އޭޝިއަން މާޗިންގް ބޭނޑް ކޮންފެޑަރޭޝަން (އޭއެމްބީސީ) ގެ ބޯޑް މީޓިންގް އަދި އޭޝިއަން މިއުސިކް ގޭމްސް 2023 ގެ ޓެކްނިކަލް މީޓިންގް ގައި އެސޯސިއޭޝަން އޮފް މަޖީދިއްޔާ ބޭންޑް އެލަމްނައި (އަންބާ) އިން ބައިވެރި ވެއްޖެއެވެ.

އަންބާ އިން ދިވެހިރާއްޖެ ތަމްސީލްކުރަން ބައިވެރިވި ޓީމްގައި ހިމެނެނީ އަންބާގެ ފައުންޑިންގް މެމްބަރު އިބްރާހިމް އަފީފް، އަންބާގެ ނާއިބު ރައީސް މުޙައްމަދު އަޒްމީ ރަޝީދު އަދި އަންބާގެ ސެކެޓްރީ ޖެނެރަލް މުޙައްމަދު ފަޔާޒް އެވެ.

އޭޝިއާ ގެ 23 މެމްބަރު ގައުމު ހިމެނޭހެން ހެދިފައިވާ އޭއެމްބީސީ މައިގަނޑު މަގްސަދަކީ އޭޝިއާ ސަރަހައްދުގަ މާޗިންގް ބޭންޑުތަކުގެ ކަންތައްތައް ކުރިއެރުވުމެވެ.

މިއާއިއެކު "މަޖީދިއްޔާގެ އަޑު އަންބާއާއެކު" މޮޓޯއަކަށް ބޭނުންކުރާ އަންބާގެ އިސްކުލަ އަކީ މަޖީދިއްޔާގެ ކުރީގެ ބެޖެއްގެ ކުލަ ކަމުގައިވާ މުށިކުލައެވެ. އަދި އަންބާގެ ރަސްމީ އިދާރާއަކީ މަޖީދިއްޔާ ސްކޫލެވެ.

އަންބާގެ މައިގަނޑު މަގުސަދުތަކުގެ ތެރޭގައި، ޖަމިއްޔާގެ މެންބަރުންގެ މެދުގައި ގުޅުން ބަދަހިކޮށް ފަންނު ދެމެހެއްޓުމުގެ ހަރަކާތްތައް ހިންގުމާއެކު، މަޖީދިއްޔާ ސްކޫލްގެ ބޭންޑާއި ރާއްޖޭގެ އެހެން ސްކޫލް ބޭންޑްތަކަށް އެހީގެ ފުރުސަތުތައް ހޯދައި މަގުފަހިކޮށްދިނުމާއި، ފެންވަރު ރަނގަޅުކުރުމަށްޓަކައި ހަރަކާތްތައް އިންތިޒާމުކުރުމާއި ބައިނަލްއަގްވާމީ މިންގަނޑުތައް ތައާރަފުކުރުމާއި ބޭންޑް އިންސްޓްރަކްޓަރުން ބިނާކޮށްދިނުމާއި، ރާއްޖެއާއި ރާއްޖޭން ބޭރުގައި ހިންގާ ޕަރފޯމިންގ އާޓްސްގެ ހަރަކާތްތަކުގައި ބައިވެރިވުން ހިމެނެއެވެ.

މިދިޔަ ހޮނިހިރު ދުވަހު ކުރިއަށް ގެންދެވުނު އޭއެމްބީސީގެ ބޯޑް މީޓިންގްގައި މި އަހަރުގެ ބޯޑް އޮފް ޑިރެކްޓާސް ވަނީ ހޮވާފައެވެ.

އެގޮތުން ނިމިދިޔަ ދައުރުގެ ކަންޓްރީ ޑިރެކްޓާ ފޮ މޯލްޑިވްސްގެ މަގާމުގައި ހުންނެވި، މިހާރުގެ އަންބާގެ ނާއިބު ރައީސް މުޙައްމަދު އަޒްމީ ރަޝީދު ވަނީ މާކެޓިންގް ޑައިރެކްޓަރގެ މަޤާމަށް އައްޔަނުކުރެވިފައެވެ. އަދި މި ދައުރުގެ ކަންޓްރީ ޑިރެކްޓަރ ފޮ މޯލްޑިވްސް ގޮތުގައި ވަނީ މިހާރުގެ އަންބާގެ ސެކެޓްރީ ޖެނެރަލް ގެ ގޮތުގައި ހުންނެވި މުޙައްމަދު ފަޔާޒް ހަމަޖައްސާފައެވެ.

ބޯޑް މީޓިން އަދި ޓެކްނިކަލް މީޓިންގްގެ އިތުރުން، 3 ގައުމެއްގެ އެސޯސިއޭޝަންއަކާއިއެކު އަންބާ އިން ވަނީ ތަފާތު 3 އެމް.އޯ.ޔޫ އެއްގައި ސޮއި ކޮށްފައެވެ.

އެގޮތުން:

1. ކަލާގާޑް އެލައިއަންސް އޮފް ދަ ފިލިޕީންސް އިންކް

2. ދަމާޗިންގް ބޭންޑް އެސޯސިއޭޝަން އޮފް ތައިލޭންޑް.

3. އިންޑޮނީޝިއާ މާޗިންގް ބޭންޑް އެސޯސިއޭޝަން.

މި އެމް.އޯ.ޔޫ ތަކުގެ ބޭނުމަކީ ދިވެހިރާއްޖޭގެ މިއުޒިކް ކުރިއެރުވުމުގެ އިތުރުން ޤައުމުތަކުގެ ދެމެދުގައި މިއުޒިކްގެ ޞަޤާފަތް ދިރުވައި ހޭލުންތެރިކަން އިތުރުކުމެވެ.

މީގެ އިތުރުން ސްޓޫޑެންޓް އެކްސްޗޭންޖް ޕްރޮގްރާމްތައް ކުރިއަށް ގެންގޮސް އިންސްޓްރަކްޓަރުން ތަމްރީނުކުރުމުގެ އިތުރުން މުބާރާތްތައް ބާއްވާ ހިންގުމުގެ ފުރުސަތު މިިކަމުގެ ސަބަބުން ހުޅުވިގެންދާނެއެވެ.