބަރުންގެ ކިބައިން އެދި ލައްވާފައެވެ. އެކަމާއި ގުޅިގެން އެ ޕާޓީގެ ޒަޢީމް މައުމޫން އަބްދުލްޤައްޔޫމް ވަނީ އެއީ ވަރަށް ކޮރަޕްޓް ނިންމުމެއް ކަމަށް ވިދާޅުވެފައެވެ. އަދި އެ ނިންމުމާއި ދެކޮޅަށް ވަކާލާތު ކުރައްވާނެ ކަމަށްވެސް ވިދާޅުވި އެވެ.